ប្រធានាធិបតីស្រីលង្ការត់ចោលគេហដ្ឋាន នៅមុនការសម្រុកចូលរបស់ក្រុមបាតុករ
ស្រីលង្កាកាន់តែលង់ជ្រៅក្នុងវិបត្តិនយោបាយ និងសេដ្ឋកិច្ច។ ប្រឈមនឹងកំហឹងតវ៉ារបស់ក្រុមបាតុករ ប្រធានាធិបតីស្រីលង្កា លោកហ្គោតាបាយ៉ា រ៉ាចាប៉ាក់សេបានរត់ភៀសខ្លួនចេញពីគេហដ្ឋាន នៅមុនការសម្រុកចូលរបស់ក្រុមបាតុករប្រឆាំងរដ្ឋាភិបាល។ ទូរទស្សន៍ជាតិស្រីលង្កា បានបង្ហាញបាតុករស្រីលង្ការាប់រយនាក់ ឡើងផ្លោះរបង សម្រុកចូលវិមានប្រធានាធិបតី និងក្រសួងហិរញ្ញវត្ថុ នៅថ្ងៃសៅរ៍ទី ៩កក្កដានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
គេហដ្ឋានរបស់ប្រធានាធិបតីស្រីលង្កានៅទីក្រុងកូឡុំបូ ត្រូវក្រុមបាតុករស្រីលង្ការាប់រយនាក់ សម្រុកចូល លុកលុយពេញទី នៅថ្ងៃសៅរ៍នេះ នៅក្រោមក្រសែភ្នែកឈរមើលរបស់ក្រុមប៉ូលិស និងកងកម្លាំងប្រដាប់អាវុធ ដែលទប់លែងជាប់ក្រុមបាតុករដ៏មានកំហឹង។
តាមប្រភពកងទ័ពស្រីលង្កាដែលដកស្រង់សំដី ដោយទីភ្នាក់ងារព័ត៌មានបារាំង AFP លោកប្រធានាធិបតីហ្គោតាបាយ៉ា រ៉ាចាប៉ាក់សេ ត្រូវបានជម្លៀសចេញពីគេហដ្ឋាន ទៅកាន់កន្លែងមានសុវត្ថិភាព តាំងពីថ្ងៃសុក្រ បន្ទាប់ពី ក្រុមបាតុករបានប្រកាសលើកគ្នាសម្រុកចូលគេហដ្ឋានរបស់ប្រធានាធិបតី នៅចុងសប្តាហ៍នេះ។
នៅថ្ងៃសុក្រ ប៉ូលិសបានប្រកាសដាក់បម្រាមគោចរ ដើម្បីទប់ស្កាត់គម្រោងធ្វើបាតុកម្មប្រឆាំងរដ្ឋាភិបាល នៅរដ្ឋធានីកូឡុំបូ។ ប៉ុន្តែ បម្រាមគោចររបស់ប៉ូលិសត្រូវលុបចោលទៅវិញ នៅបន្ទាប់ពី បក្សប្រឆាំង សកម្មជនការពារសិទ្ធិមនុស្ស និងចៅក្រមព្រមានដាក់ពាក្យប្តឹងមេប៉ូលិសស្រីលង្កា។ ប្រជាជនស្រីលង្កាទៀតសោតបានផ្គើនបម្រាមគោចររបស់រដ្ឋាភិបាល ដោយបានចាប់បង្ខំឲ្យរថភ្លើងដឹកពួកគេទៅធ្វើបាតុកម្មនៅទីក្រុងកូឡុំបូ។ នៅថ្ងៃសៅរ៍ ទូរទស្សន៍ស្រីលង្កាបានបង្ហាញបាតុកររាប់ពាន់នាក់រុញ បំប៉ើងរបាំងរនាំងរបស់ប៉ូលិស ដើម្បីសម្រុកចូលក្នុងក្រសួងហិរញ្ញវត្ថុ។
អាជ្ញាធរស្រីលង្កាបានប្រកាសពង្រាយទាហាន និងប៉ូលិស ជិត ២ម៉ឺននាក់ ដើម្បី ធានារក្សាសន្តិសុខឲ្យប្រធានាធិបតី លោកហ្គោតាបាយ៉ា រ៉ាចាប៉ាក់សេ ដែលក្រុមបាតុករទាមទារឲ្យចុះចេញពីតំណែង ក្នុងបទចោទប្រកាន់ថា ជាអ្នកទទួលខុសត្រូវលើវិបត្តិសេដ្ឋកិច្ច វិបត្តិទំនិញឡើងថ្លៃ និងការខ្វះខាតប្រេងប្រើប្រាស់ នៅក្នុងប្រទេស។
តាមសេចក្តីថ្លែងការណ៍ របស់រដ្ឋាភិបាល នាយករដ្ឋមន្រ្តីថ្មីរបស់ស្រីលង្កា ដែលកំពុងស្ថិតក្រោមការយាមការពារសុវត្ថិភាពរបស់កងទ័ពបានកោះប្រជុំបន្ទាន់គណៈរដ្ឋមន្រ្តី និងទាមទារឲ្យសភាបើកការប្រជុំបន្ទាន់ដែរ នៅថ្ងៃសៅរ៍នេះ ដើម្បីរកដំណោះស្រាយដ៏បានឆាប់បំផុត សម្រាប់វិបត្តិលើកនេះ។
ខ្វះទុនបម្រុងអន្តរជាតិ ដោយសារការគ្រប់គ្រងមិនល្អ និងការបាត់បង់ចំណូលពីខាងទេសចរណ៍ដោយសារវិបត្តិកូវីដ ស្រីលង្កាបានធ្លាក់ខ្លួនក្នុងវិបត្តិប្រាក់បំណុល លែងមានលុយសម្រាប់ទិញនាំចូលថ្នាំ ស្បៀងអាហារ និងប្រេង។ ការខ្វះខាតប្រភពសំខាន់សម្រាប់ទ្រទ្រង់ជីវភាពប្រចាំថ្ងៃ បូកផ្សំនឹងការកើនឡើងនៃកម្រិតអតិផរណា (រហូតដល់៥៤%) បានទៅដុតរោលធ្វើឲ្យប្រជាជនស្រីលង្កាផ្ទុះកំហឹង ធ្វើបាតុកម្មប្រឆាំងរដ្ឋាភិបាល ដោយលែងខ្លាចការបង្រ្កាបរបស់ប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ