អាស៊ានទាញសញ្ញាប្រាប់ពីគ្រោះជួញដូរមនុស្សជាបណ្តាញតាមអនឡាញ
មេដឹកនាំប្រទេសជាសមាជិកសមាគមប្រជាជាតិអាស៊ីអាគ្នេយ៍ (អាស៊ាន) បានចេញសេចក្តីថ្លែងការណ៍នៅថ្ងៃពុធទី ១០ ឧសភា២០២៣នេះ ប្រកាសបញ្ចេញសកម្មភាពខ្លាំងជាងមុន ប្រឆាំងនឹងការជួញមនុស្ស តាមអនឡាញ។ ពេលនេះ បណ្តាញជួញដូរមនុស្សចាប់វាយលុកតាមបណ្តាញសង្គម ដើម្បីទាក់ជនរងគ្រោះថ្មីៗបន្ថែមទៀត ឱ្យមករកស៊ីខុសច្បាប់បោកបន្តតាមអ៊ីនធ័រនែត។
ចុះផ្សាយនៅថ្ងៃ៖
ក្នុងជំនួបកំពូលនៅភាគខាងកើតប្រទេសឥណ្ឌូណេស៊ី ប្រមុខរដ្ឋ-រដ្ឋាភិបាលនៃប្រទេសជាសមាជិកសមាគមប្រជាជាតិអាស៊ីអាគ្នេយ៍ហៅកាត់អាស៊ាន បានអនុម័តសេចក្តីថ្លែងការណ៍មួយឈានទៅ ពង្រឹងកិច្ចសហប្រតិបត្តិការនិងការសម្របសម្រួល ការតាមចាប់ក្រុមជួញដូរមនុស្ស តាមអនឡាញ និងវែករកអត្តសញ្ញាណជនរងគ្រោះ។ សមាជិកអាស៊ានទាំងអស់ ក៏បានព្រមព្រៀងពង្រឹងសមត្ថភាពស៊ើបអង្កេត ផ្តោះប្តូរព័ត៌មានគ្នា និងរៀបចំធ្វើប្រតិបត្តិការប្រយុទ្ធប្រឆាំងនឹងការជួញដូរមនុស្ស រួមគ្នាទៀត។
ត្រូវតែកម្ចាត់បទឧក្រិដ្ឋជួញដូរមនុស្សឱ្យខ្ទេចខ្ទីអស់ ! នេះជាការគូសបញ្ជាក់របស់លោកប្រធានាធិបតីឥណ្ឌូណេស៊ី កាលពីថ្ងៃចន្ទ។ បើតាមអង្គការអន្តោប្រវេសន៍អន្តរជាតិ កម្ពុជា ឡាវនិងភូមា ជាទិសដៅសំខាន់បីរបស់បណ្តាញជួញដូរមនុស្សសម្រាប់បញ្ជូនជនរងគ្រោះទៅ។ ការជ្រើសរើសបុគ្គលិក (ជនរងគ្រោះ) ប្រព្រឹត្តទៅនៅក្នុងតំបន់អាស៊ី ជាពិសេសនៅវៀតណាម នៅឥណ្ឌា នៅបង់ក្លាដែស តែជួនកាលក៏មានធ្វើនៅទ្វីបឆ្ងាយ ដល់ប្រទេសប្រេស៊ីល ឬកេនយ៉ាផង។ បន្ទាប់មក ជនរងគ្រោះភាគច្រើនត្រូវបង្ខំចិត្តបំពេញការងារដែលជាសកម្មភាពខុសច្បាប់ តាមអនឡាញ។ នេះបើតាមអង្គការអន្តោប្រវេសន៍អន្តរជាតិដដែល ដែលអះអាងទៀតថា ជនរងគ្រោះភាគច្រើន ជាអ្នកបានរៀនសូត្រមានសញ្ញាប័ត្រខ្ពស់ រស់ក្នុងគ្រួសារវណ្ណៈមធ្យម ដែលមានលទ្ធភាពរកការងារធ្វើយ៉ាងមានកំរិត។ សម្រាប់អង្គការអន្តោប្រវេសន៍អន្តរជាតិ បណ្តាញជួញដូរមនុស្សនេះ មានសកម្មភាពខ្លាំងក្នុងបណ្តាញល្បែងអនឡាញ ក្នុងប្រព័ន្ធរូបិយបណ្ណឌីជីថល (គ្រីតូមូណេ) ការខ្ចីលុយតាមអនឡាញ និងក្នុងវេបសាយរកគូកំណាន់ចិត្ត។ ការបង្ខំឱ្យជនរងគ្រោះប្រព្រឹត្តអំពើបោកប្រាស់តាមអ៊ីនធ័រនែត សំដៅពន្យុះមនុស្សឱ្យធ្វើវិនិយោគលុយឌីជីថលជាអ្វីដែលអាស៊ានព្រួយបារម្ភខ្លាំងជាងគេ។
កាលពីឆ្នាំទៅ ឥណ្ឌូណេស៊ី បានសង្គ្រោះពលរដ្ឋខ្លួន ដែលក្លាយជាជនរងគ្រោះរងការកេងប្រវ័ញ្ច ឱ្យរកស៊ីបោកបន្តតាមអនឡាញនៅកម្ពុជា និងភូមា បានចំនួន ជាងមួយពាន់នាក់។ អាជ្ញាធរហ្វីលីពីន ប្រកាសរំដោះជនរងគ្រោះសញ្ជាតិផ្សេងៗនៅអាស៊ី ដែលត្រូវបណ្តាញជួញដូរមនុស្សបោកឱ្យមករកស៊ីខុសច្បាប់តាមអនឡាញនៅហ្វីលីពីន បានប្រមាណមួយពាន់នាក់ដែរ នៅសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ