អាណត្តិនាយករដ្ឋមន្ត្រី ប្រយុទ្ធ ចាន់អូចា ៖ តុលាការធម្មនុញ្ញថៃ សម្រេចសេចក្តី ចុងក្រោយនៅថ្ងៃដាច់ខែ
តើនាយករដ្ឋមន្ត្រីថៃ លោក ប្រាយុទ្ធចាន់អូចា នឹងបន្តកាន់អំណាចទៀត ឬក៏ត្រូវចប់ ? ក្រោយបណ្តឹងជំទាស់នឹងការបន្តកាន់តំណែងរបស់លោកប្រាយុទ្ធ ចាន់អូចា ជានាយករដ្ឋមន្ត្រី តុលាការធម្មនុញ្ញថៃ បានប្រកាសនៅថ្ងៃនេះ ថានឹងផ្តល់សេចក្តីសម្រេចចុងក្រោយ នៅថ្ងៃទី ៣០ កញ្ញា ២០២២ វេលាម៉ោងបីរសៀល ម៉ោងនៅក្នុងស្រុក។
ចុះផ្សាយនៅថ្ងៃ៖
តុលាការបានទទួលអំណះអំណាងពីភាគីជាច្រើន មានអាទិ៍មកពីខាងលោកប្រយុទ្ធ ចាន់អូចា និងរបាយការណ៍នៃជំនួបប្រជុំខ្លះរបស់គណៈកម្មការទទួលបន្ទុកតាក់តែងរដ្ឋធម្មនុញ្ញ។ ដូច្នេះតុលាការមានភស្តុតាងគ្រប់គ្រាន់អាចសម្រេចសេចក្តីបានហើយ ថាតើ លោកប្រាយុទ្ធ ចាន់អូចា ពិតជាផុតកំណត់អាណត្តិនាយករដ្ឋមន្ត្រី ត្រឹម៨ឆ្នាំ ដូចមានចែងនៅក្នុងរដ្ឋធម្មនុញ្ញ ឆ្នាំ២០១៧ មែនឬយ៉ាងណា។
មាត្រា១៥៨ នៃរដ្ឋធម្មនុញ្ញឆ្នាំ២០១៧ បានកំណត់រយៈពេលកាន់តំណែងនាយករដ្ឋមន្ត្រី មិនឲ្យលើស៨ឆ្នាំ ប៉ុន្តែមិនបានបញ្ជាក់ថា តើចាប់រាប់ពីត្រឹមណាទេ។ ហេតុដូច្នេះហើយបានជាក្រុមអ្នកគាំទ្រលោកប្រាយុទ្ធចាន់ អូចា ចង់យកចំណុចនេះមកបកស្រាយការពារខ្លួន ដោយចង់ឱ្យតុលាការគិតពីថ្ងៃរដ្ឋធម្មនុញ្ញចូលជាធរមាន ពោលគឺនៅឆ្នាំ២០១៧ ឬ ចាប់គិត ពីត្រឹមថ្ងៃលោកប្រាយុទ្ធ ចាន់អូចា ឡើងកាន់មុខតំណែងនាយករដ្ឋមន្ត្រីជាផ្លូវការ នៅឆ្នាំ២០១៩ ក្រោយលោកបានឈ្នះឆ្នោតដោយស្របច្បាប់។
បើគិតតាមការបកស្រាយខាងលើនេះ លោក ប្រាយុទ្ធ ចាន់អូចា អាចនឹងបន្តកាន់តំណែងរហូតដល់ឆ្នាំ ២០២៥ ឬ២០២៧ ហើយអាចរក្សាតួនាទីជានាយករដ្ឋមន្ត្រីបានទៀត បើបក្សរបស់លោកឈ្នះ នៅក្នុងសម័យបោះឆ្នោតសភា នាដើមឆ្នាំ ក្រោយ។
ប៉ុន្តែសម្រាប់ក្រុមអ្នកប្រឆាំង លោកប្រាយុទ្ធ ចាន់អូចា បានកាន់មុខតំណែងនាយករដ្ឋមន្ត្រី គ្រប់៨ឆ្នាំ ដែលជារយៈពេលអតិបរមាកំណត់ដោយរដ្ឋធម្មនុញ្ញឆ្នាំ២០១៧ ព្រោះលោកបានទទួលការប្រថាប់ត្រា ពីព្រះមហាក្សត្រឱ្យធ្វើជានាយករដ្ឋមន្ត្រី តាំងពីថ្ងៃទី ២៤សីហា ២០១៤មក។ កាលពីថ្ងៃទី ២៤សីហា២០២២ តុលាការធម្មនុញ្ញបានសម្រេចជាបណ្តោះអាសន្ន ក្នុងសំឡេងភាគច្រើន ៥ទល់៤ ព្យួរតំណែងលោកប្រាយុទ្ធ ចាន់អូចា ពីមុខតំណែងនាយករដ្ឋមន្ត្រី។ ក្នុងអំឡុងពេលនេះ លោកប្រាយុទ្ធ ចាន់អូចា នៅតែបន្តមុខងារជារដ្ឋមន្ត្រីក្រសួងការពារជាតិជាធម្មតា ចំណែកលោកឧបនាយករដ្ឋមន្ត្រី ប្រាវីត វង់ស៊ូវ៉ាន បានឡើងមកធ្វើជានាយករដ្ឋមន្ត្រីបណ្ដោះអាសន្ន ហើយបន្តបំពេញតួនាទីជានាយករដ្ឋមន្ត្រីស្តីទី រហូតដល់មានការបោះឆ្នោតថ្មី ប្រសិនបើលោកប្រាយុទ្ធ ចាន់អូចា ត្រូវតុលាការសម្រេចចុងក្រោយឱ្យបញ្ចប់អាណត្តិមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ