ជនរ៉ូហ៊ីងយ៉ា ២០០នាក់ បានដល់ ឥណ្ឌូណេស៊ី ខណៈអ្នកជិះទូក២៦នាក់ស្លាប់លើសមុទ្រ
ជនជាតិភាគតិច រ៉ូហ៊ីងយ៉ា ប្រមាណ២០០នាក់ បានភៀសខ្លួនតាមទូកទៅដល់ ឥណ្ឌូណេស៊ី នៅថ្ងៃច័ន្ទ បន្ទាប់ពីត្រូវខ្វះស្បៀងអាហារ ១ ខែ នៅលើសមុទ្រ។ ពួកគេបានត្រូវទាហានជើងទឹកឥណ្ឌូណេស៊ីនិងឥណ្ឌា រួមគ្នាជួយយកអាសា ទើបបានទៅចុះចតនៅកោះ អាឆេ របស់ ឥណ្ឌូណេស៊ី។
ចុះផ្សាយនៅថ្ងៃ៖
ស្តាប់ - ០២:១៥
ជនជាតិរ៉ូហ៊ីងយ៉ា ជិត២០០នាក់ នោះ ជិះទូកឈើធំមួយ ប្រវែង១០ម៉ែត្រ។ ក្មេងប្រុសរ៉ូហ៊ីងយ៉ា ម្នាក់ អាយុ១៤ឆ្នាំ បាននិយាយភាសាអង់គ្លេសតិចតួច ប្រាប់អ្នកកាសែតនៅឥណ្ឌូណេស៊ី ថា ពួកគេចេញពីប្រទេសបង់ក្លាដែស ដោយត្រៀមទឹកសម្រាប់៧ថ្ងៃ និងអាហារសម្រាប់១០ថ្ងៃ។ ជាអកុសល ធ្វើដំណើរបានតែ១អាទិត្យ សម្រាប់តែម៉ាស៊ីនទូកខូច តម្រូវឲ្យពួកគេទ្រាំរស់អត់បាយក្រហាយទឹក ១ខែលើលំហសមុទ្រ។
ជនភៀសខ្លួន រ៉ូហ៊ីងយ៉ា ម្នាក់ទៀត ត្រូវទីភ្នាក់ងារសារព័ត៌មានបារាំងអាអេហ្វប៉េស្រង់សម្តីថា ក្នុងដំណើរផ្សងព្រេងនេះ មនុស្សយ៉ាងហោច ២៦នាក់ បានស្លាប់បាត់បង់ជីវិតនៅលើទូក ហើយសាកសពពួកគេទាំងនោះ ត្រូវទម្លាក់ចោលចូលក្នុងសមុទ្រ។
ក្នុងរយៈពេល ២ ខែនេះ ទូកផ្ទុកជនភៀសខ្លួនរ៉ូហ៊ីងយ៉ា ចំនួន ៤ ហើយ បានទៅដល់ច្រាំងសមុទ្រឥណ្ឌូណេស៊ី។ សរុបជនភៀសខ្លួន ជាង ៤៧០ នាក់។ អង្គការសហប្រជាជាតិទទួលបន្ទុកជនភៀសខ្លួនប្រចាំទីក្រុងហ្សាកាតា បានកោតសរសើរឥណ្ឌូណេស៊ី ដែលយល់ព្រមឲ្យជនភៀសខ្លួន រ៉ូហ៊ីងយ៉ា ចុះចត។ ក៏ប៉ុន្តែ ឧត្តមស្នងការអង្គការសហប្រជាជាតិ ក៏នៅព្រួយបារម្ភចំពោះទូកមួយទៀត ដែលមានមនុស្សប្រមាណ ១៨០ នាក់ កំពុងតែបាត់ដំណឹងឈឹងសូន្យ។ ប្រសិនបើទូកនេះ លិចក្នុងសមុទ្រនិងស្លាប់អ្នកជិះទូកទាំងនោះមែន គឺឆ្នាំ២០២២ ជាសំណាងអាក្រក់សម្រាប់ជនជាតិ រ៉ូហ៊ីងយ៉ា ភៀសខ្លួនតាមទូក ដែលអង្គការសហប្រជាជាតិ បញ្ជាក់សរុបទិន្នន័យថា ប្រមាណ៤០០នាក់ ស្លាប់នៅក្នុងសមុទ្រ។
ប៉ុន្មានឆ្នាំចុងក្រោយនេះ របបសឹកភូមា បានធ្វើទុក្ខបុកម្នេញ ប្រើហិង្សា និងកាប់សម្លាប់ លើពលរដ្ឋរ៉ូហ៊ីងយ៉ា កាន់សាសនាអ៊ីស្លាម ដែលជាកត្តាជំរុញបង្ខំឲ្យពួកគេរត់ចោលស្រុកភូមា ទៅជ្រកក្រោននៅជំរំប្រទេសបង់ក្លាដែស និងប្រទេសដទៃទៀត។ ក្នុងជំរំភៀសខ្លួនខ្លះ គ្មានអនាម័យ គ្មានការថែទាំត្រឹមត្រូវ និងគ្មានការសិក្សាអប់រំសមរម្យសម្រាប់ក្មេងៗ។ អ្នកភៀសខ្លួនមួយចំនួន ត្រូវបង្ខំចិត្តប្រថុយនឹងគ្រោះថ្នាក់ដល់អាយុជីវិត ធ្វើដំណើរបន្តតាមសមុទ្រ ដោយគ្មានគោលដៅពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ