ប្រធានាធិបតីស្រីលង្ការត់ភៀសខ្លួនចេញពីប្រទេស តាមយន្តហោះយោធា
ស្រីលង្កាត្រូវបានដាក់ក្នុងស្ថានភាពប្រកាសអាសន្ន បន្ទាប់ពីប្រធានាធិបតី លោកហ្គោតាបាយ៉ា រាចាប៉ាក់សេ បានរត់ភៀសខ្លួនចេញពីប្រទេស សំដៅកោះម៉ាល់ឌីវ នៅថ្ងៃពុធនេះ។ អ្នកនាំពាក្យរបស់សភា ស្រីលង្កា បានប្រកាសនៅថ្ងៃនេះដែរថា លោកនាយករដ្ឋមន្រ្តី រ៉ានីល វីក្រេមេស៊ីងហ្កេ ត្រូវបានជ្រើសតាំងជាប្រធានាធិបតីស្តីទី ក្នុងពេលដែលប្រធានាធិបតីស្ថិតនៅក្រៅប្រទេស។ ដំណឹងនេះបានទៅបន្ថែមកំហឹង របស់ក្រុមបាតុករស្រីលង្កា ដែលបានទាមទារថា ទាំងប្រធានាធិបតី និងនាយករដ្ឋមន្រ្តីត្រូវតែចុះចេញពីតំណែង។
ចុះផ្សាយនៅថ្ងៃ៖
ស្តាប់ - ០២:៥៥
នៅទីក្រុងកូឡុំបូ ស្ថានការណ៍ចាប់ផ្តើមជ្រួលច្របល់ឡើងវិញ បន្ទាប់ពីប្រធានាធិបតី ស្រីលង្កា លោកហ្គោតាបាយ៉ា បានរត់ភៀសខ្លួន ចេញពីប្រទេស តាមយន្តហោះយោធា កាលពីពាក់កណ្តាលអាធ្រាត្រ យប់ថ្ងៃអង្គារ។
តាមអ្នកទទួលខុសត្រូវផ្នែកអន្តោប្រវេសន៍នៅព្រលានយន្តហោះក្រុងកូឡុំបូ បន្ទាប់ពីគេបោះត្រាលើលិខិតឆ្លងដែន លោកហ្គោតាបាយ៉ា រ៉ាចាប៉ាក់សេ ភរិយា និងអង្គរក្ស ពីរនាក់ បានឡើងជិះយន្តហោះពិសេសរបស់កងទ័ពជើងអាកាស សំដៅ ប្រទេសកោះម៉ាល់ឌីវ។ តាមមន្រ្តីយោធាស្រីលង្កា ម៉ាល់ឌីវគ្រាន់តែជាចំណតបណ្តោះអាសន្ន មុននឹងលោកហ្គោតាបាយ៉ា រ៉ាចាប៉ាក់សេ ធ្វើដំណើរទៅកាន់ប្រទេសទី៣។
ការរត់គេចខ្លួនចេញពីប្រទេស បានសម្រេច របស់ប្រធានាធិបតី បានធ្វើឲ្យប្រជាជនស្រីលង្កាខឹងក្តៅក្រហាយសាជាថ្មី ពីអសមត្ថភាព និងការគ្មានការទទួលខុសត្រូវរបស់រដ្ឋអំណាច។ តាមប្រធានសភាស្រីលង្កា លោកហ្គោតាបាយ៉ា រ៉ាចាប៉ាក់សេ អាយុ ៧៣ឆ្នាំ បានសន្យាចុះចេញពីតំណែង នៅថ្ងៃពុធនេះ ប៉ុន្តែ លោកបែរជាលួចចាកចេញពីប្រទេស ដោយគ្មានប្រកាសចុះចេញពីតំណែងជាផ្លូវការ។
នៅថ្ងៃពុធ ប្រធានរដ្ឋសភាស្រីលង្កាបានចេញមុខតាមទូរទស្សន៍មកប្រកាសថា លោកនាយករដ្ឋមន្រ្តីរ៉ានីល វីក្រេមេស្ហ៊ីងហ្កេ ត្រូវបានតែងតាំងជាប្រធានាធិបតីស្តីទី បន្ទាប់ពី លោកប្រធានាធិបតី ហ្គោតាបាយ៉ា រ៉ាចាប៉ាក់សេលែងមានវត្តមាននៅក្នុងប្រទេស។
នៅក្នុងដំណាក់កាលអន្តរកាល ប្រធានាធិបតីស្តីទី មានពេល៣០ថ្ងៃ ដើម្បីរៀបចំការបោះឆ្នោតជ្រើសរើសប្រធានាធិបតីថ្មី។
នៅព្រឹកថ្ងៃពុធ នៅតែប៉ុន្មានម៉ោង ក្រោយប្រធានាធិបតី ចាកចោលប្រទេស នាយករដ្ឋមន្រ្តីលោករ៉ានីល វីក្រេមេស្ហ៊ីងហ្កេបានប្រកាសដាក់ប្រទេសក្នុងស្ថានភាពអាសន្ន នៅទូទាំងប្រទេស ចំណែករដ្ឋធានីកូឡុំបូត្រូវអនុវត្តបម្រាមគោចរ ក្នុងគោលដៅកាត់បន្ថយកម្លាំងបាតុកម្ម។ យ៉ាងណាក៏ដោយ ក្រុមបាតុករដែលទាមទារឲ្យនាយករដ្ឋមន្រ្តីចុះចេញពីតំណែងដែរនោះ នៅតែមិនខ្លាចកោតក្រែងបម្រាមគោចរ និងបានលើកគ្នា ទៅឡោមព័ទ្ធការិយាល័យធ្វើការរបស់នាយករដ្ឋមន្រ្តី។ ការប៉ះទង្គិចបានកើតឡើង នៅពេល ប៉ូលិស និងទាហានបាញ់គ្រាប់បែកផ្សែង ជាច្រើនគ្រាប់ ដើម្បី រារាំង កុំឲ្យបាតុករអាចសម្រុកចូលកន្លែងធ្វើការរបស់នាយករដ្ឋមន្រ្តី ដូចដែលពួកគេបានធ្វើទៅលើគេហដ្ឋាន និងវិមានប្រធានាធិបតី។
បាតុករស្រីលង្កាធូរចិត្ត ដែលឃើញបងប្អូនត្រកូលរ៉ាចាប៉ាក់សេ ដែលពួកគេចោទថា ជាចោរលួចលុយប្រជាជន ត្រូវខ្ទាតចេញពីអំណាចនៅទីបំផុត។ ប៉ុន្តែ បន្ទាប់ពីនេះ តើស្រីលង្កានឹងអាចងើបដកខ្លួនចេញពីវិបត្តិនៅពេលនេះដែរឬទេ? បាតុកម្មរបស់ប្រជាជនផ្ទុះឡើងក៏ដោយសារតែ ការគ្រប់គ្រងមិនបានល្អរបស់រដ្ឋាភិបាល ដែលបានធ្វើឲ្យស្រីលង្កា ជួបវិបត្តិសេដ្ឋកិច្ចធ្ងន់ធ្ងរ គ្មានលុយទិញនាំចូលប្រេង គ្មានលុយសងបំណុល ចំណែក ប្រជាជនស្រីលង្កាជួបជីវភាពខ្វះខាត ខ្វះសព្វ ខ្វះគ្រប់ មិនថា ប្រេង ហ្គាស ស្បៀង និងថ្នាំពេទ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ