អង្គការស្បៀងអាហារពិភពលោកប្រកាសពីការកាត់បន្ថយជំនួយស្បៀងអាហារសម្រាប់ជនភៀសខ្លួនរ៉ូហ៊ីងយ៉ានៅបង់ក្លាដែស
អង្គការស្បៀងអាហារពិភពលោកហៅកាត់ជាភាសាអង់គ្លេស WFP បានប្រកាសក្នុងថ្ងៃចន្ទ ទី២២ ឧសភាពីគម្រោងកាត់បន្ថយជំនួយស្បៀងអាហារសម្រាប់ជនភៀសខ្លួនរ៉ូហ៊ីងយ៉ាដែលកំពុងរស់នៅក្នុងជំរំក្នុងប្រទេសបង់ក្លាដែស។ មូលហេតុនៃការកាត់បន្ថយគឺមកពីខ្វះថវិកា។ នេះជាលើកទី២ ក្នុងរយៈពេល ៣ខែដែលស្ថាប័នរបស់អង្គការសហប្រជាជាតិមួយនេះបានសម្រេចកាត់បន្ថយជំនួយសម្រាប់ជនភៀសខ្លួនរ៉ូហ៊ីងយ៉ានៅបង់ក្លាដែស។
ចុះផ្សាយនៅថ្ងៃ៖
ស្តាប់ - ០២:៣៦
នៅក្នុងខែមីនាកន្លងទៅ ទឹកប្រាក់ដែលអង្គការស្បៀងអាហារពិភពលោក WFP បានប្រគល់ឲ្យជនភៀសខ្លួនរ៉ូហ៊ីងយ៉ាម្នាក់ៗក្នុងមួយខែបានធ្លាក់ពី ១២ដុល្លារមកនៅត្រឹម ១០ដុល្លារ។ តែចាប់ពីថ្ងៃទី១ មិថុនាខាងមុខទៅ ពួកគេនឹងទទួលបានតែ ៨ដុល្លារប៉ុណ្ណោះ។ ឃើញថាក្នុងរយៈពេលតែ ៣ខែ ពួកគេបានបាត់បង់ចំណូលដល់ទៅ ៤ដុល្លារក្នុងមួយខែ។ ៤ដុល្លារគឺច្រើនណាស់សម្រាប់អ្នកដែលរស់នៅពឹងលើជំនួយអន្តរជាតិ។ លោកគុន លី អ្នកនាំពាក្យ WFP បានបញ្ជាក់ថា ការកាត់បន្ថយដោយសារតែ WFP ខ្វះលុយ។ តែលោកគុន លីមិនភ្លេចបន្ថែមថា ដើម្បីអាចមានលុយឲ្យជនភៀសខ្លួនរ៉ូហ៊ីងយ៉ាម្នាក់ៗចំនួន ១២ដុល្លារក្នុងមួយខែឡើងវិញ WFP ត្រូវការលុយជាបន្ទាន់ចំនួន ៥៦លានដុល្លារ។
គួររម្លឹកថា ប្រទេសបង់ក្លាដែសកំពុងទទួលឲ្យជ្រកកោនលើទឹកដីរបស់ខ្លួននូវជនភៀសខ្លួនរ៉ូហ៊ីងយ៉ាអ្នកកាន់សាសនាអ៊ីស្លាមប្រមាណ ១លាននាក់ក្នុងនោះមាន ៧៥០ ០០០នាក់បានភៀសខ្លួនចេញពីភូមាក្នុងឆ្នាំ ២០១៧ គេចពីការធ្វើទុក្ខបុកម្នេញរបស់កងទ័ពភូមា។ លោកឃិន មង ប្រធានសមាគមរ៉ូហ៊ីងយ៉ាក្នុងជំរំមួយបានថ្លែងថា ការប្រកាសកាត់បន្ថយលុយជាថ្មីរបស់ WFP ជារឿងភ្ញាក់ផ្អើលសម្រាប់ជនភៀសខ្លួនរ៉ូហ៊ីងយ៉ាដែលកំពុងប្រឈមនឹងភាពអត់ឃ្លាន។ តាមលោកឃិន មង ការសម្រេចរបស់ WFP ជារឿងនយោបាយ ព្រោះមានអ្នកខ្លះបានលើកឡើងថា នេះជាលេសមួយដើម្បីបង្ខំឲ្យពួករ៉ូហ៊ីងយ៉ាត្រឡប់ទៅភូមាវិញ។
នៅខាងបង់ក្លាដែស រដ្ឋាភិបាលក្រុងដាកានៅមិនទាន់មានប្រតិកម្មយ៉ាងណាចំពោះវិធានការថ្មីរបស់អង្គការស្បៀអាហារពិភពលោកពេលនេះទេ។ តែក្រុមអង្គការអ្នករៀបចំផ្តល់ជំនួយឲ្យជនភៀសខ្លួនបានអះអាងថា ការកាត់បន្ថយជំនួយកាលពីខែមីនាបានបង្កឲ្យមានការលំបាកយ៉ាងខ្លាំង ខណៈដែលកង្វះអាហារូបត្ថម្ភបានក្លាយជាជំងឺរាតត្បាតនៅក្នុងជំរំ។ គួរបញ្ជាក់ថា ភូមា និងបង់ក្លាដែសបានចុះកិច្ចព្រមព្រៀងដើម្បីបញ្ជូនជនភៀសខ្លួនរ៉ូហ៊ីងយ៉ាទៅភូមាវិញ។ តែការអនុវត្តន៍កិច្ចព្រមព្រៀងមួយនេះកំពុងជួបការលំបាកដោយសារតែពួករ៉ូហ៊ីងយ៉ាភាគច្រើនមិនចង់ត្រឡប់ទៅភូមាក្រោមហេតុផលមិនទុកចិត្តរដ្ឋាភិបាលភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ