ប្រមុខដឹកនាំថ្មីម៉ាឡេស៊ី ទៅបំពេញទស្សនកិច្ចនៅឥណ្ឌូណេស៊ី
នាយករដ្ឋមន្ត្រីម៉ាឡេស៊ី អានវ៉ារ អ៊ីប្រាហ៊ីម និងលោកប្រធានាធិបតីឥណ្ឌូណេស៊ី ចូកូ វីដូដូ បានប្តេជ្ញាពង្រឹងកិច្ចសហប្រតិបត្តិការ ការពារវិស័យផលិតកម្មប្រេងដូង។ សេចក្តីប្រកាសធ្វើឡើងនៅថ្ងៃចន្ទទី៩មករានេះ នាឱកាសដែលលោក អានវ៉ារ អ៊ីប្រាហ៊ីម កំពុងបំពេញទស្សនកិច្ចនៅបរទេសជាលើកទីមួយ ក្នុងនាមជាប្រមុខដឹកនាំប្រទេសម៉ាឡេស៊ី។
ចុះផ្សាយនៅថ្ងៃ៖
ស្តាប់ - ០២:០១
ធ្លាប់តែជាមេបក្សប្រឆាំងម៉ាឡេស៊ីអស់រយៈពេលជាច្រើនឆ្នាំ លោក អានវ៉ារ អ៊ីប្រាហ៊ីមទើបបានទទួលតំណែងជានាយករដ្ឋមន្ត្រី នៅថ្ងៃទី ២៤វិច្ឆិកា២០២២ បន្ទាប់ពីបានចងសម្ព័ន្ធភាពជាមួយបក្សនយោបាយតូចៗក្រោយការបោះឆ្នោតដែលគ្មានអ្នកឈ្នះដាច់ និងដែលសភា ទើបបោះឆ្នោតផ្តល់ទំនុកចិត្តលើរូបលោកឱ្យដឹកនាំប្រទេស។ ក្នុងនាមជាប្រមុខរដ្ឋាភិបាលថ្មី លោកបានជ្រើសរើសធ្វើដំណើរទៅបំពេញទស្សនកិច្ចនៅបរទេសជាលើកដំបូងបង្អស់ នៅក្នុងប្រទេសឥណ្ឌូណេស៊ី។
លោក អានវ៉ារ អ៊ីប្រាហ៊ីម បានសម្តែងអំណរគុណដល់ម្ចាស់ផ្ទះឥណ្ឌូណេស៊ីដែលតែងគាំទ្ររូបលោកកន្លងមក ដោយព្រលយទៅកាន់អ្នកកាសែតថា “ពេលខ្ញុំកំពុងស្ថិតក្នុងភាពលំបាក រស់ក្នុងភាពមិនច្បាស់លាស់និងទុក្ខសោក ឥណ្ឌូណេស៊ីបានទទួលខ្ញុំ ដូចទទួលមិត្តពិត”។
ចំណែកលោក ចូកូ វីដូដូ ប្រធានាធិបតីឥណ្ឌូណេស៊ីវិញ ក្នុងជំនួបនៅភាគខាងត្បូងក្រុងហ្សាការតា ជាមួយលោកអានវ៉ារ អ៊ីប្រាហ៊ីម លោកបានប្រកាសពង្រឹងកិច្ចសហប្រតិបត្តិការក្រុមប្រឹក្សាប្រទេសផលិតកម្មដូងប្រេង ដើម្បីភាពរឹងមាំនៃវិស័យប្រេងដូង។ ជាការរឹតចំណងសម្ព័ន្ធភាពប្រយុទ្ធប្រឆាំងនឹងការរើងអើងលើវិស័យនាំចេញប្រេងដូង ដែលប្រទេសទាំងពីរ ជាអ្នកនាំចេញដ៏ចម្បងគេ។
ឥណ្ឌូណេស៊ីនិងម៉ាឡេស៊ី បានប្តឹងទៅអង្គការពាណិជ្ជកម្មពិភពលោកឱ្យជួយដោះស្រាយជម្លោះពាណិជ្ជកម្មជាមួយសហភាពអឺរ៉ុបដែលកំហិតការប្រើប្រាស់ប្រេងជីវៈឥន្ធនៈចម្រាញ់ពីប្រេងដូង ដាំដោយការកាប់ព្រៃឈើ។ កាលពីខែមុន សហភាពអឺរ៉ុបបានប្រកាសព្រមព្រៀងគ្នាចេញបម្រាមហាមឃាត់ការនាំចេញផលិតផល សណ្តែក ឬប្រេងដូង ដែលមានពាក់ព័ន្ធនឹងការកាប់ព្រៃឈើ។
ប្រធានាធិបតីឥណ្ឌូណេស៊ីក៏បានអរគុណម៉ាឡេស៊ីដែរ ដែលចូលរួមវិនិយោគក្នុងគម្រោងស្ថាបនារដ្ឋធានីថ្មីលើកោះប័រនេអូ។ ពាណិជ្ជកម្មទ្វេភាគី បញ្ហាព្រំដែនរួម ព្រមទាំងសិទ្ធិការងាររបស់ពលករអន្តោប្រវេសន៍ ដែលឥណ្ឌូណេស៊ីបានផ្អាកមួយរយៈជាមួយម៉ាឡេស៊ីត្រូវបានលើកមកជជែកជាមួយនាយករដ្ឋមន្ត្រីម៉ាឡេស៊ី ដោយមិនភ្លេចទេវិបត្តិភូមា ព្រោះឥណ្ឌូណេស៊ីជាប្រធានផ្លាស់វេនអាស៊ាននៅឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ