មូលនិធិរូបិយវត្ថុអន្តរជាតិស្នើឲ្យស្រីលង្កាពន្លឿនការរៀបចំរចនាសម្ព័ន្ធបំណុលរបស់ខ្លួន
នៅក្នុងប្រទេសស្រីលង្កា ទស្សនកិច្ចរយៈពេល ១២ថ្ងៃរបស់គណៈប្រតិភូនៃមូលនិធិរូបិយវត្ថុអន្តរជាតិ IMF បានបញ្ចប់នាថ្ងៃអង្គារ ទី២៣ ឧសភា។ គោលដៅនៃទស្សនកិច្ច គឺជជែកជាមួយរដ្ឋាភិបាលក្រុងកូឡុំបូស្តីពីគម្រោងកំណែទម្រង់ដែលស្រីលង្កាបានសន្យាជាមួយ IMF ដើម្បីអាចទទួលបានប្រាក់កម្ចីពី IFM។ គណៈប្រតិភូ IFM បានបញ្ជាក់នៅក្នុងសេចក្តីប្រកាសព័ត៌មានថា ការបន្តរក្សានូវថាមវ័ន្តនៃកំណែទម្រង់ និងការអនុវត្តន៍ទាន់ពេលនូវកម្មវិធីដែលបានសន្យាជារឿងសំខាន់ដើម្បីឲ្យស្រីលង្កាងើបរួចពីវិបត្តិសេដ្ឋកិច្ច។
ចុះផ្សាយនៅថ្ងៃ៖
ស្តាប់ - ០២:២៥
នៅក្នុងបេសកម្មរយៈពេល ១២ថ្ងៃ គណៈប្រតិភូរបស់មូលនិធិរូបិយវត្ថុអន្តរជាតិ IMF បានទទួលស្គាល់ពីការចម្រើនទៅមុខនៃការអនុវត្តន៍លើកម្មវិធីកំណែទម្រង់របស់រដ្ឋាភិបាលស្រីលង្កា។ តែបានបញ្ជាក់ថា នៅមានកិច្ចការជាច្រើនទៀតដែលត្រូវធ្វើ ហើយរដ្ឋាភិបាលត្រូវប្រឹងប្រែងឲ្យបានលឿនបន្ថែមទៀត។ ក្នុងខែមីនាកន្លងទៅ IMF បានអនុម័តលើផែនការសង្រ្គោះមួយដែលមានទឹកប្រាក់ចំនួន ២ ៩០០លានដុល្លារឲ្យស្រីលង្កាជាថ្នូរនឹងការសន្យារបស់ស្រីលង្កាក្នុងការអនុវត្តន៍លើកម្មវិធីកំណែទម្រង់រយៈពេល ៤៨ខែ។ គណៈប្រតិភូ IMF បានថ្លែងថា ខ្លួនកំពុងរង់ចាំនូវការរីកចម្រើនថ្មីៗទៀតនាខែកញ្ញាខាងមុខ។
គួរបញ្ជាក់ថា ក្រោយពីបានខកខានការសងបំណុលបរទេសចំនួន ៤៦ ០០០លានដុល្លារកាលពីខែមេសា ឆ្នាំ ២០២២ មក ស្រីលង្កាសង្ឃឹមទទួលបានកិច្ចព្រមព្រៀងឆាប់រហ័សជាមួយម្ចាស់បំណុល។ តែបញ្ហានៅត្រង់ថា ការជជែកស្តីពីការសើរើបំណុលបរទេសជាមួយម្ចាស់បំណុលទើបតែចាប់ផ្តើមនៅខែមេសាកន្លងទៅប៉ុណ្ណោះ។ IMF យល់ថា ការឈានទៅមានកិច្ចព្រមព្រៀងទាន់ពេលស្តីពីការសើរើបំណុលបរទេសជាមួយម្ចាស់បំណុលជារឿងចាំបាច់ដើម្បីស្តារនិរន្តរភាពបំណុលរបស់ស្រីលង្កា។ តាមពិត ចិនដែលជាម្ចាស់បំណុលទ្វេភាគីធំជាងគេរបស់ស្រីលង្កាបានពន្យារការសុំសើរើបំណុលរបស់ស្រីលង្កា។
ចិនបានយល់ព្រមឲ្យស្រីលង្កាផ្អាកការសងបំណុលរបស់ខ្លួនរយៈពេល ២ឆ្នាំ តែមិនបានបញ្ចុះចំនួនប្រាក់បំណុលទេ។ បន្ទាប់មកក្នុងខែមីនា ចិនបានផ្តល់ការធានាហិរញ្ញវត្ថុដល់ស្រីលង្កា។ ជាមួយនឹងការធានានេះ IMF បានប្រគល់ឲ្យស្រីលង្កានូវប្រាក់កម្ចីដំបូងចំនួន ៣៣០លានដុល្លារពីក្នុងប្រាក់កម្ចីសរុប ២ ៩០០លានដុល្លារ។ ក្រៅពីបំណុលបរទេស IMF ក៏បានស្នើស្រីលង្កាឲ្យសើរើលើបំណុលក្នុងស្រុករបស់ខ្លួនដែរ។ បំណុលក្នុងស្រុកដែលមានប្រមាណជា ៥០ ០០០លានដុល្លារគិតត្រឹមដំណាច់ឆ្នាំ ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ