ជប៉ុនដំឡើងសំឡេង និងចោទរុស្ស៊ី ថាក្រសោបយកកោះគូរីល ដោយខុសច្បាប់
តាំងពីផ្ទុះសង្គ្រាមនៅអ៊ុយក្រែនមក ទំនាក់ទំនងរុស្ស៊ីជប៉ុន ធ្លាក់ចុះដុនដាបជាលំដាប់ ព្រោះជប៉ុនគាំទ្រទណ្ឌកម្មរបស់ក្រុមបស្ចិមលោក។ ទំនាក់ទំនងការទូតមិនល្អ ជម្លោះចាស់ក៏រើឡើងវិញ។ នៅក្នុងការចេញផ្សាយសៀវភៅខៀវប្រចាំឆ្នាំរបស់ក្រសួងការបរទេសជប៉ុន តូក្យូ បានចោទមូស្គូ ថាបានចាប់យកកោះ គួរីល ដែលសហភាពសូវៀតធ្លាប់ចូលឈ្លានពានកាលពីសង្គ្រាមលោកលើកទីពីត មកជាធ្វើជាដែនដីរណបរបស់ខ្លួនដោយខុសច្បាប់។
ចុះផ្សាយនៅថ្ងៃ៖
ស្តាប់ - ០២:០០
កោះគួរីល Kouriles ដែលជាប្រជុំកូនកោះភ្នំភ្លើងតូចៗចំនួន បួន ជាដែនដីរបស់ជប៉ុន ដែលរងការត្រួតត្រាដោយខុសច្បាប់ ពីសំណាក់រុស្ស៊ី។ នេះជាសំណេរជាលាយលក្ខណ៍អក្សរ ក្នុងរបាយការណ៍ប្រចាំឆ្នាំរបស់ក្រសួងការបរទេសជប៉ុន ឬហៅថាសៀវភៅខៀវ ចេញផ្សាយនៅថ្ងៃសុក្រទី ២២មេសា២០២២។ នេះជាលើកទីមួយគិតចាប់តាំងពី២០ឆ្នាំមក ដែលជប៉ុនដំឡើងសំដី និងចោទប្រកាន់រុស្ស៊ីយ៉ាងដូច្នេះ។
សូមរំលឹកថា ប្រជុំកោះគួរីល ដែលជាដែនដីខាងជើង បើហៅតាមជប៉ុន ត្រូវបានក្រុមយោធាសូវៀត ចូលកាន់កាប់ ក្នុងថ្ងៃចុងក្រោយនៃសង្គ្រាមលោកលើកទីពីរ។ នៅជាប់កោះហុកៃដូ និងជាកោះគ្មានមនុស្សរស់នៅសោះ តាំងពីឆ្នាំ១៩៤៥មក កោះគួរីល ស្ថិតក្រោមការគ្រប់គ្រងរដ្ឋបាលរបស់រុស្ស៊ី ប៉ុន្តែជាបូរណភាពដែនដីរបស់ជប៉ុន។ ក្រោយសង្គ្រាមលោក ដោយហេតុតែជម្លោះដណ្តើមប្រជុំកោះនេះ ជប៉ុននិងរុស្ស៊ីមិនបានចុះកិច្ចព្រមព្រៀងសន្តិភាពគ្នាទេ។
កោះគូរីល ជាប្រភពជម្លោះដែនដីរវាងជប៉ុននិងរុស្ស៊ីយ៉ាងរ៉ាំរ៉ៃ។ ហើយសង្គ្រាមរវាងរុស្ស៊ីនិងអ៊ុយក្រែន បានធ្វើស្ថានភាពជម្លោះកាន់តែធ្លាក់អាក្រក់។ បើតាមការអះអាងរបស់ក្រសួងការបរទេសជប៉ុនដដែល តាំងពីខែមីនា២០២២មក មូស្គូ កាត់ផ្តាច់រាល់គ្រប់ជំនួបចរចា ដើម្បីស្វែងរកសន្ធិសញ្ញាសន្តិភាពទ្វេភាគី ជាមួយជប៉ុនដែលបានគាំទ្រក្រុមលោកខាងលិច ក្នុងការដាក់ទណ្ឌកម្មប្រឆាំងនឹងរុស្ស៊ី។ ជប៉ុនថែមទាំងបានសម្រេចចិត្តកាលពីដើមខែមេសា ឈប់នាំចូលធ្យូងថ្មពីរុស្ស៊ីទៀត។ សម្រាប់រុស្ស៊ី ជប៉ុនបានក្លាយជាប្រទេសអមិត្តដែលចង់បំផ្លាញផលប្រយោជន៍រុស្ស៊ី ដូច្នេះរុស្ស៊ីមិនអាចពិភាក្សាជាមួយបានជាដាច់ខាត។
ផ្ទុយទៅវិញ ជប៉ុនបានបន្ទន់ឥរិយាបថជាមួយចិន។ នៅក្នុងសៀវភៅខៀវប្រចាំឆ្នាំ ជប៉ុនបានគូសបញ្ជាក់អំពីភាពសំខាន់នៃស្តារទំនាក់ទំនងជប៉ុនចិន ឱ្យមានលក្ខណៈស្ថាបនានិងចីរភាព ដោយគ្រាន់តែបានសម្តែងការព្រួយបារម្ភបន្តិចបន្តួច ទាក់ទងនឹងមហិច្ឆតាចិនដែលចង់ប្តូរផ្លាស់ស្ថានភាពនៅក្នុងសមុទ្ទចិនខាងកើតនិងខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ