សហភាពអឺរ៉ុបត្រៀមដាក់ទណ្ឌកម្មសេដ្ឋកិច្ចថ្មីលើរបបសឹកភូមា
នៅក្រោយហេតុការណ៍ សម្លាប់ ដុតមនុស្សឲ្យឆេះខ្លោច នៅភាគខាងកើតប្រទេសភូមា ដែលអង្គការមនុស្សធម៌ ចោទប្រកាន់ថា ជាស្នាដៃរបស់កងទ័ពភូមា សហភាពអឺរ៉ុប តាមរយៈមន្រ្តីទូតរបស់ខ្លួនបានព្រមាន កាលពីថ្ងៃព្រហស្បតិ៍ ទី ៣០ធ្នូ ដាក់ទណ្ឌកម្មសេដ្ឋកិច្ចបន្ថែម ទៅលើរបបសឹកភូមា។ សហភាពអឺរ៉ុបគាំទ្រផងដែរ ការអំពាវនាវរបស់សហរដ្ឋអាមេរិកដែលចង់ឲ្យមានបម្រាមអន្តរជាតិ លើការលក់ នាំចូលសព្វាវុធ ទៅកាន់ប្រទេសភូមា។
ចុះផ្សាយនៅថ្ងៃ៖
ស្តាប់ - ០២:៤៦
បន្ទាប់ពីអាមេរិក សហភាពអឺរ៉ុបបានចេញមុខ គាំទ្រឲ្យមានបម្រាមលក់ និងនាំចូលអាវុធ ទៅកាន់ប្រទេសភូមា។ សហភាពអឺរ៉ុបបានប្រកាសផងដែរត្រៀមខ្លួនដាក់ទណ្ឌកម្មសេដ្ឋកិច្ចបន្ថែមលើរបបសឹកភូមា នៅក្រោយហេតុការណ៍ ដុតសម្លាប់ប្រជាជនស៊ីវិលភូមាកាលពីថ្ងៃសុក្រសប្តាហ៍មុន។
នៅក្រោយព័ត៌មានចុះផ្សាយថា គេបានប្រទះឃើញសាកសពមនុស្ស ឆេះខ្លោច ក្នុងរថយន្តដែលគេដុតបំផ្លាញ ប៉ុន្មានគ្រឿង នៅរដ្ឋកាយ៉ា ភាគខាងកើតប្រទេសភូមា អង្គការអង់គ្លេស Save The children បានបញ្ជាក់នៅក្នុងសេចក្តីថ្លែងការណ៍ នៅសប្តាហ៍នេះថា បុគ្គលិកពីររូប ដែលបានបាត់ខ្លួន នៅក្នុងហេតុការណ៍ កាលពីថ្ងៃសុក្រ ស្ថិតក្នុងចំណោមប្រជាជនស៊ីវិល៣៥នាក់ ដែលត្រូវបានគេសម្លាប់ និងដុតបំផ្លាញសាកសព។
កងទ័ពភូមាមិនបាននិយាយចំពីហេតុការណ៍ដុតសម្លាប់ប្រជាជនស៊ីវិល ដែលនៅក្នុងនោះ មានទាំងមនុស្សស្រីនិងកុមារ។ ប៉ុន្តែ នៅក្នុងសេចក្តីថ្លែងការណ៍របស់ខ្លួន កងទ័ព អះអាងថា ខ្លួនបានបាញ់សម្លាប់ភេរវជនប្រដាប់អាវុធមួយចំនួន ដែលជាសមាជិករបស់ក្រុមប្រឆាំង នៅក្នុងភូមិមួយ បន្ទាប់ពីពួកគេទាំងនោះមិនព្រមបញ្ឈប់រថយន្ត នៅច្រកត្រួតពិនិត្យរបស់កងទ័ព។
សម្រាប់លោកហ្សូសែហ្វ បូរែល ការវាយប្រហារ ដោយយកប្រជាជនស៊ីវិល និងមន្រ្តីអង្គការមនុស្សធម៌ ជាផ្ទាំងស៊ីបយ៉ាងដូច្នេះ គឺជារឿងមិនអាចទទួលយកបាននោះទេ។ វាជាការរំលោភយ៉ាងច្បាស់ក្រឡែត សិទ្ធិមនុស្ស និងច្បាប់អន្តរជាតិ។ នៅចំពោះមុខនៃការផ្ទុះអំពើហិង្សា នៅភូមា សហគមន៍អន្តរជាតិត្រូវចាត់វិធានការបន្ថែម និងចាំបាច់ ដែលនៅក្នុងនោះមានផងដែរ សេចក្តីសម្រេចរបស់អង្គការសហប្រជាតិសម្រាប់ការហាមនាំចូល និងលក់អាវុធទៅប្រទេសភូមា។
សូមបញ្ជាក់ថា ចាប់តាំងពីកងទ័ពធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រីអ៊ុងសាន ស៊ូជី នៅដើមខែ កុម្ភៈ ឆ្នាំនេះ សហភាពអឺរ៉ុប បានមូលមតិជាមួយសហរដ្ឋអាមេរិក ដោយបានដាក់ទណ្ឌកម្មសេដ្ឋកិច្ចទៅលើរបបសឹកភូមា។ មន្រ្តីយោធា និងក្រុមហ៊ុនភូមា ដែលជាប់ពាក់ព័ន្ធនឹងមេដឹកនាំយោធាភូមា ចំនួន៣០បានស្ថិតក្នុងបញ្ជីខ្មៅរបស់សហភាពអឺរ៉ុប។ មានន័យថា ពួកគេមិនអាចដាក់ជើងជាន់ដីសហភាពអឺរ៉ុប ចំណែកទ្រព្យសម្បត្តិរបស់ពួកគេ ដែលមាននៅទឹកដីអឺរ៉ុប ត្រូវគេបង្កកមិនឲ្យបើកយកទៅប្រើប្រាស់បាន។ សហភាពអឺរ៉ុបធ្លាប់បានចេញបម្រាម ផងដែរមិនឲ្យប្រទេសសមាជិកនៅអឺរ៉ុបលក់គ្រឿងបរិក្ខា សំភារៈ ទាំងឡាយណាដែលកងទ័ព អាចយកទៅកែច្នៃ ប្រើប្រាស់សម្រាប់បង្រ្កាប ហិង្សាទៅលើបាតុករភូមា។ លើសពីនោះទៀត សហភាពអឺរ៉ុបបានផ្អាករាល់ជំនួយហិរញ្ញវត្ថុសម្រាប់ភូមា ក្នុងក្តីបារម្ភថា របបសឹកភូមាអាចបង្វែរយកទៅប្រើសម្រាប់ប្រយោជន៍របស់កងទ័ព ដោយរក្សាទុកតែជំនួយមនុស្សធម៌សម្រាប់ប្រជាជនភូមាតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ