ប្រជាជនជប៉ុនកំពុងព្រួយបារម្ភពីការបំភិតបំភ័យផ្លូវយោធាពីប្រទេសរុស្ស៊ី
ខណៈដែលសង្រ្គាមរុស្ស៊ីឈ្លានពានអ៊ុយក្រែនកំពុងបន្តមាន និងចំពេលដែលពិភពលោកទាំងមូលកំពុងផ្តោតចក្ខុលើសង្រ្គាមមួយនេះ ប្រទេសរុស្ស៊ីក៏កំពុងបន្តការបំភិតបំភ័យផ្លូវយោធាលើប្រទេសជប៉ុនដែរ។ ក្នុងរយៈពេលប៉ុន្មានសប្តាហ៍ចុងក្រោយនេះ កងទ័ពរុស្ស៊ីបានធ្វើសមយុទ្ធទ្រង់ទ្រាយធំមិនធ្លាប់មាននៅក្បែរប្រជុំកោះគូរីល។ រូបភាពបំភិតបំភ័យពីកងទ័ពរុស្ស៊ីនេះបានបង្កឲ្យមានក្តីបារម្ភដល់ប្រជាជនជប៉ុនដែលខ្លាចរងការវាយប្រហារពីរុស្ស៊ីដូចអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
រវាងប្រទេសរុស្ស៊ី និងប្រទេសជប៉ុន ភាពតានតឹងដែលកំពុងមានស្រាប់កំពុងឡើងកម្តៅថែមទៀតពីមួយថ្ងៃទៅមួយថ្ងៃ។ មិនដល់មួយខែផង កងទ័ពរុស្ស៊ីបានធ្វើសមយុទ្ធទ្រង់ទ្រាយធំមិនធ្លាប់មានលើកទី៣ នៅក្បែរប្រជុំកោះគូរីលដែលមានចម្ងាយតែប៉ុន្មានគីឡូម៉ែត្រប៉ុណ្ណោះពីកោះហុកកៃដូ។ ទន្ទឹមគ្នានេះ ការដាក់សម្ពាធពីកងទ័ពរុស្ស៊ីក៏មាននៅក្នុងសមុទ្រជប៉ុនដែរ។ កាលពីថ្ងៃព្រហស្បតិ៍ ទី១៤ មេសាថ្មីៗនេះ កងទ័ពរុស្ស៊ីបានបាញ់គ្រាប់មីស៊ីលចម្ងាយឆ្ងាយដូចដែលខ្លួនធ្លាប់បានធ្វើនាដំណាច់ខែកុម្ភៈ។
ទង្វើរបៀបនេះរបស់រុស្ស៊ីបានធ្វើឲ្យប្រជាជនជប៉ុនរស់ក្នុងទីក្រុងតូក្យូព្រួយបារម្ភជាពន់ពេក។ « ចាប់ពីពេលនេះតទៅ រុស្ស៊ីចាត់ទុកជប៉ុនដូចប្រទេសអមិត្តមួយ។ យូរ ឬឆាប់ យើងនឹងរងគ្រោះនៅថ្ងៃណាមួយ។ នៅពេលខ្ញុំឃើញអ៊ុយក្រែនខ្ទេចខ្ទីរដោយគ្រាប់បែក គ្រាប់មីស៊ីល ខ្ញុំនិយាយខ្លួនឯងថា បើគ្រាប់មីស៊ីលរុស្ស៊ីធ្លាក់លើក្រុងជប៉ុនដែលមានមនុស្សរស់នៅច្រើន វានឹងមានមនុស្សស្លាប់ច្រើន។ ខ្ញុំបារម្ភខ្លាំងណាស់ » នេះជាចំណាប់អារម្មណ៍របស់អ្នករស់ក្នុងទីក្រុងតូក្យូម្នាក់។
« ទាំងអស់នេះធ្វើឲ្យខ្ញុំភ័យខ្លាច។ គេនិយាយច្រើនថា ចិនអាចចូលឈ្លានពានតៃវ៉ាន់នៅថ្ងៃណាមួយ តែខ្ញុំ ខ្ញុំបានសួរខ្លួនឯងច្រើនដងថា មុននឹងចិនឈ្លានពានតៃវ៉ាន់ តើមិនមែនជប៉ុនទេឬដែលនឹងរងការវាយប្រហារពីរុស្ស៊ីមុនគេ » នេះជាការបន្ថែមរបស់អ្នករស់ក្នុងទីក្រុងតូក្យូដដែល។ បើតាមក្រុមអ្នកជំនាញ មានយន្តហោះប្រដេញ ទម្លាក់គ្រាប់បែកយ៉ាងតិច ៣២០គ្រឿង នាវាពិឃាត និងនាវាមុជទឹកដើរដោយនុយក្លេអ៊ែរសរុបចំនួន ២៦០គ្រឿងត្រូវបានរុស្ស៊ីបញ្ជូនទៅដាក់ក្បែរប្រទេសជប៉ុន។
នាយករដ្ឋមន្រ្តីជប៉ុនលោកហ៊្វូមីអូ គីស្ហ៊ីដាបានសម្តែងក្តីបារម្ភយ៉ាងខ្លាំង។ តែលោកបដិសេធមិនព្រមឱនក្បាលនៅចំពោះមុខការបំភិតបំភ័យម្តងហើយម្តងទៀតរបស់រុស្ស៊ីទេ។ គួរបញ្ជាក់ថា ជប៉ុន និងរស្ស៊ីកំពុងបន្តមានជម្លោះដណ្តើមប្រជុំកោះគូរីល។ តែគេមិនត្រូវភ្លេចនិយាយទេថា នៅក្នុងសង្រ្គាមរុស្ស៊ីឈ្លានពានអ៊ុយក្រែន ជប៉ុនបានចូលរួមដាក់ទណ្ឌកម្មរុស្ស៊ីជាមួយបស្ចិមលោក។ តើទង្វើរបស់ជប៉ុននេះឬដែលបានធ្វើឲ្យរុស្ស៊ីដំឡើងសាច់ដុំដាក់ជប៉ុនកាន់តែធំនៅពេលនេះ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ