ជប៉ុនសន្យាបន្ថែមជំនួយហិរញ្ញវត្ថុ៥៥០០លានដល់អ៊ុយក្រែន
នាយករដ្ឋមន្ត្រីជប៉ុន លោក ហ្វូមីអូ គីស៊ីដា បានប្រកាសសន្យានៅថ្ងៃចន្ទទី ២០កុម្ភៈ ផ្តល់ជំនួយហិរញ្ញវត្ថុចំនួន ៥៥០០លានដុល្លារដល់អ៊ុយក្រែន។ ជាងនេះទៅទៀត ជប៉ុនបានផ្តួចផ្តើមរៀបចំជំនួបប្រជុំក្រុមប្រទេសមហាឧស្សាហកម្មទាំង៧នៅលើពិភពលោក ដោយអញ្ជើញប្រធានាធិបតីអ៊ុយក្រែនឱ្យមកចូលរួមតាមវីដេអូផង នៅថ្ងៃសុក្រទី ២៤ កុម្ភៈ២០២៣ ដែលត្រូវចំខួបមួយឆ្នាំគត់នៃសង្គ្រាមរុស្ស៊ីចូលឈ្លានពានអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥៤
ជប៉ុនបានសម្រេចចិត្តផ្តល់ជំនួយហិរញ្ញវត្ថុបន្ថែមចំនួន៥៥០០លានដុល្លារ ដល់អ៊ុយក្រែន ព្រោះជាជំនួយចាំបាច់ សម្រាប់ប្រជាពលរដ្ឋដែលរងគ្រោះក្នុងភ្លើងសង្គ្រាម និងសម្រាប់ស្តារហេដ្ឋារចនាសម្ព័ន្ធប្រទេសដែលបំផ្លិចបំផ្លាញដោយសង្គ្រាម។ នេះជាប្រសាសន៍របស់លោកនាយករដ្ឋមន្ត្រីជប៉ុន ហ្វូមីអូ គីស៊ីដា នៅក្នុងសន្ទរកថាមួយពីទីក្រុងតូក្យូ។
បើតាមការិយាល័យលោកនាយករដ្ឋមន្ត្រីដដែល តូក្យូធ្លាប់បានផ្តល់ហិរញ្ញវត្ថុចំនួន៦០០លានដុល្លារ ព្រមទាំងជំនួយមនុស្សធម៌បន្ទាន់តម្លៃរាប់រយលានដុល្លារដល់អ៊ុយក្រែនរួចមកហើយ។ ហើយឆ្នាំនេះ ក្នុងនាម ជាប្រធានផ្លាស់វេនក្រុមប្រទេសមហាឧស្សាហកម្មG7 និងក្នុងនាមជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ ជប៉ុននឹងគាំទ្រអ៊ុយក្រែនក្នុងយុទ្ធនាការប្រយុទ្ធប្រឆាំងនឹងការឈ្លានពានរបស់រុស្ស៊ីផង និងសម្របសម្រួលឱ្យមានកិច្ចខិតខំប្រឹងប្រែងពិភពលោកក្នុងការការពារសណ្តាប់ធ្នាប់អន្តរជាតិ ដែលបើកទូលាយ និងសេរី ដោយឈរលើមូលដ្ឋានច្បាប់អន្តរជាតិ។
ជាងនេះទៅទៀត លោកនាយករដ្ឋមន្ត្រី បានប្រកាសរៀបចំជំនួបប្រជុំមេដឹកនាំក្រុមប្រទេសហ្សេ៧ ជាមួយនឹងប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី តាមប្រព័ន្ធវីដេអូ នៅថ្ងៃសុក្រទី ២៤កុម្ភៈ ចំថ្ងៃខួបមួយឆ្នាំនៃការបើកសង្គ្រាមរុស្ស៊ីចូលឈ្លានពានអ៊ុយក្រែនផង។ ជំនួបកំពូលក្រុមប្រទេសហ្សេ៧ ៖ អាមេរិក អាល្លឺម៉ង់ ជប៉ុន បារាំង អ៊ីតាលី អង់គ្លេស និងកាណាដា នឹងប្រព្រឹត្តទៅនៅខែឧសភា នៅក្រុងហ៊ីរ៉ូស្ហ៊ីម៉ា។
សេចក្តីប្រកាសបន្ថែមជំនួយហិរញ្ញវត្ថុរបស់ជប៉ុន ប្រព្រឹត្តទៅចំពេលដែលប្រធានាធិបតីអាមេរិកអញ្ជើញទៅបំពេញទស្សនកិច្ចនៅក្រុងកៀវ ដោយឥតព្រាងទុក និងជាលើកទីមួយគិតចាប់តាំងពីឆ្នាំ២០០៨ និងសង្គ្រាមផ្ទុះឡើង។
មានធម្មនុញ្ញសន្តិនិយមមិនគាំទ្រសង្គ្រាម ជប៉ុនបានជួយឧបត្ថម្ភក្រុងកៀវនូវសម្ភារៈ សម្រាប់ការពារខ្លួន និងបានផ្តល់សិទ្ធិជ្រកកោនដល់អ្នកដែលចង់រត់គេចពីជម្លោះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ