ឥណ្ឌូណេស៊ីដកហូតអាជ្ញាប័ណ្ណពីក្រុមហ៊ុនធ្វើអាជីវកម្មធ្យូងថ្ម និងព្រៃឈើ
បន្ទាប់ពីហាមការនាំចេញធ្យូងថ្ម សម្រាប់ផ្គង់ផ្គង់តម្រូវការរោងចក្រអគ្គិសនីក្នុងស្រុក រដ្ឋាភិបាលឥណ្ឌូណេស៊ីបានប្រកាស នៅថ្ងៃព្រហស្បតិ៍ទី ៦មករា ថាបានសម្រេចដកហូតអាជ្ញាបណ្ណជាង ២០០០ពីក្រុមហ៊ុនធ្វើអាជីវកម្ម រ៉ែ ធ្យូងថ្ម និងក្រុមហ៊ុនធ្វើសម្បទានដៃព្រៃ នៅឥណ្ឌូណេស៊ី។ កាលពីថ្ងៃ ពុធ ជប៉ុនដែលជាអតិថិជនដ៏សំខាន់របស់ឥណ្ឌូណេស៊ី បានទទូចសុំឲ្យរដ្ឋាភិបាលឥណ្ឌូណេស៊ី ដកចេញ បម្រាម ដែលជះផលដ៏អាក្រក់ ដល់សេដ្ឋកិច្ច និងជីវិតរស់នៅប្រចាំថ្ងៃរបស់ប្រជាជនជប៉ុន។
ចុះផ្សាយនៅថ្ងៃ៖
ជប៉ុនដែលនាំចូលធ្យូងថ្មដ៏សំខាន់ពីឥណ្ឌូណេស៊ី ប្រមាណ ២លានតោនក្នុងមួយខែ បានទាមទារឲ្យរដ្ឋាភិបាលឥណ្ឌូណេស៊ីដកចោលភ្លាម បម្រាមនាំចេញធ្យូងថ្ម ដែលរដ្ឋាភិបាលឥណ្ឌូណេស៊ី បានប្រកាសចូលជាធរមាន ចាប់ពីថ្ងៃទី១ ខែមករា ដើម្បីផ្គត់ផ្គង់បន្ទាន់ តម្រូវការសេដ្ឋកិច្ចក្នុងស្រុកឥណ្ឌូណេស៊ី។
នៅក្នុងលិខិតផ្ញើទៅកាន់ក្រសួងថាមពល និងធនធានរ៉ែឥណ្ឌូណេស៊ី ឯកអគ្គរាជទូតជប៉ុនប្រចាំប្រទេសឥណ្ឌូណេស៊ីបានអំពាវនាវឲ្យរដ្ឋាភិបាលឥណ្ឌូណេស៊ីដកចេញជាបន្ទាន់ បម្រាមនាំចេញធ្យូងថ្មទៅជប៉ុន ព្រោះថា ជប៉ុនគ្មានប្រភពផ្គង់ផ្គង់ថាមពលច្រើនដែលត្រូវជ្រើសរើសនោះទេ។ ម្យ៉ាង ការនាំចូលធ្យូងថ្មមកជប៉ុនមិនធ្វើឲ្យប៉ះពាល់ដល់ការផ្គត់ផ្គង់ រោងចក្រអគ្គិសនី នៅឥណ្ឌូណេស៊ីនោះទេ ព្រោះ ធ្យូងថ្ម ដែលជប៉ុននាំចូល មានគុណភាពខ្ពស់ជាងធ្យូងថ្ម ដែលឥណ្ឌូណេស៊ីត្រូវការប្រើប្រាស់ក្នុងស្រុក។
បម្រាមនាំចេញធ្យូងថ្មពីឥណ្ឌូណេស៊ី ដែលមានស្តុកទុកធ្យូងថ្ម ជាង ១៧ពាន់លានតោន បានធ្វើឲ្យតម្លៃធ្យូងថ្មឡើងខ្ពស់ នៅក្នុងបរិបទដែលតម្រូវការធ្យូងថ្មមានកាន់តែច្រើន ដើម្បីឆ្លើយតបនឹងការងើបស្ទុះឡើងនៃសេដ្ឋកិច្ចសកលនៅក្រោយវិបត្តិកូវីដ និងតម្រូវការថាមពល នៅរដូវត្រជាក់។
រដ្ឋាភិបាលឥណ្ឌូណេស៊ីគ្រោងនឹងសម្រេចនៅថ្ងៃពុធទី ៥មករាថា តើត្រូវដកចេញ បម្រាមនាំចេញធ្យូងថ្ម ដែរឬទេ។ ប៉ុន្តែ គម្រោងប្រជុំជាមួយភាគីតំណាងក្រុមហ៊ុនធ្វើអាជីវកម្មរ៉ែ ធ្យូងថ្ម នៅថ្ងៃពុធ ត្រូវបានលុបចោល ដោយគ្មានការបញ្ជាក់មូលហេតុ។
នៅថ្ងៃ ព្រហស្បតិ៍ គឺប្រធានាធិបតីឥណ្ឌូណេស៊ី លោក ហ្សូកូ វីដូដូ ដែលបានប្រកាសនៅតាមទូរទស្សន៍ជាតិពីដំណឹងដកអាជ្ញាបណ្ណជាង២០០០ពីក្រុមហ៊ុនធ្វើអាជីវកម្មរ៉ែ ធ្យូងថ្ម និងព្រៃឈើ។ ប្រធានាធិបតីឥណ្ឌូណេស៊ីបានពន្យល់ថា ការលំបាកក្នុងការគ្រប់គ្រងធនធានធម្មជាតិ ជាហេតុផលដែលធ្វើឲ្យ រដ្ឋាភិបាលសម្រេចដកអាជ្ញាប័ណ្ណពីក្រុមហ៊ុនធ្វើអាជីវកម្មរ៉ែ ធ្យូងថ្ម។
តាមប្រធានាធិបតីឥណ្ឌូណេស៊ី រដ្ឋាភិបាលបានសម្រេចដកអាជ្ញាប័ណ្ណ ពីក្រុមហ៊ុនធ្វើអាជីវកម្មរ៉ែ និងធ្យូងថ្ម ប្រមាណ ២០៧៨ ក្រុមហ៊ុន ដែលប្រើប្រាស់អាជ្ញាប័ណ្ណមិនត្រឹមត្រូវ ឬគ្មានផែនការច្បាស់លាស់ក្នុងការធ្វើអាជីវកម្ម។ លើសពីនោះ រដ្ឋាភិបាលបានដកហូតផងដែរ អាជ្ញាប័ណ្ណពីក្រុមហ៊ុនជាង ២០០ដែលធ្វើអាជីវកម្មលើដីព្រៃ ឥណ្ឌូណេស៊ី សរុប ជាង ៣១ ០០០គីឡូម៉ែត្រការ៉េ ដែលស្មើនឹងទំហំផ្ទៃដីប្រទេសបែលហ្ស៊ិកមួយ។
ការប្រកាសដកហូតអាជ្ញាប័ណ្ណពីក្រុមហ៊ុនធ្វើអាជីវកម្មរ៉ែធ្យូងថ្ម ធ្វើឡើងនៅក្នុងកាលៈទេសៈដែលរដ្ឋាភិបាលកំពុងផ្ទុះសង្រ្គាមជាមួយ ក្រុមហ៊ុនធ្វើអាជីវកម្មធ្យូងថ្ម ដែលរដ្ឋាភិបាលចោទប្រកាន់ថា មិនបានគោរពតាមកាតព្វកិច្ច របស់ខ្លួនក្នុងការផ្គត់ផ្គង់ ថាមពលធ្យូងថ្ម ទៅឲ្យរោងចក្រផលិតអគ្គិសនីក្នុងស្រុក។
សម្រាប់ក្រសួងថាមពល និងធនធានរ៉ែឥណ្ឌូណេស៊ី ដើម្បី នាំចេញ យកទៅលក់ក្នុងតម្លៃខ្ពស់ ក្រុមហ៊ុនបានរំលោភច្បាប់ ដែលបានទាមទារឲ្យគេរក្សាទុកធ្យូងថ្ម ២៥% នៃការផលិត និងលក់ក្នុងតម្លៃថោក(៧០ដុល្លារ ក្នុងមួយតោន) សម្រាប់ការប្រើប្រាស់ក្នុងស្រុក។
តាមក្រុមហ៊ុនផលិតអគ្គិសនីរដ្ឋឥណ្ឌូណេស៊ី ចាប់តាំង ពីថ្ងៃហាមមិនឲ្យនាំចេញធ្យូងថ្ម កាលពីថ្ងៃទី ១មករា ធ្យូងថ្ម ពី៧ ទៅ ១៣លានតោន ត្រូវបានបង្វែរ សម្រាប់តម្រូវការរបស់រោងចក្រផលិតអគ្គិសនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ