មន្រ្តីអន្តោប្រវេសន៍ស្រីលង្កាបដិសេធ មិនឲ្យប្រធានាធិបតីស្រីលង្កាឡើងយន្តហោះ ចាកចេញពីប្រទេស
រត់គេចចេញពីគេហដ្ឋាន ទាំងតក់ក្រហល់ នៅតែប៉ុន្មានម៉ោងមុនដែលក្រុមបាតុករសម្រុកចូលលុយលុយ កាលពីថ្ងៃសៅរ៍ ប្រធានាធិបតីស្រីលង្កាលោកហ្គោតាបាយ៉ា រ៉ាចាប៉ាក់សេ បរាជ័យក្នុងការប៉ុនប៉ងរត់ចាកចោលប្រទេស។ នៅថ្ងៃអង្គារនេះ មន្រ្តីព្រលានយន្តហោះអន្តរជាតិនៅទីក្រុងកូឡុំបូ បដិសេធ បានបដិសេធមិនឲ្យប្រធានាធិបតី និងក្រុមគ្រួសារចូលទៅបន្ទប់ VIP ដើម្បីបោះត្រាលើលិខិតឆ្លងដែន។ ប្រភពមន្រ្តីស្រីលង្កា ដកស្រង់សំដីដោយទីភ្នាក់ងារព័ត៌មានបារាំង AFP បាននិយាយថា បន្ទាប់ពីរងអាម៉ាស់មុខ ដោយសារតែគេបដិសេធមិនឲ្យឡើងជិះយន្តហោះ លោកប្រធានាធិបតី ហ្គោតាបាយ៉ា ដែលបានអះអាងចុះចេញពីតំណែង នៅថ្ងៃពុធស្អែក កំពុងប៉ុនប៉ងចាកចេញពីស្រីលង្កាតាមផ្លូវទឹក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
ប្រឈមនឹងកំហឹងតវ៉ារបស់ក្រុមបាតុករ ដែលចោទប្រកាន់លោកថា ជាអ្នកទទួលខុសត្រូវធ្វើឲ្យស្រីលង្កាជួបវិបត្តិសេដ្ឋកិច្ចធ្ងន់ធ្ងរពេលនេះ លោកប្រធានាធិបតីហ្គោតាបាយ៉ា រ៉ាចាប៉ាក់សេ បាននិយាយប្រាប់ប្រធានសភាថា លោកនឹងចុះចេញពីតំណែង នៅថ្ងៃពុធទី ១២ កក្កដា ដើម្បី បើកផ្លូវឲ្យមានការផ្ទេរអំណាចដោយសន្តិភាព។ ប៉ុន្តែ ហេតុអ្វីបានជាលោកប៉ុនប៉ងចង់រត់ចាកចោលប្រទេសទៅវិញ។
គេវាយតម្លៃថា លោកហ្គោតាបាយ៉ា រ៉ាចាប៉ាក់សេ ចង់ប្រើអភ័យឯកសិទ្ធិចុងក្រោយក្នុងនាមជាប្រធានាធិបតីដើម្បីចាកចេញពីប្រទេស ពោលគឺដើម្បីគេចចេញ ពីការចាប់ដាក់ឃុំណាមួយ នៅក្រោយការលាលែងចេញពីតំណែង។
នៅថ្ងៃសៅរ៍ លោកហ្គោតាបាយ៉ា រ៉ាចាប៉ាក់សេ និងក្រុមគ្រួសារត្រូវបានកងទ័ពជួយការពារ ជម្លៀសចេញពីគេហដ្ឋានប្រធានាធិបតី យ៉ាងតក់ក្រហល់ ដើម្បីជៀសផុតពីការប្រឈមមុខជាមួយក្រុមបាតុករ ដែលបានលើកគ្នាសម្រុកចូលលុកលុយគេហដ្ឋាន និងវិមានប្រធានាធិបតី។ នៅថ្ងៃសៅរ៍ លោកត្រូវបានកងទ័ពដឹកតាមកប៉ាល់ទឹកសំដៅ មូលដ្ឋានទ័ពជើងទឹកនៅភាគខាងជើង មុននឹងជិះឧទ្ធម្ភាគចក្រ ត្រលប់មកទីក្រុងកូឡុំបូ នៅថ្ងៃចន្ទម្សិលមិញ។
តាមប្រភពមន្រ្តីយោធាស្រីលង្កា លោកប្រធានាធិបតី និងភរិយាគ្រោងឡើងជិះយន្តហោះ នៅអាកាសយានដ្ឋាននៅទីក្រុងកូឡុំបូ សំដៅប្រទេសអេមីរ៉ាត អារ៉ាប់រួម។ ប៉ុន្តែ ការប៉ុនប៉ងរបស់លោកត្រូវបរាជ័យ ៣លើក ដែលជាហេតុធ្វើឲ្យលោកនិងគ្រួសារត្រូវស្នាក់នៅមូលដ្ឋានទ័ពក្បែរព្រលានយន្តហោះ អស់មួយយប់ថ្ងៃចន្ទ។
នៅថ្ងៃអង្គារទី ១២កក្កដា ២០២២ លោកប្រធានាធិបតី ហ្គោតាបាយ៉ា រ៉ាចាប៉ាក់សេ នៅតែមិនអាចឡើងជិះយន្តហោះទៅទីក្រុងឌូបៃ បន្ទាប់ពី មន្រ្តីអន្តោប្រវេសន៍នៅព្រលានយន្តហោះ នៅទីក្រុងកូឡុំបូ បានបដិសេធមិនឲ្យលោក និងភរិយាចូលទៅក្នុងបន្ទប់VIP សម្រាប់បោះត្រាលើលិខិតឆ្លងដែន។
ប្អូនប្រុសរបស់ប្រធានាធិបតី គឺលោក បាស៊ីល រ៉ាចាប៉ាក់សេ ដែលបានលាចុះពីមុខតំណែងរដ្ឋមន្រ្តីហិរញ្ញវត្ថុ នៅខែមេសាកន្លងទៅ ក៏ត្រូវមន្រ្តីព្រលានយន្តហោះ បដិសេធមិនឲ្យប្រើផ្លូវពិសេស សម្រាប់អ្នកជំនួញដើម្បី ឡើងជិះយន្តហោះ សំដៅទីក្រុងឌូបៃ។ មន្រ្តីយន្តហោះម្នាក់បាននិយាយថា អ្នកដំណើរនៅលើយន្តហោះ ទៅកាន់ប្រទេសអេមីរ៉ាត អារ៉ាប់រួម បានបដិសេធ មិនឲ្យលោកប្អូនប្រុសប្រធានាធិបតី ឡើងជិះយន្តហោះជាមួយពួកគេដាច់ខាត។
បន្ទាប់ពីត្រូវរងអាម៉ាស់មុខ និងខកខានមិនអាចឡើងជិះយន្តហោះ ដល់ទៅ ៤លើក លោកហ្គោតាបាយ៉ា រ៉ាចាប៉ាក់សេ ទំនងជាបែរទៅប្រើមធ្យោបាយផ្លូវទឹកវិញម្តង។ តាមប្រភពកងទ័ពស្រីលង្កា លោកប្រធានាធិបតី ដែលមានអំណាចឥទ្ធិពលច្រើនលើកងទ័ពអាចឡើងជិះ កប៉ាល់ល្បាតរបស់ស្រីលង្កាដើម្បីធ្វើដំណើរទៅ ប្រទេសកោះមាល់ឌីវ ឬទៅឥណ្ឌា មុននឹងធ្វើដំណើរបន្តតាមយន្តហោះទៅកាន់ប្រទេសអេមីរ៉ាត អារ៉ាប់រួម។
ក្នុងករណី ដែល លោកហ្គោតាបាយ៉ា រ៉ាចាប៉ាក់សេ រត់ចាកចោលប្រទេស គឺនាយករដ្ឋមន្រ្តី លោករ៉ានីល វីក្រេមេស៊ីងហ្កេ ដែលក្លាយជាមេដឹកនាំប្រទេស ដោយស្វ័យប្រវត្តិ ក្នុងពេលរង់ចាំ ឲ្យសភា បោះឆ្នោតជ្រើសរើសប្រធានាធិបតីថ្មី ដែលត្រូវកាន់អំណាចរហូតដល់ចុងឆ្នាំ ២០២៤។ ប៉ុន្តែ បញ្ហា ត្រង់ថា លោកនាយករដ្ឋមន្រ្តីដែលត្រូវបាតុករប្រឆាំង និងដុតផ្ទះរបស់លោក កាលពីថ្ងៃសៅរ៍ ក៏បាននិយាយដែរថា លោកនឹងចុះចេញពីតំណែង ដើម្បីបើកផ្លូវឲ្យគណបក្សទាំងអស់ចូលរួមដឹកនាំស្រីលង្កា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ