ហ្វីលីពីនថាអ្នកស្រីស៊ូជីមានសារៈសំខាន់មិនអាចខ្វះបានចំពោះលទ្ធិប្រជាធិបតេយ្យភូមា
អតីតមេដឹកនាំស៊ីវិលអ្នកស្រី អ៊ុងសាន ស៊ូជី មានសារៈសំខាន់ខ្លាំងណាស់មិនអាចខ្វះបានឡើយក្នុងការស្តារលទ្ធិប្រជាធិបតេយ្យរបស់ប្រទេសភូមាឡើងវិញ។ នេះគឺជាការលើកឡើងរបស់រដ្ឋមន្ត្រីការបរទេសហ្វីលីពីន នៅប៉ុន្មានថ្ងៃបន្ទាប់ពីតុលាការភូមាកាត់ទោសដាក់ពន្ធនាគារអ្នកស្រីស៊ូជីបួនឆ្នាំបន្ថែមទៀតក្រោមបទបាននាំចូលអាយកូមខុសច្បាប់។
ចុះផ្សាយនៅថ្ងៃ៖
ម្ចាស់ជ័យលាភីណូបែលសន្តិភាពភូមាអ្នកស្រីស៊ូជី ដែលត្រូវបានឃុំខ្លួនតាំងពីរដ្ឋប្រហារថ្ងៃទី១ ខែកុម្ភៈឆ្នាំមុន ត្រូវបានកាត់ទោសនៅថ្ងៃទី១០ ខែមករាពីបទឧក្រិដ្ឋកម្មចំនួន៣ និងត្រូវបានកាត់ទោសឲ្យជាប់ពន្ធនាគាររយៈពេល ៤ឆ្នាំបន្ថែម។
ក្រោយមកទៀត តុលាការរបបសឹកបានបន្ថែមបទចោទប្រកាន់ចំនួន៥ទៀតប្រឆាំងអ្នកស្រីស៊ូជី ជុំវិញការប្រព្រឹត្តអំពើពុករលួយ ដែលក្នុងនោះមានសំណុំរឿងមួយពាក់ព័ន្ធនឹងការជួល ទិញ និងជួសជុលថែទាំឧទ្ធម្ភាគចក្រមួយគ្រឿង។
ខណៈប្រទេសលោកខាងលិចមួយចំនួនរួមមានអាមេរិក និងន័រវែសជាដើមបានថ្កោលទោសការកាត់ក្តីរបស់តុលាការភូមា មេដឹកនាំអាស៊ីអាគ្នេយ៍វិញនៅស្ងៀមមិនបញ្ចេញប្រតិកម្មអ្វីឡើយ។
តែនៅទីបំផុត រដ្ឋមន្ត្រីការបរទេសហ្វីលីពីនលោក Teodoro Locsin បានបំបែកភាពស្ងៀមស្ងាត់នេះនៅថ្ងៃអាទិត្យ ទី១៦ មករា ដោយលោកបានថ្កោលទោសចំពោះការកាត់ទោសលើអ្នកស្រីអតីតមេដឹកនាំស៊ីវិលវ័យ៧៦ឆ្នាំ ដោយតុលាការរបបយោធា។ សម្រាប់រដ្ឋមន្ត្រីការបរទេសហ្វីលីពីន អ្នកស្រី ស៊ូជី ពិតជាមានសារៈសំខាន់ខ្លាំងណាស់ក្នុងដំណើរឆ្ពោះទៅស្តារលទ្ធិប្រជាធិបតេយ្យភូមា។
ទន្ទឹមនេះ លោកLocsin ក៏បានបង្ហាញជំហរគាំទ្រផងដែរចំពោះដំណើរទស្សនកិច្ចទៅកាន់ប្រទេសភូមាដោយនាយករដ្ឋមន្ត្រីខ្មែរលោកហ៊ុន សែនកាលថ្ងៃទី៧ មករា។ លោក ហ៊ុន សែន ដែលទើបចូលធ្វើជាប្រធានប្តូរវេនអាស៊ាន បានក្លាយជាមេដឹកនាំបរទេសដំបូងគេដែលធ្វើទស្សនកិច្ចទៅភូមាចាប់តាំងពីរដ្ឋប្រហារកាលពីខែកុម្ភៈឆ្នាំទៅមិញ។
ក្រុមអ្នករិះគន់បារម្ភខ្លាចថាដំណើរទស្សនៈកិច្ចរបស់លោកហ៊ុន សែន អាចទៅបញ្ជាក់ភាពស្របច្បាប់របស់របបសឹកភូមា តែរដ្ឋមន្ត្រីការបរទេសហ្វីលីពីនយល់ថាវត្តមានរបស់មេដឹកនាំខ្មែរអាចធ្វើឲ្យមានការរីកចម្រើនទៅមុខក្នុងការដោះស្រាយវិបត្តិនៅភូមា ហើយសមនឹងទទួលបានការគាំទ្រដោយអស់ពីចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ