ភូមា មានការប្រយុទ្ធគ្នាជាថ្មីរវាងកងកម្លាំងរដ្ឋាភិបាលនិងឧទ្ទាមនៅរដ្ឋរ៉ាឃីន
ការប្រយុទ្ធគ្នានៅរដ្ឋរ៉ាឃីន ឬតំបន់អារ៉ាខាន រវាងកងកម្លាំងរដ្ឋាភិបាលយោធាភូមា និងក្រុមឧទ្ទាម បានផ្ទុះឡើងនៅថ្ងៃសុក្រទី ៤កុម្ភៈ សប្តាហ៍មុន។ ហេតុការណ៍ថ្មីនេះ ផ្ទុះឡើងតែប៉ុន្មានថ្ងៃ ក្រោយពី ក្រុមប្រឹក្សាសន្តិសុខអង្គការសហប្រជាជាតិ បានអនុម័តជាឯកច្ឆ័ន្ទលើសេចក្តីសម្រេចចិត្តមួយអំពាវនាវឱ្យភូមាបញ្ឈប់រាល់គ្រប់ទម្រង់នៃអំពើហិង្សា។
ចុះផ្សាយនៅថ្ងៃ៖
ស្តាប់ - ០១:៥៨
ក្រុមប្រដាប់អាវុធអារ៉ាខាន ជាកងកម្លាំងឧទ្ទាម ដ៏ខ្លាំងជាងគេបំផុតមួយនៅក្នុងប្រទេសភូមា ដែលបានកាន់អាវុធតស៊ូតាំងពីជាច្រើនទសវត្សរ៍មកហើយ ដើម្បីទាមទារស្វ័យភាព ជូនប្រជាពលរដ្ឋក្នុងតំបន់ឱ្យបានកាន់តែច្រើន។
នៅខែវិច្ឆិកា២០២០ តាម៉ាដាវ កងកម្លាំងយោធារដ្ឋាភិបាល បានចុះកិច្ចព្រមព្រៀងឈប់បាញ់ជាមួយកងកម្លាំងឧទ្ទាមអារ៉ាខាន ពោលគឺមុនរដ្ឋប្រហារទម្លាក់រដ្ឋាភិបាលស៊ីវិលបន្តិច ដែលជាអ្នកផ្តួចផ្តើមកិច្ចសន្យាឈប់បាញ់នេះ។
ក្រោយរដ្ឋប្រហារ តំបន់ភាគខាងលិចនេះប្រទេសហាក់មានសភាពស្ងប់ស្ងាត់ជាងគេ ប៉ុន្តែនៅថ្ងៃសុក្រទី ៤កុម្ភៈ ស្រាប់តែកងកម្លាំងយោធា តាម៉ាដាវ បានជ្រៀតចូលទៅក្នុងមូលដ្ឋានទ័ពឧទ្ទាមអារ៉ាខាន ត្រង់ចំណុចជាប់ព្រំដែនជាមួយបង់ក្លាដែស ហើយការប្រយុទ្ធគ្នាក៏បានផ្ទុះឡើងមួយប្រាវរយៈពេលប្រមាណបីម៉ោង។ សមាជិកនៃកងយុទ្ធជនអារ៉ាខានម្នាក់បានស្លាប់។ ភាពតានតឹងយោធាអាចផ្ទុះរាលដាលបានគ្រប់វេលា។ នេះបើតាមអ្នកនាំពាក្យរបស់ក្រុមឧទ្ទាម ដោយសុំមិនបញ្ចេញឈ្មោះ។
លោក Zaw min Tun អ្នកនាំពាក្យរដ្ឋាភិបាលសឹកភូមាវិញ បានបញ្ជាក់ព័ត៌មានថាពិតជាមានការប្រយុទ្ធគ្នានៅតំបន់រ៉ាឃីនមែន ហើយកងកម្លាំងយោធាតាម៉ាដាវជាច្រើននាក់បានស្លាប់និងរងរបួស ប៉ុន្តែជាការវាយប្រហារបង្កឡើងដោយពួកបះបោរប្រដាប់អាវុធរ៉ូហ៊ីងយ៉ា។ រដ្ឋាភិបាលកំពុងធ្វើអង្កេតរកមូលហេតុនៃវត្តមានរបស់កងកម្លាំងអារ៉ាខាន។ នេះបើតាមសេចក្តី ប្រកាសរបស់អ្នកនាំពាក្យរដ្ឋាភិបាលដដែល។
សូមបញ្ជាក់ថា គឺនៅក្នុងរដ្ឋរ៉ាឃីននេះហើយដែលកាលពីឆ្នាំ២០១៧ កងកម្លាំងយោធាភូមាបានបើកប្រតិបត្តិការប្រឆាំងជនជាតិភាគតិចកាន់សាសនាអ៊ីស្លាម រ៉ូហ៊ីងយ៉ា យ៉ាងសន្ធោសន្ធៅនោះ។ ហេតុការណ៍នេះបានជំរុញឱ្យជនជាតិរ៉ូហ៊ីងយ៉ា ជាង៧សែននាក់បានរត់ភៀសខ្លួនទៅបង់ក្លាដែស និងត្រូវបានអង្គការសហប្រជាជាតិបើកអង្កេតពីបទប្រល័យពូជសាសន៍ផង។ នៅឆ្នាំ២០១៩-២០២០ មានការប្រយុទ្ធតតាំងគ្នាយ៉ាងសន្ធាប់រវាងកងយុទ្ធជនឧទ្ទាមអារ៉ាខាន និងកងកម្លាំងយោធាភូមា។ ប្រជាពលរដ្ឋក្នុងតំបន់ប្រមាណ២សែនត្រូវធ្វើបំលាស់ទី។ សម្រាប់អង្គការក្រៅរដ្ឋាភិបាល អំពើហិង្សានេះអាចចាត់ទុកបានថាជាឧក្រិដ្ឋកម្មសង្គ្រាម។ បន្ថែមពីលើនេះ ភូមាត្រូវរងអំពើហិង្សា ក្រោយរដ្ឋប្រហារដែលបណ្តាលឱ្យជនស៊ីវិលជាង១៥០០នាក់បាត់បង់ជីវិត ៩ពាន់នាក់ជាប់ឃុំឃាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ