តុលាការកំពូលប៉ាគីស្ថានចាត់ទុកការចាប់ខ្លួនលោកអ៊ីមរ៉ាន់ ខាន់ ថា ខុសច្បាប់
នៅប៉ាគីស្ថាន ពីរថ្ងៃក្រោយកងទ័ពចូលចាប់ខ្លួនអតីតនាយករដ្ឋមន្រ្តី លោកអ៊ីមរ៉ាន់ ខាន់ ដល់ក្នុងតុលាការ ប្រធានតុលាការកំពូលប៉ាគីស្ថាន នៅថ្ងៃព្រហស្បតិ៍ម្សិលមិញ បានសម្រេចថា ការចាប់ខ្លួនលោកអ៊ីមរ៉ាន់ ខាន់ ធ្វើឡើងដោយខុសច្បាប់។ នៅក្នុងការសម្រេចរបស់ប្រធានតុលាការកំពូល អំណើះតទៅ គឺគ្មានការចាប់ខ្លួនមនុស្ស នៅក្នុងបរិវេណទីតាំងរបស់តុលាការដាច់ខាត។ ការសម្រេចរបស់តុលាការកំពូល ធ្វើឡើងនៅក្នុងខណៈពេល អ្នកគាំទ្រអតីតនាយករដ្ឋមន្រ្តីអ៊ីមរ៉ាន់ ខាន់ នៅបន្តចុះថ្នល់ធ្វើបាតុកម្មហិង្សាប្រឆាំងនឹងកងទ័ពដែលជាអ្នកចុះចាប់លោកអ៊ីមរ៉ាន់ ខាន់ កាលពីថ្ងៃអង្គារ។
ចុះផ្សាយនៅថ្ងៃ៖
នៅថ្ងៃអង្គារអតីតនាយករដ្ឋមន្រ្តីប៉ាគីស្ថាន លោកអ៊ីមរ៉ាន់ ខាន់ត្រូវក្រុមទាហានប៉ារ៉ាចុះចាប់ខ្លួនដល់ក្នុងតុលាការ ជាទីដែលលោកត្រូវបង្ហាញខ្លួនក្នុងសំណុំរឿងចោទប្រកាន់ប្រព្រឹត្តអំពើពុករលួយ។ ប៉ុន្តែ នៅថ្ងៃព្រហស្បតិ៍ តុលាការកំពូលប៉ាគីស្ថានបានសម្រេចថា ការចាប់ខ្លួនលោកអ៊ីមរ៉ាន់ ខាន់ធ្វើឡើងដោយខុសច្បាប់។
នៅក្នុងសវនាការ កាលពីថ្ងៃព្រហស្បតិ៍ ប្រធានតុលាការកំពូល លោក Umar Ata Bandial បាននិយាយប្រាប់អតីតនាយករដ្ឋមន្រ្តីប៉ាគីស្ថាន ថា ការចាប់ខ្លួនលោកអ៊ីមរ៉ាន់ ខាន់ នៅតុលាការ ជារឿងខុសច្បាប់ និងថា គេត្រូវពិនិត្យសើរើសំណុំរឿងនេះសាឡើងវិញ។
ការចាប់ខ្លួនលោកអ៊ីមរ៉ាន់ ជារឿងខុសច្បាប់ ប៉ុន្តែ លោកអ៊ីមរ៉ាន់ ខាន់ មិនត្រូវតុលាការដោះលែងឲ្យនៅក្រៅឃុំ តាមការស្នើសុំរបស់លោកអ៊ីមរ៉ាន់ ខាន់ឡើយ។ លោកអ៊ីមរ៉ាន់ ខាន់ ត្រូវបន្តស្ថិតនៅក្រោមការគ្រប់គ្រងរបស់ប៉ូលិស ក្នុងពេលរង់ចាំសវនាការមួយទៀត នៅថ្ងៃសុក្រ។ តាមការសម្រេចរបស់ប្រធានតុលាការកំពូលប៉ាគីស្ថាន ក្នុងហេតុផលការពារសន្តិសុខ លោកអ៊ីមរ៉ាន់ ខាន់ ត្រូវបញ្ជូនឲ្យទៅនៅទីស្នាក់ការរបស់ប៉ូលិសក្នុងរដ្ឋធានីអ៊ីស្លាម៉ាបាត ក្នុងនាមភ្ញៀវ ប៉ុន្តែមិនមែនជាជនជាប់ទោស។
នៅតុលាការកំពូល កាលពីថ្ងៃព្រហស្បតិ៍ លោកអ៊ីមរ៉ាន់ ខាន់និយាយប្រាប់ចៅក្រមថា លោកត្រូវគេធ្វើ បាបលោក ដូចលោកជាភេរវជន។
អតីតកីឡាករជើងឯក Criket របស់ប៉ាគីស្ថាន លោកអ៊ីមរ៉ាន់ខាន់ ធ្លាប់និយាយថា ក្តីក្តាំ ពាក្យបណ្តឹង ប្រឆាំងលោកទៅតុលាការ ជាផែនការរបស់រដ្ឋាភិបាល និងកងទ័ពដែលចង់រារាំងមិនឲ្យលោកត្រលប់មកឈរឈ្មោះ នៅក្នុងការបោះឆ្នោត ដែលគ្រោងធ្វើនៅអំឡុងខែតុលាខាងមុខ។ លោកអ៊ីមរ៉ាន់ ខាន់ ត្រូវទាហានប៉ារ៉ាចូលចាប់ខ្លួន ដល់ក្នុងតុលាការ បន្ទាប់ពីកងទ័ពដែលជាស្ថាប័នដ៏មានអំណាច នៅប៉ាគីស្ថាន ស្តីបន្ទោស លោកអ៊ីមរ៉ាន់ខាន់ ក្នុងរឿងដែលលោកហ៊ានចោទប្រកាន់មន្រ្តីយោធាថា មានផែនការប៉ងចង់ធ្វើឃាតរូបលោក។
នៅប៉ាគីស្ថាន ការរិះគន់ស្ថាប័នកងទ័ព ត្រូវបានចាត់ទុកថា ជាការរំលោភខ្សែបន្ទាត់ក្រហម។ នៅថ្ងៃព្រហស្បតិ៍ កងទ័ពបានចេញសេចក្តីថ្លែងការណ៍ព្រមានចាត់វិធានការខ្លាំងៗប្រឆាំងរាល់អ្នកដែលវាយប្រហារ ដុតបំផ្លាញទីតាំងរបស់រដ្ឋ និងកងទ័ពប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ