នីតិវិធីនៅតុលាការយុត្តិធម៌អន្តរជាតិរបស់វ៉ានូទូ ជាពន្លឺនៃក្តីសង្ឃឹមសម្រាប់អាកាសធាតុ
ជារៀងរាល់ឆ្នាំ និងក្លាយជាប្រពៃណី នៃសន្និសីទអាកាសធាតុ ថ្ងៃសៅរ៍ជាថ្ងៃមហាបាតុកម្មរបស់ក្រុមសង្គមនិងសកម្មជនស៊ីវិលដើម្បីអាកាសធាតុ។ ជាបាតុកម្មរំលឹកមេដឹកនាំដែលកំពុងជួបប្រជុំគ្នា អំពីភាពបន្ទាន់នៃការពន្លឿនសកម្មភាពប្រយុទ្ធប្រឆាំងនឹងការប្រែប្រួលអាកាសធាតុ។ សម្រាប់COP២៧ឆ្នាំនេះ មានតែការជួបជុំគ្នាតិចតួចក្នុងទីធ្លាមុខកន្លែងរៀបចំសន្និសីទ។ អាជ្ញាធរអេហ្ស៊ីបបានប្រកាសថា គ្មានជាដាច់ខាតការដង្ហែក្បួនបាតុកម្ម តាមដងផ្លូវ និងរដ្ឋធានី។ ប៉ុន្តែសកម្មជនដើម្បីអាកាសធាតុ អាចរំពឹងនិងមើលឃើញពន្លឺនៃក្តីសង្ឃឹម តាមរយៈសកម្មភាព របស់ប្រទេសកូនកោះនៅក្នុងមហាសមុទ្ទប៉ាស៊ីហ្វិក វ៉ានូទូ នៅចំពោះមុខតុលាការអន្តរជាតិ។
ចុះផ្សាយនៅថ្ងៃ៖
ស្តាប់ - ០២:១៨
កាលពីឆ្នាំ២០២១ រដ្ឋាភិបាលវ៉ានូទូ ប្រទេសកូនកោះមួយក្នុងមហាសមុទ្ទប៉ាស៊ីហ្វិក ដែលប្រឈមដោយផ្ទាល់និងមុនគេ ពីការប្រែប្រួលអាកាសធាតុ បានចង់សុំយោបល់ពីស្ថាប័នយុត្តិធម៌របស់អង្គការសហប្រជាជាតិ។ នៅឆ្នាំនេះ គំនិតផ្តួចផ្តើមរបស់វ៉ានូទូ បានត្រូវពន្លឿន តាមរយៈការរៀបចំនីតិវិធីជាផ្លូវការ ដាក់ជូនទៅអង្គការសហប្រជាជាតិដែលនឹងត្រូវបោះឆ្នោតអនុម័តនៅប៉ុន្មានខែខាងមុខ។
ដឹកនាំមុខដោយវ៉ានូទូ គម្រោងរបស់១៥ប្រទេស (មានជាអាទិ៍អាល្លឺម៉ង់ កូស្តារីកា បង់ក្លាដែស ឬនូវែលហ្សេឡង់) ចង់ឱ្យតុលាការអន្តរជាតិបញ្ជាក់ អំពីសិទ្ធិនិងកាតព្វកិច្ចរបស់រដ្ឋនីមួយៗ ក្នុងការថែរក្សានិងការពារផែនដីយ៉ាងណាសម្រាប់អនាគត ដោយផ្អែកលើច្បាប់អន្តរជាតិ។ តុលាការអន្តរជាតិត្រូវឆ្លើយបំភ្លឺផងដែរ ថាតើផលប៉ះពាល់នៃការប្រែប្រួលអាកាសធាតុមានទំនាក់ទំនងនឹងសិទ្ធិមនុស្ស យ៉ាងណា ? ហើយ ប្រទេសអ្នកបញ្ចេញឧស្ម័នការបូនិក មានភាពចាំបាច់យ៉ាងណា ចំពោះអតីតកាល បច្ចុប្បន្នកាល និងអនាគតកាល ?
គំនិតផ្តួចផ្តើមនេះ កំពុងលាន់រងំក្នុងស្នូលនៃក្រុមអ្នកការពារផែនដីដែលកំពុងចូលរួមក្នុងសន្និសីទអាកាសធាតុរបស់អង្គការសហប្រជាជាតិCOP២៧ នៅក្រុងឆាមអែលឆែកប្រទេសអេហ្ស៊ីប។ តំណាងអង្គការGreenpeace ចាត់ទុក យុទ្ធនាការរបស់វ៉ានូទូ ថាជាពន្លឺនៃក្តីសង្ឃឹមដែលអាចផ្តល់សន្ទុះថ្មីដល់ការចរចាអន្តរជាតិ។
ប៉ុន្តែសំណើរបស់វ៉ានូទូ អាចនឹងត្រូវរារាំងដោយក្រុមប្រទេសអភិវឌ្ឍន៍ធំៗ ដែលប្រឆាំងនឹងគំនិតទាមទារសំណង ឬទំនួលខុសត្រូវជាប្រវត្តិសាស្ត្រនៃការប្រែប្រួលអាកាសធាតុ។ នៅក្នុងកិច្ចព្រមព្រៀងអាកាសធាតុក្រុងប៉ារីសឆ្នាំ២០១៥ សហរដ្ឋអាមេរិកស្នើបញ្ចូលដោយជោគជ័យ នូវឃ្លាមួយបញ្ជាក់ថា កិច្ចព្រមព្រៀងប៉ារីស មិនមែនជាមូលដ្ឋានសម្រាប់ទាមទារសំណងឬទំនួលខុសត្រូវនៃការប្រែប្រួលអាកាសធាតុទេ។ សកម្មភាពរបស់រដ្ឋ ឬក្រុមហ៊ុនណាមួយនៅលើពិភពលោក នៅចំពោះមុខតុលាការអន្តរជាតិមានតម្លៃត្រឹមជាការពិគ្រោះផ្តល់យោបល់ប៉ុណ្ណោះ។
គ្រាន់តែថា យោបល់របស់តុលាការអន្តរជាតិ មានទម្ងន់ និងមានតម្លៃផ្នែកសីលធម៌ខ្លាំង ដែលតុលាការជាតិ តុលាការតំបន់ ឬតុលាការផ្សេងៗ អាចសម្រេចតាម។ នេះ បើតាមការគូសបញ្ជាក់របស់អ្នកជំនាញច្បាប់អន្តរជាតិនៅសកលវិទ្យាល័យ Leiden ប្រទេសហូឡង់ដែលជាប្រឹក្សារបស់រដ្ឋាភិបាលវ៉ានូទូ ក្នុងសំណុំរឿងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ