កងទ័ពកូរ៉េខាងត្បូងថា កូរ៉េខាងជើងបាញ់គ្រាប់មីស៊ីលបាលីស្ទិកពិត
មួយថ្ងៃក្រោយ ការចុះផ្សាយព្រោងព្រាត ព័ត៌មានបែកលេចធ្លាយរបស់ក្រសួងការពារជាតិអាមេរិក ដែលថា គ្រាប់មីស៊ីលខ្លះរបស់កូរ៉េខាងជើងជាគ្រាប់ក្លែងក្លាយមិនដំណើរការ កូរ៉េខាងជើង នៅព្រឹកថ្ងៃព្រហស្បតិ៍នេះ បានបាញ់គ្រាប់មីស៊ីលបាលីស្ទិកប្រភេទថ្មី។ ការបាញ់មីស៊ីលបាលីស្ទិករបស់កូរ៉េខាងជើងបានធ្វើឲ្យមានការភ័យស្លន់ស្លោនៅកោះហុកកៃដូ ភាគខាងជប៉ុន ជាទីដែលរដ្ឋាភិបាលប្រកាសអំពាវនាវឲ្យប្រជាជនរត់ជ្រកកោន ដើម្បីជៀសវាង គ្រោះថ្នាក់ ដោយសារគ្រាប់មីស៊ីលរបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
តាមសេនាធិការអន្តរកងទ័ពកូរ៉េខាងត្បូង មីស៊ីលបាលីស្ទិកប្រភេទថ្មី ប្រើចំហេះរឹង ដែលកូរ៉េខាងជើងបាញ់សាកល្បងនៅថ្ងៃព្រហស្បតិ៍នេះ ស្តែងឲ្យឃើញ ពីការរីកចម្រើន បោះជំហានខ្លាំងរបស់របបព្យុងយ៉ាង ក្នុងផ្នែកបច្ចេកវិទ្យាផលិតអាវុធយុទ្ធសាស្រ្ត។ តាមសេចក្តីថ្លែងការណ៍របស់សេនាធិការអន្តរយោធាកូរ៉េខាងត្បូង អាមេរិក និងកូរ៉េខាងត្បូងបានតាមដានយ៉ាងម៉ត់ចត់ ព្រឹត្តិការណ៍បាញ់មីស៊ីល នៅថ្ងៃនេះ ដើម្បីស្វែងយល់ពីការអភិវឌ្ឍកម្មវិធីផលិតមីស៊ីលរបស់កូរ៉េខាងជើង។
រាល់ការបាញ់សាកល្បងមីស៊ីលបាលីស្ទិកអន្តរទ្វីបកន្លងមក កូរ៉េខាងជើងតែងប្រើចំហេះរាវដែលពិបាកក្នុងការធ្វើប្រតិបត្តិការ ព្រោះវាត្រូវការពេលវេលារៀបចំយូរ មុននឹងបាញ់បង្ហោះ ដែលជាហេតុធ្វើឲ្យសត្រូវអាចចាប់សញ្ញា និងបាញ់បំផ្លាញបាន។ ចំណែក ប្រព័ន្ធមីស៊ីលបាលីស្ទិកប្រើចំហេះរឹង ងាយស្រួលនឹងប្រើ ព្រោះវាត្រូវការពេលវេលារៀបចំខ្លី ដែលធ្វើឲ្យសត្រូវពិបាកនឹងចាប់សញ្ញាបាន នៅពេលមិនទាន់ឆេះ។
ការអភិវឌ្ឍប្រព័ន្ធបាញ់មីស៊ីលបាលីស្ទិក ដោយប្រើចំហេះរឹង ជាយុទ្ធសាស្រ្តអាទិភាពរបស់មេដឹកនាំកូរ៉េខាងជើង ដើម្បីផលិតមីស៊ីលទំនើបៗដែលអាចបាញ់ចេញពីដីគោក និងក្រោមសមុទ្រ។ ប្រកាសតាំងខ្លួនជាមហាអំណាចនុយក្លេអ៊ែរ កូរ៉េខាងជើងប្រកាសកាលពីថ្ងៃទី ២៣មីនាកន្លងទៅថា ខ្លួនទើបសាកល្បងបានជោគជ័យ នាវាមុជទឹកដ្រូន ដែលបំពាក់អាវុធនុយក្លេអ៊ែរ។ តាមទីភ្នាក់ងារព័ត៌មានរដ្ឋកូរ៉េខាងជើង KCNA នាវាមុជទឹកគ្មានមនុស្សបើករបស់កូរ៉េខាងជើងមានសមត្ថភាពបង្ករលកយក្សស៊ូណាមី បង្កប់ដោយសារធាតុវិទ្យុសកម្ម។
តាមកងទ័ពកូរ៉េខាងត្បូង មីស៊ីលបាលីស្ទិកដែលកូរ៉េខាងជើងបាញ់សាកល្បងនៅថ្ងៃព្រហស្បតិ៍នេះ អាចជាមីស៊ីលរយៈចម្ងាយមធ្យម ឬចម្ងាយឆ្ងាយ ព្រោះវាបានហោះចម្ងាយ ១ពាន់គីឡូម៉ែត្រមុននឹងធ្លាក់ ទៅក្នុងសមុទ្រជប៉ុន។
នៅជប៉ុន ការបាញ់មីស៊ីលរបស់កូរ៉េខាងជើងបានបង្កឲ្យមានការភ័យជ្រួលច្របល់ការទាញសញ្ញាអាសន្នមួយភ្លែត នៅកោះហុកកៃដូ ភាគខាងជើងជប៉ុន។ ក្រសួងការពារជាតិជប៉ុន បានប្រតិកម្មប្រឆាំងខ្លាំង នឹងការបាញ់សាកល្បងមីស៊ីលរបស់កូរ៉េខាងជើង ចំណែកអ្នកនាំពាក្យរបស់ក្រុមប្រឹក្សាសន្តិសុខជាតិអាមេរិក បានអះអាងថា អាមេរិកនឹងចាត់វិធានការចាំបាច់ដើម្បីធានាសន្តិសុខ សុវត្ថិភាពឲ្យទឹកដីអាមេរិក និងសម្ព័ន្ធមិត្តជប៉ុន កូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ