បាតុករស្រីលង្កាប្រកាសបន្តកាន់កាប់វិមានប្រធានាធិបតី រហូតមានការលាលែងជាផ្លូវការ
ប្រទេសស្រីលង្កា បន្តស្ថិតក្នុងស្ថានភាពមិនជាក់លាក់។ ក្រោយពីបង្ខំចិត្តរត់គេចខ្លួនចេញពីគេហដ្ឋាន ដោយហេតុតែការសម្រុកចូលរបស់ក្រុមបាតុករ លោកប្រធានាធិបតី រ៉ាចាប៉ាក់សេ បានសន្យាចុះចេញពីតំណែងនៅថ្ងៃពុធទី ១៣កក្កដាខាងមុខ។ សម្រាប់ពេលនេះ វិមានប្រធានាធិបតីដែលជានិម្មិត្តរូបនៃអំណាចដ៏កំពូលរបស់ស្រីលង្កាតាំងពីជាង២០០ឆ្នាំមក ស្ថិតក្នុងកណ្តាប់ដៃប្រជាពលរដ្ឋ ដែលប្រកាសបន្តកាន់កាប់គេហដ្ឋានប្រធានាធិបតីរហូតទាល់តែលោក រ៉ាចាប៉ាក់សេ លាលែងពីអំណាចជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
នេះការរៀបរាប់របស់មេឡានី ហ្គូណាធីឡាកេ Mélanie Gunathilake បាតុករម្នាក់ដែលបានមកបោះទីតាំង នៅមុខគេហដ្ឋានប្រធានាធិបតី រ៉ាចាប៉ាក់សេ អស់ពេលមួយខែកន្លះមកហើយ ៖
« ប្រធានាធិបតីរ៉ាចាប៉ាក់សេ Rajapakse បានប្រកាសថានឹងលាលែងចេញពីតំណែងនៅថ្ងៃទី ១៣ កក្កដា ហើយលោកនាយករដ្ឋមន្ត្រី លោករ៉ានីល វីក្រេមេស៊ីងហ្កេ ថានឹងដើរចេញពីតួនាទីដែរ ដើម្បីបើកផ្លូវឱ្យមានការបង្កើតរដ្ឋាភិបាលបង្រួបបង្រួមជាតិ។ ប៉ុន្តែនេះមិនមែនជាសំណើរបស់បាតុករទេ។ យើងចង់បានរដ្ឋាភិបាលបណ្តោះអាសន្ន។ តាមការពិត យើងគិតថា លោកហ្គោតាបាយ៉ា រ៉ាចាប៉ាក់សេរ៉ាចាប៉ាក់សេ មិនគោរពសំដីខ្លួនឯង និងមិនគោរពពាក្យសន្យាទេ គឺជាមនុស្សដែលយើងមិនអាចទុកចិត្តលើបានឡើយ។ យើងគិតថា នេះគ្រាន់តែជាល្បិចរបស់គាត់ ដើម្បីបានចំណេញពេលវេលា និង ជាមធ្យោបាយសាកល្បងបំបាក់ទឹកចិត្តប្រជាពលរដ្ឋតែប៉ុណ្ណោះ។ ប៉ុន្តែយើងមិនបណ្តោយឱ្យប្រធានាធិបតីរូបនេះ ធ្វើអ្វីស្រេចនឹងចិត្តទេ។ យើងនឹងបន្តធ្វើបាតុកម្មរហូតទាល់តែ លោក រ៉ាចាប៉ាសេ និងលោក វីក្រេមេស៊ីងហ្កេ ដកខ្លួន និងសុំលាលែងពីតំណែងជាលាយលក្ខណ៍អក្សរ។ បើមិនឃើញលិខិតសុំចុះចេញជាផ្លូវការទេ យើងមិនជឿនរណាទាំងអស់។ ពលរដ្ឋបន្តកាន់កាប់វិមាននិងគេហស្ថានប្រធានាធិបតី។ ហើយបើពួកគេមិនធ្វើតាមសំដី ប្រជាពលរដ្ឋនឹងនាំគ្នាឡើងទៅសភា ដើម្បីបង្ខំពួកគេឱ្យគោរពតាមពាក្យសន្យា។ »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ