ចិនប្រាប់ប្រទេសសមាជិកអាស៊ានកុំឲ្យក្លាយជាកូនអុករបស់គេ
មួយថ្ងៃក្រោយ ប្រមុខការបរទេសអាមេរិក លោកអង់តូន ប្លីងកិននិយាយស្វាគមថៃ ដែលបានដើរតួនាទីជួយអាមេរិកនៅក្នុងតំបន់អាស៊ីអាគ្នេយ៍ រដ្ឋមន្រ្តីការបរទេសចិន លោកវ៉ាង យី ឯណោះវិញ បាននិយាយផ្តាំប្រាប់ប្រទេសសមាជិកអាស៊ាន កុំឲ្យក្លាយជាកូនអុក ក្នុងប្រកួតប្រជែងរវាងប្រទេសមហាអំណាច។ នៅក្នុងដំណើរទស្សនកិច្ចទៅកាន់ទីស្នាក់ការរបស់អាស៊ាន នៅទីក្រុងហ្សាកាតា កាលពីថ្ងៃចន្ទ ទី ១១កក្កដា ប្រមុខការបរទេសចិន នៅបានបង្ហើបខ្លះៗនូវខ្លឹមសារក្នុងជំនួបពិភាក្សារបស់លោកជាមួយរដ្ឋមន្រ្តីការបរទេសអាមេរិក កាលពីថ្ងៃសៅរ៍កន្លងទៅ នៅកោះបាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
នៅទីស្នាក់ការរបស់លេខាធិការដ្ឋានអាស៊ាន នៅទីក្រុងហ្សាកាតា ប្រមុខការបរទេសចិន លោកវ៉ាងយី បានបង្ហើបឲ្យគេដឹងខ្លះៗពីខ្លឹមសារនៃជំនួបពិភាក្សារបស់លោកជាមួយ រដ្ឋមន្រ្តីការបរទេសអាមេរិក កាលពីថ្ងៃសៅរ៍។ តាម លោកវ៉ាង យី លោកបាននិយាយប្រាប់ប្រមុខការការបរទេសអាមេរិកថា អាមេរិក និងចិន គួរពិភាក្សាគ្នា ដើម្បីបង្កើតច្បាប់វិន័យ ដែលលើកទឹកចិត្តឲ្យមានសហប្រតិបត្តិការ ប្រកបដោយវិជ្ជមានរវាងចិន និងអាមេរិក នៅអាស៊ីប៉ាស៊ីហ្វិក។
នៅថ្ងៃសៅរ៍ ប្រមុខការបរទេសចិនបានជួបពិភាក្សា រយៈពេល ៥ម៉ោងជាមួយរដ្ឋមន្រ្តីការបរទេសអាមេរិក។ ភាគីអាមេរិក ចាត់ទុកជំនួបនៅកោះបាលី មានលក្ខណៈស្ថាបនា មានប្រយោជន៍និងស្មោះត្រង់ ចំណែកចិនវាយតម្លៃថា ជំនួបចិន អាមេរិកស្តែងឲ្យឃើញពីការប្រឹងប្រែងរបស់ប្រទេសទាំងពីរដើម្បីបន្ធូរបន្ថយភាពតានតឹង និងដើម្បីទប់ស្កាត់កុំឲ្យជម្លោះកាន់តែរីកធំ ពិបាកនឹងគ្រប់គ្រង។
នៅលេខាធិការដ្ឋានរបស់អាស៊ាន នៅទីក្រុងហ្សាកាតា រដ្ឋមន្រ្តីការបរទេសចិនទទួលស្គាល់ថា ភាពតានតឹងកាន់តែខ្លាំង រវាងមហាអំណាចចិន និងអាមេរិក នៅប៉ុន្មានឆ្នាំមកនេះ បានធ្វើឲ្យប្រទេសជិតខាងរបស់ចិន នៅក្នុងតំបន់ ដែលក្នុងនោះមានផងដែរ សមាជិកអាស៊ាន រងការដាក់សម្ពាធ ដែលត្រូវជ្រើសរើសយកភាគីមួយ ក្នុងចំណោមភាគីជម្លោះទាំងពីរ។ សម្រាប់ប្រមុខការបរទេសចិន គេគួរទុកដាក់តំបន់អាស៊ីអាគ្នេយ៍ឲ្យនៅដាច់ឆ្ងាយពីមហិច្ឆតាភូមិសាស្រ្តនយោបាយ និងអន្ទាក់នៃច្បាប់ព្រៃ និងថា ប្រទេសនៅអាស៊ីអាគ្នេយ៍ គួរជៀសវាងកុំឲ្យធ្លាក់ខ្លួនក្លាយជាកូនអុក ដែលគេអាចប្រើនៅការប្រកួតប្រជែងរវាងប្រទេសមហាអំណាច។
ជាទីតាំងយុទ្ធសាស្រ្តដ៏មានសារៈសំខាន់ អាស៊ីអាគ្នេយ៍បានក្លាយជាតំបន់ប្រកួតប្រជែង គ្នានៅសតវត្សរ៍ទី ២១ រហូតធ្វើឲ្យប្រទេសក្នុងតំបន់ត្រូវជាប់ កៀបនៅក្នុងការប្រជែងគ្នារបស់ប្រទេសមហាអំណាច ចិនអាមេរិក។ យ៉ាងណាក៏ដោយ ប្រមុខការបរទេសចិន អះអាងថា ជោគវាសនារបស់អាស៊ី ត្រូវតែស្ថិតក្នុងដៃរបស់អាស៊ី។
រដ្ឋមន្រ្តីការបរទេសចិនបានអំពាវនាវផងដែរឲ្យប្រទេសសមាជិកអាស៊ានចេញមុខប្រឆាំងនឹងសហប្រតិបត្តិការក្លែងកា្លយ ដែលបានផាត់ចោលប្រទេសមួយចំនួន នៅក្នុងតំបន់។ នៅត្រង់ចំណុចនេះ លោកវ៉ាង យី ចង់និយាយសំដៅដល់កិច្ចព្រមព្រៀងសន្តិសុខ និងការដោះដូរពាណិជ្ជកម្ម ដែលអាមេរិកបានផ្តួចផ្តើម ប៉ុន្តែ ដោយបិទទ្វារមិនស្វាគមចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ