គ្រឿងញៀន ៖ ហ្វីលីពីនធ្វើឧទ្ធរណ៍ប្រឆាំងនឹងសេចក្តីសម្រេចរបស់តុលាការព្រហ្មទណ្ឌអន្តរជាតិ
រដ្ឋាភិបាលហ្វីលីពីនបានប្រកាសនៅថ្ងៃសុក្រទី ២៧មករា ធ្វើបណ្តឹងឧទ្ធរណ៍ប្រឆាំងនឹងសេចក្តីសម្រេចរបស់តុលាការព្រហ្មទណ្ឌអន្តរជាតិ (ICC) ដែលម្សិលមិញ បានប្រកាសអនុញ្ញាតឱ្យបើកអង្កេតឡើងវិញជុំវិញយុទ្ធនាការបង្ក្រាបគ្រឿងញៀននៅក្នុងប្រទេសហ្វីលីពីន។ បើតាមតុលាការព្រហ្មទណ្ឌអន្តរជាតិ យុទ្ធនាការបង្ក្រាបគ្រឿងញៀន របស់រដ្ឋាភិបាលហ្វីលីពីន ក្រោមអាណត្តិលោក ឌុយទែរតេ ពីឆ្នាំ២០១៦ដល់ឆ្នាំ២០២២ មានទម្រង់ជាឧក្រិដ្ឋកម្មប្រឆាំងមនុស្សជាតិ។
ចុះផ្សាយនៅថ្ងៃ៖
ស្តាប់ - ០២:១៥
ចៅក្រមនៃតុលាការព្រហ្មទណ្ឌអន្តរជាតិ បានចេញសេចក្តីសម្រេចម្តងរួចហើយកាលពីខែកញ្ញា២០២១ បើកការស៊ើបអង្កេតពេញលេញមួយ ជុំវិញយុទ្ធនាការបង្ក្រាបគ្រឿងញៀនរបស់រដ្ឋាភិបាលហ្វីលីពីន។ ការអង្កេតត្រូវផ្អាកទៅវិញ នៅវិច្ឆិកាឆ្នាំ២០២១ដដែល ក្រោយពីរដ្ឋាភិបាលហ្វីលីពីនបានសុំទទួលបន្ទុកធ្វើអង្កេតដោយខ្លួនឯង។ ប៉ុន្តែបន្ទាប់ពីបានវិភាគយ៉ាងល្អិតល្អន់នូវរាល់ឯកសារផ្តល់ដោយហ្វីលីពីន តុលាការគ្មានជំនឿលើការងារអង្កេតរបស់ហ្វីលីពីនទេ ទើបតុលាការព្រហ្មទណ្ឌផ្តល់សេចក្តីសម្រេចអនុញ្ញាតជាថ្មីឱ្យបើកការអង្កេតសំណុំរឿងប្រព្រឹត្តឧក្រិដ្ឋកម្មប្រឆាំងមនុស្សជាតិក្រោមផ្លាកបង្ក្រាបគ្រឿងញៀននៅក្នុងប្រទេសហ្វីលីពីននេះឡើងវិញ។ នេះបើតាមសេចក្តីថ្លែងការណ៍របស់តុលាការព្រហ្មទណ្ឌអន្តរជាតិនៅថ្ងៃទី ២៦មករា។
ការអង្កេតរបស់តុលាការព្រហ្មទណ្ឌអន្តរជាតិ ជាច្រកផ្លូវតែមួយគត់ដែលអាចវែករកយុត្តិធម៌ជូនជនរងគ្រោះនិងក្រុមគ្រួសារ ពីនយោបាយបង្ក្រាបគ្រឿងរបស់រដ្ឋាភិបាលលោកឌុយទែរតេបាន។ បើតាមប្រតិកម្មអបអររបស់នាយកអង្គការការពារសិទ្ធិមនុស្ស Humain Rights Watch ប្រចាំតំបន់អាស៊ី តែសម្រាប់រដ្ឋអាជ្ញានិងក្រសួងយុត្តិធម៌ហ្វីលីពីនវិញ គឺមានតែ តុលាការមូលដ្ឋានប៉ុណ្ណោះដែលមានសមត្ថកិច្ចពេញលេញធ្វើអង្កេតលើសំណុំរឿងសង្ស័យប្រព្រឹត្តឧក្រិដ្ឋកម្មប្រឆាំងនឹងមនុស្សជាតិនេះបាន។ ហ្វីលីពីនបានប្រកាសភ្លាមជំហរចង់ធ្វើបណ្តឹងឧទ្ធរណ៍ប្រឆាំងនឹងសេចក្តីសម្រេច របស់តុលាការព្រហ្មទណ្ឌកាលពីថ្ងៃព្រហស្បតិ៍ និងបញ្ជាក់ជំហរបន្តបើកប្រតិបត្តិការបង្ក្រាបគ្រឿងញៀន តាមលំអានរបស់អតីតប្រធានាធិបតីឌុយទែរតេ។ ប្រធានាធិបតីហ្វីលីពីនថ្មី លោក ហ្វ៊ែរឌីណង់ ម៉ាកូស ជូញ៉រ ដែលបានជាប់ឆ្នោតកាលពីខែឧសភា២០២២ដោយសារចងសម្ព័ន្ធជាមួយកូនស្រីលោកឌុយទែរតេ បានសន្យាធ្វើសង្គ្រាមប្រឆាំងគ្រឿងញៀន ដោយផ្តោតលើវិធានការការពារនិងអប់រំ និងមិនប្តូរចិត្តចូលជាសមាជិកតុលាការព្រហ្មទណ្ឌអន្តរជាតិវិញទេ។
សូមបញ្ជាក់ថា ពីឆ្នាំ២០១៦ ដល់ឆ្នាំ២០២២ យុទ្ធនាការបង្ក្រាបគ្រឿងញៀនជាង២០ម៉ឺនករណី បានសម្លាប់មនុស្សជាផ្លូវការអស់យ៉ាងហោច៦១៨១នាក់ តែអាចពី ១២០០០នាក់ដល់បីម៉ឺននាក់ បើតាមការស្មានរបស់រដ្ឋអាជ្ញាអន្តរជាតិ។ តុលាការព្រហ្មទណ្ឌអន្តរជាតិយល់ថាយុទ្ធនាការបែបនេះមានទម្រង់ជាឧក្រិដ្ឋកម្មប្រឆាំងមនុស្សជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ