ព្រះសង្ឃភូមារាប់រយអង្គរត់គេចខ្លួនពីសមរភូមិប្រយុទ្ធគ្នារវាងកងទ័ព និងក្រុមឧទ្ទាម
ការប្រយុទ្ធគ្នាដ៏ខ្លាំងក្លា រវាងកងទ័ពភូមា និងក្រុមឧទ្ទាមជនជាតិភាគតិច នៅរដ្ឋកាយ៉ា ភាគខាងកើតភូមា បានបណ្តាលឲ្យព្រះសង្ឃភូមាជាច្រើនរយអង្គ បានរត់ភៀសខ្លួនចេញពីវត្តអារ៉ាម។ តាមសាក្សីដែលស្រង់សំដីដោយទីភ្នាក់ងារព័ត៌មានបារាំង AFP ព្រះសង្ឃ ជាច្រើនរយអង្គ បានចាកចេញជាមួយប្រជាជនពីក្រុងចំនួន២ ដែលបានក្លាយជាសមរភូមិប្រយុទ្ធគ្នារវាងកងទ័ព និងក្រុមឧទ្ទាម នៅចុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:៤១
នៅក្នុងចំណោមប្រជាជនភូមា ជាង ៥ពាន់នាក់ ដែលបានរត់គេចខ្លួនចេញពីការប្រយុទ្ធគ្នារវាងកងទ័ពភូមា និងក្រុមឧទ្ទាមជនជាតិភាគតិច នៅរដ្ឋកាយ៉ា មានផងដែរ ព្រះសង្ឃភូមារាប់រយអង្គ។ សាក្សីជាព្រះសង្ឃមួយអង្គបានប្រាប់ទីភ្នាក់ងារព័ត៌មានបារាំង កាលពីថ្ងៃអាទិត្យថា នៅទីក្រុងពីរក្នុងរដ្ឋកាយ៉ា ដោយសារការប្រយុទ្ធគ្នាកាន់តែសន្ធោសន្ធៅរវាងកងទ័ព និងក្រុមឧទ្ទាម ព្រះសង្ឃគ្មានជម្រើសអ្វីក្រៅតែពីរត់ភៀសខ្លួនចេញពីវត្តនោះទេ។ តាមសាក្សីខាងលើ នៅទីក្រុងLoikaw Demoso ដែលស្ថិតនៅចម្ងាយតែជាង ២០០គីឡូម៉ែត្រពីរដ្ឋធានី ណៃពីដោរ វត្តអារ៉ាម សរុបជាង ៤០ ត្រូវបោះបង់ចោលស្ងាត់ដូច វាលកប់ខ្មោច។
ព្រះសង្ឃបង្ខំចិត្ត រត់ចេញពីវត្ត ដើម្បីគេចចេញពីការប្រយុទ្ធគ្នាដ៏ហិង្សារវាងកងទ័ព និងក្រុមឧទ្ទាមភាគតិច។ នេះគឺជារឿងមិនធម្មតានៅប្រទេសភូមា ជាទី ដែលព្រះសង្ឃ ត្រូវគេគោរពបូជាខ្លាំង ចំណែកវត្តអារ៉ាម ត្រូវគេចាត់ទុកទីកន្លែងដ៏សក្ការៈខ្ពង់ខ្ពស់។
តាមប៉ូលិសមូលដ្ឋានភូមា ទីក្រុងបានស្ងាត់បាត់មនុស្ស។ ស្ថានភាពកាន់តែស្មុគស្មាញ ព្រោះថា ក្រុមឧទ្ទាម ដែលមានការគាំទ្រ ពីចលនាប្រដាប់អាវុធ ប្រឆាំងរដ្ឋប្រហារយោធាភូមា បានចូលតាំងទីនៅតាមវត្ត វិហារ និងផ្ទះសម្បែងរបស់ប្រជាជន។ នៅប៉ុន្មានថ្ងៃមកនេះ ទីក្រុងទាំងពីរ បានក្លាយជាសមរភូមិប្រយុទ្ធគ្នាដ៏ហិង្សា បន្ទាប់ពីកងទ័ព បានបើកការវាយប្រហារតាមផ្លូវអាកាស និងបាញ់គ្រាប់ផ្លោងសំដៅទីតាំងជម្រករបស់ក្រុមឧទ្ទាម។
តាមការវាយតម្លៃរបស់អង្គការសហប្រជាជាតិ មានប្រជាជនជាង ៩ម៉ឺននាក់ បានរត់គេចខ្លួនចេញពីការប្រយុទ្ធគ្នានៅរដ្ឋកាយ៉ា ប៉ុន្តែ កាសែតក្នុងស្រុកភូមាវិញរាប់ឃើញមានមនុស្ស ជិត២សែននាក់ ដែលរត់ផ្លាស់ទី ដោយសារការប្រយុទ្ធគ្នា។
នៅសប្តាហ៍មុន អ្នករាយការណ៍ពិសេសរបស់អង្គការសហប្រជាជាតិសម្រាប់សំណុំរឿងភូមា ធ្លាប់បានអំពាវនាវឲ្យមេដឹកនាំរបបសឹកលោកមីន អ៊ុងឡាំងបញ្ឈប់ជាបន្ទាន់ការវាយប្រហារតាមផ្លូវអាកាស និងបើកផ្លូវឲ្យមនុស្សរត់គេចពីកន្លែងគ្រោះថ្នាក់។
ចាប់តាំងពីមានរដ្ឋប្រហារទម្លាក់រដ្ឋាភិបាលរបស់លោកស្រី អ៊ុងសាន ស៊ូជី ដែលត្រូវរបបសឹកចាប់ឃុំខ្លួន និងកាត់ទោសឲ្យជាប់ពន្ធានាគារ សរុប ៦ឆ្នាំ ចលនាប្រឆាំងនឹងការធ្វើរដ្ឋប្រហាររបស់យោធាភូមា បានចាប់កាន់អាវុធ ចូលប្រយុទ្ធកៀកស្មាជាមួយក្រុមឧទ្ទាមភាគតិច ដែលធ្លាប់ជាសត្រូវរបស់កងទ័ពភូមា។
នៅក្នុងជំនួបវីដេអូ ជាមួយនាយករដ្ឋមន្រ្តីសិង្ហបុរី កាលពីថ្ងៃសុក្រ នាយករដ្ឋមន្រ្តីកម្ពុជា ដែលបានធ្វើដំណើរទៅជួបមេដឹកនាំរបបសឹក លោកមីន អ៊ុងឡាំង នៅទីក្រុងណៃពីដោរ បានលើកសំណើមួយចំនួនដើម្បី រៀបចំឲ្យមានបទឈប់បាញ់នៅភូមា ពោលគឺនៅបន្ទាប់ពី មេដឹកនាំយោធាភូមាបានប្រកាសពន្យារបទឈប់បាញ់ជាមួយក្រុមប្រដាប់អាវុធ រហូតដល់ចុងឆ្នាំ ២០២២។
តាមសេចក្តីប្រកាសព័ត៌មានរបស់រដ្ឋាភិបាលសិង្ហបុរី ដែលចុះផ្សាយដោយទីភ្នាក់ងារព័ត៌មានReuters នាយករដ្ឋមន្រ្តីសិង្ហបុរី មិនប្រឆាំងនឹងគំនិតរបស់កម្ពុជា ប៉ុន្តែ សម្រាប់លោក វាស្មុគស្មាញ ព្រោះថា គេនៅតែមិនអាចចូលទៅជួបពិភាក្សាជាមួយគ្រប់ភាគី។
តាមលោក លី ស៊ានឡុង មេដឹកនាំយោធាភូមាបានសន្យានាំសន្តិភាពឲ្យភូមា ប៉ុន្តែ ជាមួយ គ្នានោះ កងទ័ពភូមានៅតែបន្តវាយប្រហារទៅលើអ្នកនយោបាយប្រឆាំង និងចាប់ខ្លួន កាត់ទោស ដាក់ពន្ធនាគារ លោកស្រីអ៊ុងសាន ស៊ូជី។
ប្រមុខរដ្ឋាភិបាលសិង្ហបុរីបាននិយាយប្រាប់នាយករដ្ឋមន្រ្តីកម្ពុជា ដែរថា រាល់ការពិភាក្សាទាក់ទងនឹងភូមា គេចាំបាច់ត្រូវរាប់បញ្ចូល គ្រប់ភាគី ដែលក្នុងនោះមានផងដែរ លោកស្រីអ៊ុងសាន ស៊ូជី។ នាយករដ្ឋមន្រ្តីសិង្ហបុរីបានបញ្ជាក់ដែរថា លោកនៅបន្តគាំទ្រឲ្យគេផាត់មេដឹកនាំរបបសឹកភូមា ពីកិច្ចប្រជុំអាស៊ាន រហូតដល់ថ្ងៃដែលរបបសឹកយល់ព្រមអនុវតផែនការស្តារសន្តិភាពនៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ