ថៃអាចនឹងរៀបចំបោះឆ្នោតមុនកាលកំណត់ដោយសារការបែកបាក់ផ្ទៃក្នុង
ការបែកបាក់ផ្ទៃក្នុងកំពុងបង្កជាភាពស្មុគស្មាញខ្លាំងដល់លោកនាយករដ្ឋមន្ត្រីថៃ ប្រាយុទ្ធ ចាន់អូចា។ នៅថ្ងៃព្រហស្បតិ៍ ១៧មីនានេះ លោកប្រាយុទ្ធបើកកិច្ចពិភាក្សាជាមួយនឹងមេដឹកនាំគណបក្សផ្សេងទៀតក្នុងជួររដ្ឋាភិបាលចម្រុះថៃ ដើម្បីដោះស្រាយវិបត្តិផ្ទៃក្នុងដែលកំពុងរីកធំឡើង និងដែលអាចនាំឲ្យមានការបោះឆ្នោតមុនអាណត្តិ។
ចុះផ្សាយនៅថ្ងៃ៖
ស្តាប់ - ០២:១៤
លោកនាយករដ្ឋមន្ត្រីថៃ ប្រាយុទ្ធ ចាន់អូចាដែលកំពុងរងការរិះគន់ខ្លាំងលើចំណាត់ការគ្រប់គ្រងជំងឺកូវីដ១៩មិនបានល្អនោះ ឥឡូវនេះត្រូវមកប្រឈមនឹងវិបត្តិថ្មីមួយទៀតគឺការបែកបាក់ផ្ទៃក្នុង នៃជួររដ្ឋាភិបាលចម្រុះរបស់លោក។
កាលពីថ្ងៃអង្គារម្សិលម្ង៉ៃ ឧបនាយករដ្ឋមន្ត្រីថៃលោក Prawit Wongsuwan និយាយថាប្រទេសថៃ អាចនឹងរៀបចំការបោះឆ្នោតមុនកាលកំណត់ក្នុងខែវិច្ឆិកាខាងមុខ បន្ទាប់ពីបញ្ចប់ការធ្វើជាម្ចាស់ផ្ទះរៀបចំកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកហៅកាត់ថា APEC។
លោក Prawit ដែលជាអតីតមេទ័ពថៃនិងជាអ្នករាជានិយមដ៏មានឥទ្ធិពលមួយរូបបានប្រាប់ក្រុមអ្នកយកព័ត៌មានថាលោកបានជួបមេដឹកនាំមួយចំនួនក្នុងជួររដ្ឋាភិបាលចម្រុះដែលមានគណបក្សចំនួន ១៧កាលពីថ្ងៃចន្ទដើម្បីស្នើសុំរំលាយសភាបន្ទាប់ពីកិច្ចប្រជុំ APEC។ យ៉ាងណារំលាយសភាឬក៏អត់នោះគឺអាស្រ័យលើនាយករដ្ឋមន្ត្រី។ លោក Prawit បន្ថែម។
ថ្លែងបន្ទាប់ពីការលើកឡើងរបស់ឧបនាយករដ្ឋមន្ត្រី Prawit លោក ប្រាយុទ្ធ បានបដិសេធមិនធ្វើអត្ថាធិប្បាយអ្វីឡើយអំពីកាលបរិច្ឆេទនៃការបោះឆ្នោតដែលអាចកើតមានមុនកាលកំណត់។
សម្រាប់ក្រុមអ្នកវិភាគ ប្រសិនបើមានការរៀបចំបោះឆ្នោតមុនអាណត្តិមែន នោះវាមិនមែនជារឿងល្អឡើយសម្រាប់លោក ប្រាយុទ្ធ ចាន់អូចា។ “ប្រជាជនថៃជាច្រើនចង់ឃើញឧត្តមសេនីយប្រាយុទ្ធ ខ្ទាតចេញពីតំណែងនាយករដ្ឋមន្ត្រីថៃ”។ នេះបើតាមសម្តីរបស់លោក Thitinan Pongsudhirak ដែលជាសាស្ត្រាចារ្យម្នាក់នៅសាកលវិទ្យាល័យ Chulalongkorn ទីក្រុងបាងកក។
គួររំឭកថា អាណត្តិដឹកនាំប្រទេសរបស់លោក ប្រាយុទ្ធ នឹងបញ្ចប់នៅខែមីនា ឆ្នាំ២០២៣ខាងមុខ។ ទោះបីជាមិនបានអត្ថាធិប្បាយអ្វីជុំវិញរឿងបោះឆ្នោតមុនកាលកំណត់ក្តី តែការបើកកិច្ចពិភាក្សាជាមួយមេដឹកនាំផ្សេងទៀតក្នុងជួរដ្ឋាភិបាលចម្រុះ គឺជាសញ្ញាបង្ហាញថាលោក ប្រយុទ្ធ កំពុងខិតខំដោះស្រាយការបែកបាក់ផ្ទៃក្នុងដែលកំពុងរីកធំឡើង និងដែលអាចនាំឲ្យមានការបោះឆ្នោតមុនអាណត្តិនៅក្នុងប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ