ហ្វីលីពីនប្រកាស គ្មានចេតនា ចូលជាសមាជិក តុលាការព្រហ្មទណ្ឌអន្តរជាតិ
ប្រធានាធិបតីហ្វីលីពីន លោក ហ្វ៊ែរឌីណង់ ម៉ាកូស ជូញ៉រ បានប្រកាសនៅថ្ងៃចន្ទទី ១ សីហា ២០២២នេះ ថាហ្វីលីពីន នឹងមិន ចូលពាក់ព័ន្ធនឹងតុលាការព្រហ្មទណ្ឌអន្តរជាតិទេ។ ការប្រកាសបញ្ជាក់ជំហរជាថ្មី នៅថ្ងៃនេះ ប្រព្រឹត្តទៅចំពេលដែលរដ្ឋអាជ្ញារបស់តុលាការ កំពុងស្វះស្វែងបើកអង្កេតឡើងវិញជុំវិញសង្គ្រាមប្រឆាំងគ្រឿងញៀនរបស់លោក ឌុយទែរតេ អតីតប្រធានាធិបតីហ្វីលីពីន។
ចុះផ្សាយនៅថ្ងៃ៖
ជាប់ឆ្នោតកាលពីខែឧសភាឆ្នាំ២០២២ ក្លាយជាប្រធានាធិបតីថ្មី របស់ហ្វីលីពីន និងជាអ្នកមាននយោបាយការពារយ៉ាងមុតមាំ ការប្រយុទ្ធប្រឆាំងនឹងគ្រឿងញៀន លោកប្រធានាធិបតី ហ្វ៊ែរឌីណង់ ម៉ាកូស ជូញ៉រ បានអះអាងនៅចំពោះមុខអ្នកសារព័ត៌មាន ថា ហ្វីលីពីន គ្មានចេតនា ត្រលប់ចូលជាសមាជិកតុលាការព្រហ្មទណ្ឌអន្តរជាតិវិញទេ ហើយហ្វីលីពីន នឹងមិនសហការជាមួយស្ថាប័ននេះ ក្នុងករណីមានការបើកអង្កេតណាមួយឡើយ។
ហ្វីលីពីន បានប្រកាសដកខ្លួនចេញពីតុលាកាព្រហ្មទណ្ឌអន្តរជាតិ នៅឆ្នាំ២០១៩ បន្ទាប់ពីតុលាការបានបើកអង្កេតបឋមសំណុំរឿងសង្គ្រាមប្រឆាំងគ្រឿងញៀនដឹកនាំដោយលោក រ៉ូឌ្រីហ្គោ ឌុយទែរតេ កាលលនៅជាប្រធានាធិបតីហ្វីលីពីន។ កាលពីខែកញ្ញាឆ្នាំទៅ ចៅក្រមតុលាការនេះ បានថែមទាំងផ្តល់ការអនុញ្ញាតឱ្យបើកអង្កេតតែម្តង លើសង្គ្រាមប្រឆាំងនឹងគ្រឿងញៀន ដែលបើតាមក្រុមចៅក្រមដដែល មានទម្រង់ជាទង្វើឧក្រិដ្ឋកម្មប្រឆាំងនឹងមនុស្សជាតិ ព្រោះកងកម្លាំងមានសមត្ថកិច្ចនៃរដ្ឋាភិបាលហ្វីលីពីន ទំនងជាបាន សម្លាប់ជីវិតមនុស្សអស់ជាច្រើនពាន់នាក់។
បន្ទាប់ពីព្យួរការស៊ើបអង្កេតអស់រយៈពេល៧ខែ តាមសំណើរបស់ក្រុងម៉ានីល រដ្ឋអាជ្ញាតុលាការព្រហ្មទណ្ឌ លោក ការីម ខាន់ Karim Khan បានប្រកាសកាលពីខែមិថុនា២០២២ បន្តការអង្កេតឡើងវិញ និងឱ្យបានលឿនបំផុតតាមតែអាចធ្វើទៅបាន ព្រមទាំងបានជូនដំណឹងប្រាប់ហ្វីលីពីន ថាតុលាការព្រហ្មទណ្ឌចាប់បើកការអង្កេតឡើងវិញ។ ក្រុងម៉ានីល មានពេលរហូតដល់ថ្ងៃទី ៨ កញ្ញា ក្នុងការផ្តល់ចម្លើយជាផ្លូវការជូនតុលាការ។ ប៉ុន្តែប្រធានាធិបតីហ្វីលីពីនកំពុងកាន់អំណាច គ្មានចេតនាសហការជាមួយស្ថាប័ននេះទេ។ ចំណែកតុលាការព្រហ្មទណ្ឌវិញថ្វីបើមានភស្តុតាងគ្រប់គ្រាន់សម្រាប់បើកសវនការប្រឆាំងនឹងលោក ឌុយទែរតេក្តី ក៏វិន័យរបស់តុលាការមិនអនុញ្ញាតឱ្យកាត់ទោសអតីតប្រធានាធិបតីហ្វីលីពីនដោយកំបាំងមុខឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ