ប្រឈមនឹងការឡើងកំពស់ទឹកសមុទ្រ ប្រជាជនលើកោះឥណ្ឌូណេស៊ីដាក់ពាក្យប្តឹងក្រុមហ៊ុនស៊ីម៉ង់ស្វ៊ីស
ប្រឈមនឹងការជន់លិចផ្ទះសម្បែង ដោយសារការឡើងកំពស់ទឹកសមុទ្រ ប្រជាជននៅលើកូនកោះឥណ្ឌូណេស៊ី បានដាក់ពាក្យបណ្តឹង ប្តឹងក្រុមហ៊ុនផលិតស៊ីម៉ង់ស៊្វីស ឈ្មោះ Holcim។ ក្រុមហ៊ុនស៊ីម៉ង់ ស្វ៊ីសលែងមានវត្តមានធ្វើជំនួញនៅឥណ្ឌូណេស៊ី នៅឆ្នាំ ២០១៩ ប៉ុន្តែ ប្រជាជនលើកូនកោះឥណ្ឌូណេស៊ី ដាក់ពាក្យប្តឹងក្រុមហ៊ុនបរទេសមួយនេះ ក្នុងបទចោទប្រកាន់ ទទួលខុសត្រូវលើការបញ្ចេញឧស្ម័នកាបូនិក ឧស្ម័នផ្ទះកញ្ចក់ដែលធ្វើឲ្យផែនដីឡើងកំដៅ និងការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:៥៣
ក្រុមហ៊ុនផលិតស៊ីម៉ង់ស្វ៊ីស Holcim បានចាកចេញពី ឥណ្ឌូណេស៊ី តាំងពីឆ្នាំ ២០១៩ បន្ទាប់ពីលក់ភាគហ៊ុនទៅឲ្យក្រុមហ៊ុនក្នុងស្រុកឥណ្ឌូណេស៊ី។ មួយវិញទៀត ក្រុមហ៊ុន ស៊ីម៉ង់ Holcim ក៏មិនដែលធ្លាប់បោះទីតាំងនៅលើកោះ Pulau Pariដែលជាម្ចាស់បណ្តឹងនោះដែរ។ ប៉ុន្តែ នោះមិនសំខាន់ទេ។ សម្រាប់ប្រជាជននៅលើកោះ Pulau Pariដែលស្ថិតនៅមិនឆ្ងាយប៉ុន្មានពីរដ្ឋធានីហ្សាកាតា ក្រុមហ៊ុនស៊ីម៉ង់ស្វ៊ីស ស្ថិតក្នុងចំណោមក្រុមហ៊ុនអន្តរជាតិធំៗជាង ៥០ នៅក្នុងលោក ដែលបានចូលរួមបំពុលបរិស្ថាន បញ្ចេញឧស្ម័នកាបូនិក ឧស្ម័នផ្ទះកញ្ចក់ ដែលជាដើមហេតុនៃការប្រែប្រួលអាកាសធាតុ។
ការសិក្សាធ្លាប់បង្ហាញថា ក្រុមហ៊ុនស៊ីម៉ង់ស្វ៊ីស បានបញ្ចេញឧស្ម័នកាបូនិក ៧ពាន់លានតោនពីឆ្នាំ ១៩៥០ ដល់ឆ្នាំ ២០២១ ស្មើនឹង០,៤២%នៃការបញ្ចេញឧស្ម័នកាបូនិកសរុបរបស់ក្រុមហ៊ុនឧស្សាហកម្មក្នុងពិភពលោក។
ដោយយល់ឃើញថា ក្រុមហ៊ុនស្វ៊ីស ទទួលខុសត្រូវលើការបញ្ចេញឧស្ម័នកាបូនិក ដែលរួមចំណែកធ្វើឲ្យផែនដី ឡើងកំដៅ និងការរលាយទឹកកកដែលជាមូលហេតុធ្វើឲ្យកំពស់ទឹកសមុទ្រកើនឡើង និងគំរាមកំហែងជន់លិចផ្ទះសម្បែង និងមុខរបរ នៅលើកោះ យ៉ាងដូច្នេះ ទើបនៅពាក់កណ្តាលខែកក្កដា ប្រជាជននៅលើកូនកោះ ឥណ្ឌូណេស៊ី សម្រេចដាក់ពាក្យបណ្តឹងទៅកាន់តុលាការស៊្វីស នៅទីក្រុងZoug ដែលមានទីស្នាក់ការកណ្តាលរបស់ក្រុមហ៊ុនHolcim។
នេះបើតាមអង្គការក្នុងស្រុកស្វ៊ីស ឈ្មោះ Entraide Protestante Suisse ដែលផ្តល់ជំនួយផ្នែកច្បាប់ដល់ប្រជាជនឥណ្ឌូណេស៊ី។
ទៅតាមពាក្យបណ្តឹង របស់ប្រជាជនឥណ្ឌូណេស៊ី ភាគីដើមចោទ ទាមទារឲ្យក្រុមហ៊ុនផលិតស៊ីម៉ង់ស្វ៊ីស សន្យាចាត់វិធានការជាក់ស្តែង ដើម្បី កាត់បន្ថយឲ្យបានច្រើនបំផុត ការបញ្ចេញឧស្ម័នកាបូនិក។ ទីពីរ ពួកគេទាមទារឲ្យក្រុមហ៊ុនស្វ៊ីសផ្តល់ជំនួយហិរញ្ញវត្ថុ សម្រាប់ការដ្ឋានពង្រឹងប្រព័ន្ធការពារឆ្នេរកោះ ដូចជា ការដាំដើមកោងកាង និងជួយសង់ផ្ទះឲ្យខ្ពស់ផុតពីទឹក រួមទាំងជំនួយសម្រាប់បង្កើតហេដ្ឋារចនាសម្ព័ន្ធទឹកសាប។
សម្រាប់អ្នកទទួលខុសត្រូវផ្នែកច្បាប់របស់វេទិកាឥណ្ឌូណេស៊ីសម្រាប់បរិស្ថាន ពាក្យបណ្តឹងប្រឆាំងនឹងក្រុមហ៊ុនស៊ីម៉ង់ស្វ៊ីស ដែលទើបមានជាលើកទី១ នឹងអាចបើកផ្លូវឲ្យសហគមន៍ដទៃទៀត ដែលរងគ្រោះដោយសារការប្រែប្រួលអាកាសធាតុ និងការឡើងកំពស់ទឹកសមុទ្រ ដាក់ពាក្យបណ្តឹង ប្តឹងក្រុមហ៊ុនឧស្សាហកម្មដែលទទួលខុសត្រូវលើការបញ្ចេញឧស្ម័នកាបូនិក។
នៅឥណ្ឌូណេស៊ី ក្រៅតែពីបញ្ចេញ ឧស្ម័នកាបូនិក ក្រុមហ៊ុនឧស្សាហកម្មស៊ីម៉ង់ ជាអ្នកទទួលខុសត្រូវផងដែរ លើការបាក់ស្រុតដីចូលទឹកសមុទ្រ ដោយសារតែបូមខ្សាច់សម្រាប់ វិស័យសំណង់។ ឥណ្ឌូណេស៊ីជាប្រទេសកោះធំជាងគេក្នុងពិភពលោក ដែលមានកូនកោះ ជាង ១៦០០០។ ប៉ុន្តែ កោះជាង ២០០០អាចប្រឈមនឹងការជន់លិចទៅក្នុងទឹកសមុទ្រពីពេលនេះ រហូតដល់ឆ្នាំ ២០៥០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ