ធនាគារពិភពលោក ៖ ការផ្ទេរលុយរបស់ពលករចំណាកស្រុកទៅប្រទេសកំណើត មានកំណើនតិច នៅឆ្នាំ២០២២
ពលករចំណាកស្រុក បានជួយបន្ធូរភាពតានតឹងនៃទីផ្សារការងារក្នុងប្រទេសអ្នកឱ្យធ្វើការផង និងជាអ្នកទ្រទ្រង់ជីវភាពគ្រួសារនៅស្រុកកំណើត តាមរយៈការផ្ទេរប្រាក់ទៅឱ្យផង។ ប៉ុន្តែនៅឆ្នាំ២០២២នេះ ការផ្ទេរប្រាក់របស់ពលករចំណាកស្រុក ទៅប្រទេសកំណើតដែលជាប្រទេសក្រីក្រ ឬមធ្យម បានកើនឡើងតែប្រមាណ៥%ប៉ុណ្ណោះ ពោលគឺជាកំណើនដ៏ទាប ដល់ទៅពីរដង ជាងកាលពីឆ្នាំកន្លងទៅ។ នេះបើតាមរបាយការណ៍របស់ធនាគារពិភពលោក ចេញផ្សាយនៅថ្ងៃពុធទី ៣០វិច្ឆិកា។
ចុះផ្សាយនៅថ្ងៃ៖
ក្រោយវិបត្តិជំងឺរាតត្បាតសកលកូវីដ១៩ ចាប់បន្ថយល្បឿន សេដ្ឋកិច្ចចាប់មានសន្ទុះ ពលករចំណាកស្រុកចាប់សម្បូរការងារធ្វើ និងមានសមត្ថភាពផ្ញើលុយទៅជួយក្រុមគ្រួសារ ប៉ុន្តែវិបត្តិអតិផរណា ទំនិញឡើងថ្លៃ លុយចុះថោក ជះឥទ្ធិពលអាក្រក់ខ្លាំងណាស់លើចំណូលរបស់ពលករចំណាកស្រុក។
ជាលទ្ធផល នៅឆ្នាំ២០២២នេះ ទំហំនៃការផ្ទេរប្រាក់ (ពីពលករចំណាកស្រុក) ទៅកាន់ប្រទេសក្រីក្រ និងមានចំណូលមធ្យម មានត្រឹមតែប្រមាណ ៦២៦ពាន់លានដុល្លារ។ នេះបើតាមការសេចក្តីថ្លែងការណ៍របស់ធនាគារពិភពលោក ដែលរំលឹកថា កាលពីឆ្នាំ២០២០-២០២១ ដោយសារសេដ្ឋកិច្ចអឺរ៉ុបនិងអាមេរិកចាប់កំរើកខ្លាំង ការផ្ទេរប្រាក់បានកើនឡើងដល់ទៅ ១០,២%ឯណោះ។
គួរឱ្យកត់សម្គាល់ជាងគេ គឺការផ្ទេរប្រាក់របស់ពលករចំណាកស្រុកអាហ្វ្រិកកណ្តាលមានកំណើនត្រឹមតែ៥,២%ទល់នឹងកំណើន១៦,៤%កាលពីឆ្នាំមុន។ ការផ្ញើប្រាក់ទៅអាមេរិកឡាទីន និងកោះការ៉ាអ៊ីប បានកើនឡើង៩,៣%។ ៣,៥%សម្រាប់អាស៊ីខាងត្បូង ២,៥%សម្រាប់ដើមបូព៌ា និងអាហ្វ្រិកខាងជើង ហើយត្រឹមតែ០,៧%ប៉ុណ្ណោះ នៅអាស៊ីខាងកើតនិងប៉ាស៊ីហ្វិក។
ផ្ទុយទៅវិញ ការផ្ទេរប្រាក់ទៅអឺរ៉ុបនិងអាស៊ីកណ្តាល ដែលតម្លៃប្រេងបានឡើងថ្លៃ ហើយរុស្ស៊ីត្រូវការពលករចំណាកស្រុក មានកំណើន១០,៣%។ បញ្ញើទៅអ៊ុយក្រែនមានកំណើនតែប្រមាណ២%ទេ ព្រោះលុយសម្រាប់ជួយគ្រួសារអ៊ុយក្រែនត្រូវផ្ញើទៅប្រទេសដែលពួកគេបានភៀសខ្លួនទៅជ្រកកោន។
បើតាមធនាគារពិភពលោក ឥណ្ឌាជាប្រទេសតែមួយគត់ ដែលជាលើកទីមួយ បានទទួលប្រាក់បញ្ញើពីពលករចំណាកស្រុក បានដល់ទៅជាង១០០ពាន់លានដុល្លារឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ