នាយករដ្ឋមន្រ្តីនូវែលសេឡង់ លោកស្រី ហ្សាស៊ីនដា អារឌែនប្រកាសលាឈប់ពីមុខតំណែង
នាយករដ្ឋមន្រ្តី នូវែលសេឡង់ លោកស្រីហ្សាស៊ីនដា អារឌែន បានប្រកាសលាលែងពីមុខតំណែង ក្នុងហេតុផលគ្មានកម្លាំង ថាមពលដើម្បីដឹកនាំប្រទេស មួយអាណត្តិបន្ថែមទៀត។ ការប្រកាសរបស់លោកស្រីហ្សាស៊ីនដា អារឌែន នៅថ្ងៃ ព្រហស្បតិ៍នេះ ធ្វើឡើងនៅប៉ុន្មានខែមុនដែលនូវែលសេឡង់ត្រូវរៀបចំការបោះឆ្នោត សភា ដែលត្រូវប្រព្រឹត្តទៅ នៅខែតុលាចុងឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៥១
នៅក្នុងសន្និសីទកាសែត នៅទីក្រុងWellington នៅថ្ងៃព្រហស្បតិ៍នេះ លោកស្រី នាយករដ្ឋមន្រ្តី ហ្សាស៊ីនដា អារឌែននិយាយថា លោកស្រីនឹងចុះចេញពីតំណែងជាផ្លូវការ នៅប៉ុន្មានសប្តាហ៍ខាងមុខ ក្នុងហេតុផលថា លោកស្រីលែងមានថាមពលគ្រប់គ្រាន់ដើម្បីអាចដឹកនាំប្រទេសមួយអាណត្តិបន្ថែមទៀត។
“ខ្ញុំជាមនុស្ស។ ពួកយើងបានផ្តល់ឲ្យអស់ពីសមត្ថភាពដែលយើងមាន និងរយៈពេលវែងបំផុតតាមតែអាចធ្វើទៅបាន។ ប៉ុន្តែ មានពេលមួយ វាត្រូវដល់ទីបញ្ចប់។ សម្រាប់ខ្ញុំ ពេលវេលានោះបានមកដល់ហើយ” នេះជាប្រសាសន៍របស់លោកស្រី ហ្សាស៊ីនដា អារឌែន នៅក្នុងកិច្ចប្រជុំរបស់គណបក្សពលករ របស់លោកស្រី។
មានវ័យ ៤២ឆ្នាំ លោកស្រី នាយករដ្ឋមន្រ្តីហ្សាស៊ីនដា អារឌែន ដឹកនាំប្រទេសនូវែលសេឡង់បាន៥ឆ្នាំ និង២ខែ។ ចូលកាន់តំណែងជានាយករដ្ឋមន្រ្តីវ័យក្មេងបំផុត របស់នូវែលសេឡង់ នៅឆ្នាំ ២០១៧ លោកស្រី ហ្សាស៊ីនដា អារឌែនបានជួយនាំឲ្យគណបក្សពលកររបស់លោកស្រីទទួលជ័យជំនះ យ៉ាងធំធេង នៅក្នុងការបោះឆ្នោតជាតិ នៅឆ្នាំ ២០២០ សម្រាប់ដឹកនាំប្រទេសមួយអាណត្តិបន្តទៀត។
ប៉ុន្តែ នៅក្រោយ មានស្នាដៃច្រើនក្នុងការដឹកនាំប្រទេស ជាពិសេសនៅក្នុងកាលៈទេសៈ វិបត្តិកូវីដ ការវាយប្រហារភេរវកម្មនៅវិហាអ៊ីស្លាម និងគ្រោះធម្មជាតិ ផ្ទុះភ្នំភ្លើង រដ្ឋាភិបាលរបស់លោកស្រី អារឌែនបានធ្លាក់កូដប្រជាប្រិយមកវិញ នៅមួយឆ្នាំមកនេះ ដោយសារបញ្ហាទំនិញឡើងថ្លៃ លទ្ធភាពនៃ សេដ្ឋកិច្ចដើរថយក្រោយ និងការឡើងកូដប្រជាប្រិយរបស់បក្សប្រឆាំង។
ទោះជាការស្ទង់មតិចុងក្រោយបង្ហាញថា គណបក្សចម្រុះ ស្តាំ និងកណ្តាលនិយមទំនងទទួលជ័យជំនះច្រើន នៅក្នុងការបោះឆ្នោត នៅខែតុលាខាងមុខ លោកស្រី អារឌែនបាននិយាយការពារខ្លួនថា លោកស្រីសម្រេចចិត្តលាឈប់ពីមុខតំណែង មិនមែនដោយសារគិតថា គណបក្សរបស់លោកស្រីមិនអាចឈ្នះឆ្នោតនោះទេ ប៉ុន្តែ មកពីលោកស្រីជឿថា គណបក្សរបស់លោកស្រីនឹងឈ្នះឆ្នោតសាជាថ្មី។ ម្យ៉ាងលោកស្រី បានសម្រេចចិត្តលាលែងពីតំណែងនៅពេលនេះ ក៏ព្រោះថា មុខតំណែងដ៏ខ្ពង់ខ្ពស់នេះ អមមកជាមួយនូវការទទួលខុសត្រូវខ្ពស់។ ការទទួលខុសត្រូវក្នុងការដឹងថា តើអ្នកជាមនុស្សត្រឹមត្រូវ សម្រាប់ដឹកនាំ ឬលែងអាចដឹកនាំតទៅទៀតបាន។
តាមលោកស្រី ហ្សាស៊ីនដា អារឌែន នៅបីថ្ងៃក្រោយលាឈប់ពីមុខតំណែងនាយករដ្ឋមន្រ្តី គណបក្សពលកររបស់លោកស្រីនឹងបោះឆ្នោតជ្រើសរើសមេដឹកនាំថ្មី សម្រាប់កាន់តំណែងនាយករដ្ឋមន្រ្តី បន្តពីលោកស្រី។ លោកស្រីអារឌែនបញ្ជាក់ដែរថា លោកស្រី នឹងបន្តការងារជាសមាជិកសភាពីពេលនេះ រហូតដល់ថ្ងៃបោះឆ្នោតសភា នៅខែតុលាចុងឆ្នាំនេះ។
ជាស្រីទី២ក្នុងលោក បន្ទាប់ពីនាយករដ្ឋមន្រ្តីប៉ាគីស្ថាន ដែលសម្រាលកូននៅក្នុងពេលកាន់តំណែងជានាយករដ្ឋមន្រ្តី លោកស្រីហ្សាស៊ីនដា អារឌែន ធ្លាប់បាននិយាយថា លោកស្រីចង់ចំណាយពេលមើលកូនស្រី Neve ដែលដល់អាយុចូលសាលារៀននៅចុងឆ្នាំនេះ។
នាយករដ្ឋមន្រ្តីអូស្ត្រាលី លោកអង់តូនី អាល់បាល់នីស បានថ្លែងកោតសរសើរលោកស្រី អារឌែនថា ជាប្រមុខរដ្ឋាភិបាលដែលបានបង្ហាញដល់ពិភពលោកថា តើគេអាចដឹកនាំប្រទេសដោយភាពវ័យឆ្លាត និងកម្លាំងបានយ៉ាងដូចម្តេច។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ