ចិន និងអូស្រា្តលីបានបើកកិច្ចប្រជុំផ្លូវការលើកទី១ ថ្នាក់ក្រសួងការពារជាតិចាប់តាំងពីឆ្នាំ ២០១៩
អ្នកទទួលខុសត្រូវចិន និងអូស្រា្តលីបានបញ្ជាក់ក្នុងថ្ងៃព្រហស្បតិ៍ ទី២៣ មីនាថា អ្នកតំណាងក្រសួងការពារជាតិនៃប្រទេសទាំងពីរបានជួបសន្ទនាគ្នាផ្លូវការលើកទី១ នាថ្ងៃពុធ ទី២២ មីនាក្នុងទីក្រុងកង់បេរ៉ា។ ជំនួបលើកទី១ ចាប់តាំងពីឆ្នាំ ២០១៩ បានធ្វើឡើង ប៉ុន្មានថ្ងៃក្រោយពីរដ្ឋាភិបាលចិនបានថ្កោលទោសចាស់ដៃលើរដ្ឋាភិបាលក្រុងកង់បេរ៉ានៅក្នុងគម្រោងដាក់ពង្រាយនាវាមុជទឹកដើរដោយនុយក្លេអ៊ែរបំពាក់មីស៊ីលរបស់អាមេរិក។
ចុះផ្សាយនៅថ្ងៃ៖
ស្តាប់ - ០២:០៤
ព័ត៌មានស្តីពីជំនួបផ្លូវការថ្នាក់ក្រសួងការពារជាតិរវាងអូស្រា្តលី និងចិនត្រូវបានផ្តល់ឲ្យដោយភាគីអូស្រា្តលីតាមរយៈអ្នកនាំពាក្យក្រសួងការពារជាតិ។ តែអ្នកនាំពាក្យក្រសួងការពារអូស្រា្តលីរូបនេះដដែលមិនបានលំអិតថា តើជំនួបថ្នាក់ក្រសួងការពារជាតិរវាងប្រទេសទាំងពីរបានធ្វើឡើងក្នុងកម្រិតណាទេ។ អ្វីដែលគេដឹង កិច្ចសន្ទនាកន្លះថ្ងៃក្នុងថ្ងៃពុធ ទី២២ មីនាបានធ្វើឡើងនៅក្នុងបរិយាកាសល្អ ប្រកបដោយវិជ្ជាជីវៈ និងបានផ្តោតសំខាន់លើបញ្ហាសន្តិសុខតំបន់។ អ្វីជាការកត់សម្គាល់ ជំនួបថ្នាក់ក្រសួងការពារជាតិរវាងអូស្រា្តលី និងចិនពេលនេះជាជំនួបផ្លូវការលើកទី១ ចាប់តាំងពីឆ្នាំ ២០១៩។
មួយវិញទៀត ជំនួបនេះបានធ្វើឡើងបន្ទាប់ពីចិនបានថ្កោលទោសចាស់ដៃលើអូស្រា្តលីដែលបានចុះកិច្ចព្រមព្រៀងជាមួយអង់គ្លេស និងអាមេរិកកាលពីថ្ងៃទី១៣ មីនា។ នៅក្នុងកិច្ចព្រមព្រៀងនោះ អូស្រ្តាលីគ្រោងទិញនាវាមុជទឹកដើរដោយនុយក្លេអ៊ែរបំពាក់មីស៊ីលរបស់អាមេរិករហូតដល់ទៅចំនួន ៥គ្រឿង។ លើសពីនេះ អូស្រា្តលីគ្រោងសាងសង់នាវាមុជទឹកថ្មីដោយប្រើបច្ចេកវិទ្យារបស់អាមេរិក និងអង់គ្លេស។ ក្រុងប៉េកាំងបានចាត់ទុកការធ្វើដំណើររួមគ្នារវាងអូស្ត្រាលី អង់គ្លេស និងអាមេរិកតាមរយៈកិច្ចព្រមព្រៀងនេះថាជាការដើរលើផ្លូវខុស និងពោរពេញដោយគ្រោះថ្នាក់។
គួររម្លឹកថា តាំងពីអំណាចនៅអូស្ត្រាលីបានធ្លាក់ក្នុងដៃក្រុមកណ្តាល ឆ្វេងនិយមនាខែឧសភា ឆ្នាំ ២០២២ មក រដ្ឋាភិបាលថ្មីអូស្រ្តាលីបានព្យាយាមស្តារឡើងវិញនូវទំនាក់ទំនងជាមួយចិនដែលបានធ្លាក់ដុនដាបខ្លាំងនៅក្នុងជំនាន់រដ្ឋាភិបាលអូស្រ្តាលីអភិរក្សនិយម។ ក្នុងឆ្នាំ ២០២២ រដ្ឋមន្រ្តីការពារជាតិអូស្រា្តលីដែលបានជួបសន្ទនាចំនួន ២ដងជាមួយសមភាគីចិននាឱកាសកិច្ចប្រជុំកំពូលតំបន់បានសាទរពីការមានកិច្ចសន្ទនាប្រក្រតីឡើងវិញ តែមិនបានផ្តល់លំអិតលើខ្លឹមសារនៃការជជែកជាមួយសមភាគីចិនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ