របបសឹកភូមាបន្ថែមបទចោទប្រកាន់៥ទៀត ប្រឆាំងលោកស្រីអ៊ុងសាន ស៊ូជី
អតីតមេដឹកនាំភូមា លោកស្រី អ៊ុងសាន ស៊ូជីដែលត្រូវរបបសឹកចាប់ឃុំខ្លួន និងត្រូវតុលាការផ្តន្ទាទោសឲ្យជាប់ពន្ធនាគារ ៦ឆ្នាំហើយនោះ ត្រូវបានរបបសឹកដាក់ពាក្យចោទប្រកាន់សាជាថ្មីក្នុងរឿងប្រព្រឹត្តអំពើពុករលួយ។ តាមប្រភពអ្នកស្និទ្ធនឹងសំណុំរឿង ដែលទីភ្នាក់ងារព័ត៌មានបារាំង AFP បានសាកសួរនៅថ្ងៃសៅរ៍ទី ១៥មករា របបសឹកភូមាប្រកាស បទចោទប្រកាន់ចំនួន ៥ ស្តីពីរឿងពុករលួយប្រឆាំងលោកស្រីអ៊ុងសាន ស៊ូជី។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងសំណុំរឿងពុករលួយ លោកស្រីអ៊ុងសាន ស៊ូជី ប្រឈមនឹងបទចោទប្រកាន់ចំនួន ៥ ដែលនៅក្នុងនោះ មានមួយ ជាប់ទាក់ទងនឹងរឿងជួល ទិញ និងជួសជុលថែទាំឧទ្ធម្ភាគចក្រមួយគ្រឿង។ តាមកាសែតក្នុងស្រុកភូមា ដែលគ្រប់គ្រងដោយរបបសឹក ជ័យលាភីណូបែលសន្តិភាពភូមា លោកស្រីអ៊ុងសាន ស៊ូជី ត្រូវចោទប្រកាន់ថា បានធ្វើឲ្យរដ្ឋខាតបង់ថវិកា តាមរយៈការរំលោភច្បាប់ស្តីពីការជួល និងទិញឧទ្ធម្ភាគចក្រ។
តាមប្រភពដកស្រង់ដោយទីភ្នាក់ងារព័ត៌មានបារាំង AFP លោក វីន មីន អតីតប្រធានាធិបតី ភូមា របស់រដ្ឋាភិបាលរបស់លោកស្រី អ៊ុងសាន ស៊ូជី ក៏ត្រូវជាប់ក្នុងបទចោទប្រកាន់ថ្មីនេះដែរ។
នៅខែធ្នូឆ្នាំមុន កាសែតរដ្ឋភូមា Global New Light of Myanmar ធ្លាប់បានចុះផ្សាយថា លោកស្រីអ៊ុងសាន ស៊ូជី និងលោកវីន មីនដែលជា ប្រធានាធិបតីក្នុងរដ្ឋាភិបាលរបស់លោកស្រីអ៊ុងសាន ស៊ូជី នឹងត្រូវកាត់ទោសក្រោមច្បាប់ប្រឆាំងអំពើពុករលួយ ក្នុងសំណុំរឿងជួលឧទ្ធម្ភាគចក្រ។ នៅក្នុងបទចោទប្រកាន់ផ្សេងទៀត លោកស្រី អ៊ុងសាន ស៊ូជីត្រូវប្រឈមនឹងការកាត់ទោស ពីបទទទួលសំណូក និងរំលោភអំណាច ក្នុងសំណុំរឿងទាក់ទងនឹងកិច្ចព្រមព្រៀងជាមួយក្រុមហ៊ុនអចលនទ្រព្យ។ ក្រៅពីនេះ អតីតមេដឹកនាំរដ្ឋាភិបាលស៊ីវិលភូមា កំពុងត្រូវតុលាការជំនុំជម្រះផងដែរពីរឿងរំលោភកិច្ចការសម្ងាត់រដ្ឋ ដែលនឹងអាចធ្វើឲ្យលោកស្រីប្រឈមនឹងការដាក់ទោសជាប់ពន្ធនាគារ១៥ឆ្នាំ។
លោកស្រីអ៊ុងសាន ស៊ូជីទើបត្រូវបានតុលាការរបបសឹកកាត់ទោសកាលពីថ្ងៃទី១០មករា ឲ្យជាប់ពន្ធនាគារ ៤ឆ្នាំ ពីបទនាំចូល អាយកូម ខុសច្បាប់។ ចាប់តាំងពីត្រូវបានមេដឹកនាំយោធាភូមា ចាប់ឃុំខ្លួននៅកន្លែងសម្ងាត់ ចាប់ពីថ្ងៃធ្វើរដ្ឋប្រហារយោធា នៅថ្ងៃទី ១កុម្ភៈ ២០២១ លោកស្រី អ៊ុងសាន ស៊ូជីត្រូវបានតុលាការរបបសឹកភូមា កាត់ទោស២ដង និងផ្តន្ទាទោស ឲ្យជាប់ពន្ធនាគារ សរុប ៦ឆ្នាំ។
ការជំនុំជម្រះលើកទី២ កាលពីថ្ងៃចន្ទ ត្រូវបានធ្វើឡើងដោយបិទទ្វារ ចំណែកមេធាវីរបស់លោកស្រីអ៊ុងសាន ស៊ូជី ត្រូវហាមមិនឲ្យនិយាយជាមួយអ្នកកាសែត ឬអង្គការអន្តរជាតិ។
គណបក្សសម្ព័ន្ធជាតិដើម្បី ប្រជាធិបតេយ្យ របស់លោកស្រីអ៊ុងសាន ស៊ូជីបានចោទប្រកាន់របបសឹកថា បានធ្វើរដ្ឋប្រហារ ប្លន់យកអំណាចពីរដ្ឋាភិបាលស៊ីវិល ដែលដឹកនាំដោយលោកស្រីអ៊ុងសាន ស៊ូជី។ ដោយបង្កើនបទចោទប្រកាន់ជាច្រើន ប្រឆាំងលោកស្រីអ៊ុងសាន ស៊ូជី ដែលមានតាំងពីការរំលោភការសម្ងាត់រដ្ឋ ការនាំចូលអាយកូម និងបន្ថែមបទចោទប្រកាន់ថ្មីទាក់ទងនឹងរឿងប្រព្រឹត្តអំពើពុករលួយ របបសឹកភូមាត្រូវបានក្រុមអង្គការការពារសិទ្ធិមនុស្ស និងក្រុមគាំទ្រលោកស្រីអ៊ុងសាន ស៊ូជី ចោទប្រកាន់ថា កំពុងព្យាយាមរារាំងមិនឲ្យលោកស្រីអ៊ុងសាន ស៊ូជីត្រលប់មកធ្វើនយោបាយ។ ជាមួយបទចោទប្រកាន់ដ៏ច្រើន និងការសម្រេចផ្តន្ទាទោសជាបន្តបន្ទាប់ គេបារម្ភថា លោកស្រីអ៊ុងសាន ស៊ូជី ដែលសព្វថ្ងៃមានអាយុ៧៦ឆ្នាំនឹងត្រូវចំនាយវេលាចុងក្រោយនៃជីវិតរបស់លោកស្រីនៅក្នុងពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ