មនុស្ស៤នាក់ស្លាប់ និងរាប់សិបនាក់របួសក្នុងគ្រោះរញ្ជួយដីនៅជប៉ុន
នៅក្នុងប្រទេសជប៉ុន មនុស្ស ៤នាក់បានស្លាប់និងជាង ១០០នាក់រងរបួសបន្ទាប់ពីគ្រោះរញ្ជួយដីដ៏ខ្លាំងបានវាយប្រហារផ្នែកជាច្រើននៃឆ្នេរភាគខាងកើតទីក្រុងហ្វូគូស្ហ៊ីម៉ា (Fukushima) កាលពីយប់ថ្ងៃពុធ ១៦មីនាម្សិលមិញ។ គ្រោះរញ្ជួយដីដ៏ធំនេះក៏បានរុញច្រានផងដែរឲ្យអាជ្ញាធរជប៉ុនទាញសញ្ញាអាសន្នពីរលកយក្សស៊ូណាមី។
ចុះផ្សាយនៅថ្ងៃ៖
គ្រោះរញ្ជួយដីកម្រិត ៧,៤រ៉ិចទ័រនៅឯឆ្នេរសមុទ្រនៃទីក្រុងហ្វូគូស្ហ៊ីម៉ាបានធ្វើរថភ្លើងធ្លាក់ចេញពីផ្លូវ ផ្លូវ highways បែកមានស្នាមប្រេះ ហើយផលិតផលទំនិញនៅក្នុងហាងជាច្រើនធ្លាក់បែកខ្ទាត់ខ្ទាយ។ យ៉ាងណាក៏ដោយ អគ្គិសនីត្រូវបានតភ្ជាប់វិញហើយសម្រាប់ប្រជាជនជប៉ុនរាប់ពាន់នាក់ដែលរស់នៅទីនោះ។
ចំណែកការទាញសញ្ញាអាសន្នពីរលកយក្សស៊ូណាមិវិញក៏ត្រូវបានអាជ្ញាធរជប៉ុនលុបចោលវិញហើយដែរនៅថ្ងៃព្រហស្បតិ៍នេះ បន្ទាប់ពីកត់ត្រារកឃើញាថាកម្រិតកម្ពស់ទឹកមិនស្ថិតក្នុងស្ថានភាពគ្រោះថ្នាក់។
គួរជ្រាបថា គ្រោះរញ្ជួយដីនៅតំបន់ឆ្នេរប៉ែកខាងកើតជប៉ុននៅពេលនេះបានកើតឡើង នៅប៉ុន្មានថ្ងៃប៉ុណ្ណោះបន្ទាប់ពីជប៉ុនរំឭកឡើងវិញនូវការចងចាំពីគ្រោះរញ្ជួយដី រលកយក្សស៊ូណាមី និងគ្រោះមហន្តរាយនុយក្លេអ៊ែរក្នុងតំបន់កាលពី ១១ឆ្នាំមុន។
គ្រោះរញ្ជួយដីបានបន្តវាយប្រហារតំបន់ខ្លះទៀតក្នុងក្រុងហ្វូគូស្ហ៊ីម៉ានៅព្រឹកថ្ងៃព្រហស្បតិ៍នេះ ប៉ុន្តែមិនបង្កជាគ្រោះថ្នាក់ធំដុំឡើយ។ គ្មានការខូចខាតច្រើននោះទេ ហើយមន្ត្រីជំនាញជប៉ុនបាននិយាយថាក៏មិនមានដែរភាពខុសប្រក្រតីនៅរោងចក្រនុយក្លេអ៊ែរ។
ទាក់ទងរឿងនេះ អ្នកនាំពាក្យរដ្ឋាភិបាលជប៉ុនលោក Hirokazu Matsuno បាននិយាយថាមានមនុស្ស ៤នាក់ត្រូវបានរាយការណ៍ថាស្លាប់ ហើយមានមនុស្ស ១០៤ផ្សេងទៀតរងរបួស។
គួរបញ្ជាក់ថា គ្រោះរញ្ជួយដីបានវាយប្រហារឆ្នេរភាគខាងកើតក្ក្រុងហ្វូគូស្ហ៊ីម៉ាកាលពីថ្ងៃពុធម្សិលមិញនៅវេលាម៉ោងប្រមាណ ១១កន្លះយប់ ក្នុងជម្រៅប្រមាណ ៦០គីឡូម៉ែត្រ ដោយផ្តើមពីកម្រិត ៦,១ រ៉ិចទ័រ។
ប្រទេសជប៉ុនជារឿយៗរងការវាយប្រហារដោយគ្រោះរញ្ជួយដី ប៉ុន្តែគ្រោះថ្នាក់ដ៏ធំដែលនៅតែស្ថិតក្នុងការចងចាំរបស់ប្រជាជនជប៉ុនជាប់ជានិច្ចគឺគ្រោះថ្នាក់ដ៏មហន្តរាយកាលពីឆ្នាំ ២០១១ដែលបានបណ្តាលឲ្យមនុស្សប្រមាណ ១៨ ៥០០នាក់ស្លាប់ឬបាត់ខ្លួន និងដែលភាគច្រើននៅក្នុងរលកយក្សស៊ូណាមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ