បាតុករស្រីលង្កាខកចិត្តនឹងសមាសភាពរដ្ឋាភិបាលថ្មីរបស់លោកប្រធានាធិបតី រ៉ានីល វីក្រេមេស៊ីងហ្កេ
សមាសភាពរបស់រដ្ឋាភិបាលថ្មីរបស់ស្រីលង្កាបានស្បថចូលកាន់តំណែង កាលពីល្ងាចថ្ងៃសុក្រទី ២២កក្កដា។ ដោយមានលោកឌីណេស ហ្គូវ៉ាដេណា កាន់តែតំណែង ជានាយករដ្ឋមន្រ្តី រដ្ឋាភិបាលថ្មីរបស់ស្រីលង្កា សំបូរដោយមន្រ្តីដែលស្និទ្ធនឹងរដ្ឋាភិបាលមុនរបស់លោកប្រធានាធិបតីហ្គោតាបាយ៉ា រ៉ាចាប៉ាក់សេ ដែលត្រូវបង្ខំចិត្តលាលែងចេញពីតំណែង និងរត់ចាកចោលប្រទេស ដោយសារមហាបាតុកម្មប្រឆាំងតវ៉ា របស់ចលនាមហាជនស្រីលង្កា។
ចុះផ្សាយនៅថ្ងៃ៖
ស្តាប់ - ០២:១០
សម្រាប់ប្រជាជនស្រីលង្កាដែលបានចុះថ្នល់ធ្វើបាតុកម្មជាង ៣ខែមកហើយ ដើម្បីបណ្តេញមេដឹកនាំត្រកូលរ៉ាចាប៉ាក់សេ ចេញពីអំណាច វាជាការខកចិត្តដ៏ធំសម្បើម ដែលឃើញសមាសភាពរបស់រដ្ឋាភិបាលថ្មី សុទ្ធសឹងជាមនុស្សស្និទ្ធនឹងត្រកូលរ៉ាចាប៉ាក់សេ។ មន្រ្តីរដ្ឋាភិបាលទាំង១៨រូប ជាអ្នកនយោបាយដែលធ្លាប់កាន់តំណែង នៅក្នុងរដ្ឋាភិបាលរបស់លោកអតីតប្រធានាធិបតី ហ្គោតាបាយ៉ា រ៉ាចាប៉ាក់សេ។ លោកនាយករដ្ឋមន្រ្តី ឌីណេស ហ្គូវ៉ាដេណាផ្ទាល់ជាមនុស្សស្និទ្ធនឹងក្រុមគ្រួសាររ៉ាចាប៉ាក់សេ បើនិយាយពីផ្នត់គំនិត និងមនោគមវិជ្ជា។ លោកធ្លាប់ជារដ្ឋមន្រ្តីមុខងារសាធារណៈ នៅក្នុងអាណត្តិដឹកនាំរបស់លោកប្រធានាធិបតីម៉ាហិនដា រ៉ាចាប៉ាក់សេ នៅឆ្នាំ ២០១០។ ចំណែក រដ្ឋមន្រ្តីការបរទេសថ្មី Ali Sabry ជាមេធាវីផ្ទាល់ខ្លួនរបស់គ្រួសាររ៉ាចាប៉ាក់សេ។
នៅចំពោះការទាមទាររបស់បាតុករស្រីលង្កាដែលចង់បានមេដឹកនាំថ្មី ដែលមានសមត្ថភាពដឹកនាំស្រីលង្កា លោករ៉ានីល វីក្រេមេស៊ីងហ្កេបានស្នើបង្កើតរដ្ឋាភិបាលថ្មី ដោយមានការចូលរួមពីបក្សប្រឆាំង។ ប៉ុន្តែ ការបង្កើតរដ្ឋាភិបាលថ្មី ប៉ុន្តែ ជាមួយសមាជិក អ្នកនយោបាយរបស់គណបក្សកាន់អំណាចរបស់ត្រកូលរ៉ាចាប៉ាក់សេ ជាភស្តុតាងបង្ហាញថា លោកប្រធានាធិបតី រ៉ានីល វីក្រេមេស៊ីងហ្កេ មិនបានគោរពតាមការសន្យា។ ម្យ៉ាង បាតុករស្រីលង្កាបារម្ភថា ដោយមានមនុស្សស្និទ្ធរបស់ខ្លួនក្នុងរដ្ឋាភិបាលថ្មី ត្រកូលរ៉ាចាប៉ាក់សេនៅតែអាចបញ្ជា មានអំណាចកាច់ចង្កូតស្រីលង្កា។
និយាយពីផ្នែកសេដ្ឋកិច្ច ស្រីលង្កាដែលដឹកនាំដោយលោកនាយករដ្ឋមន្រ្តី ឌីណេស ហ្គូវ៉ាដេណា ដែលមាននិន្នាការទៅខាងលោកសង្គមនិយម នឹងអាចប៉ះទង្គិចគ្នាខ្លាំងជាមួយមូលនិធិរូបិយវត្ថុអន្តរជាតិ IMF នៅក្នុងការចរចាផ្តល់ប្រាក់កម្ចីសម្រាប់ស្រោចស្រង់សេដ្ឋកិច្ចស្រីលង្កា។
លោកឌីណេស ហ្គូវ៉ាដេណាជាអ្នកប្រឆាំងដាច់ខាតនឹងនយោបាយសេដ្ឋកិច្ចសេរី ដោយចង់បញ្ចូលវិស័យឯកជនមកស្ថិតក្រោមការគ្រប់គ្រងរបស់រដ្ឋ។ ប៉ុន្តែ មូលនិធិIMFធ្លាប់បានដាក់លក្ខខណ្ឌឲ្យរដ្ឋាភិបាលស្រីលង្កាត្រូវតែដកខ្លួនចេញពីសេដ្ឋកិច្ច ជាថ្នូរនឹងការផ្តល់ប្រាក់កម្ចី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ