អង្គការសហប្រជាជាតិស្នើឲ្យសម្រាលបំណុលចំនួន ៣០% សម្រាប់ ៥២ប្រទេសដែលងាយរងគ្រោះ
នៅថ្ងៃពុធ ទី២២ កុម្ភៈ អង្គការសហប្រជាជាតិតាមរយៈកម្មវិធីដើម្បីអភិវឌ្ឃហៅកាត់ PNUD បានស្នើឲ្យកាត់បន្ថយបំណុលចំនួន ៣០% សម្រាប់ ៥២ប្រទេសដែលងាយរងគ្រោះខ្លាំង។ សំណើនេះបានធ្វើឡើងចំពេលដែលរដ្ឋមន្រ្តីក្រសួងហិរញ្ញវត្ថុនៃក្រុមប្រទេស G២០ ត្រៀមបើកកិច្ចប្រជុំនៅក្នុងប្រទេសឥណ្ឌា។ តាម PNUD បើគ្មានការជួយដោះស្រាយវិបត្តិបំណុលនៅក្នុងបណ្តាប្រទេសទាំងនេះទេ ពិភពលោកអាចប្រឈមនឹងវិបត្តិនៃការអភិវឌ្ឃន៍ទ្រង់ទ្រាយធំ។
ចុះផ្សាយនៅថ្ងៃ៖
ស្តាប់ - ០២:០៩
នៅក្នុងចំណោមប្រទេសទាំង ៥២ ដែលកំពុងប្រឈមនឹងភាពងាយរងគ្រោះខ្លាំង មាន ២៣ប្រទេសស្ថិតក្នុងតំបន់អាហ្រ្វិកសាហារ៉ា។ តាមកម្មវិធីរបស់អង្គការសហប្រជាជាតិដើម្បីអភិវឌ្ឃហៅកាត់ PNUD ប្រទេសទាំងនេះលែងមានលទ្ធភាពដើម្បីជួយស្រោចស្រង់សេដ្ឋកិច្ចរបស់ខ្លួន និងកំពុងជាប់បំណុលគេវ័ណ្ឌជាមួយនឹងអត្រាការប្រាក់ខ្ពស់ដែលបានរារាំងប្រទេសទាំងនេះមិនឲ្យងើបក្បាលរួច។ លោក Achim Steiner អ្នករដ្ឋបាលរបស់អង្គការ PNUD បានថ្លែងនៅក្នុងសន្និសីទកាសែតក្នុងក្រុងប៉ារីសថា ផលិតផលសរុបក្នុងស្រុករបស់ក្រុមប្រទេសទាំងនេះតំណាងឲ្យតែប៉ុន្មានភាគរយប៉ុណ្ណោះនៃផលិតផលសរុបក្នុងលោក។ ក៏ប៉ុន្តែ ក្រុមប្រទេសទាំងនេះតំណាងឲ្យ ៤០% នៃចំនួនអ្នកក្រីក្រសរុបក្នុងលោក។
តាមលោក Achim Steiner បើអ្វីៗមិនត្រូវបានធ្វើដើម្បីដោះស្រាយវិបត្តិបំណុលនៅក្នុងបណ្តាប្រទេសទាំងនោះទេ ពិភពលោកអាចប្រឈមនឹងវិបត្តិនៃការអភិវឌ្ឃន៍ទ្រង់ទ្រាយធំ។ អង្គការ PNUD បានផ្តល់ជាដំណោះស្រាយថា គេត្រូវដាក់លុយចូលទៅក្នុងប្រព័ន្ធហិរញ្ញវត្ថុអន្តរជាតិ ពិនិត្យមើលឡើងវិញនូវបំណុលរបស់ក្រុមប្រទេសផុយស្រួយ និងកាត់បន្ថយអត្រាប្រាក់កម្ចីរយៈពេលយូរ។ ដោយឡែក សេដ្ឋវិទូចំនួន ២នាក់របស់អង្គការ PNUD យល់ថា ការយល់ព្រម ឬអត់ក្នុងការកាត់បន្ថយបំណុល ហើយការកាត់បន្ថយបំណុលក្នុងចំនួនតិច ឬច្រើនអាស្រ័យលើការចូលរួម ឬការមិនចូលរួមរបស់ម្ចាស់បំណុល ពោលមិនមែនអាស្រ័យលើកូនបំណុលទេ។
ដោយឡែក អង្គការ PNUD បានទាមទារឲ្យមានការគិតគូរឡើងវិញលើបំណុលសម្រាប់ប្រទេសកំពុងអភិវឌ្ឍនទាំងអស់។ គួរបញ្ជាក់ថា បញ្ហាបំណុលនៅក្នុងប្រទេសកំពុងអភិវឌ្ឃបានធ្លាក់ធ្ងន់ធ្ងរនារយៈពេលប៉ុន្មានឆ្នាំចុងក្រោយនេះ។ ជាក់ស្តែងក្នុងឆ្នាំ ២០២២ មានរហូតដល់ ២៥ប្រទេសបានប្រើថវិការបស់ខ្លួនជាង ២០% ដើម្បីសងបំណុលគេ ពោលច្រើនជាងកាលពី ៦ឆ្នាំមុនដែលមានតែ ៦ប្រទេសប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ