ប៉ាគីស្ថាន៖រដ្ឋាភិបាលបង្ហាញថវិកាសម្រាប់ឆ្នាំ ២០២៣-២០២៤ ក្នុងទឹកប្រាក់ជាង ៥០ ០០០លានដុល្លារ
នៅក្នុងប្រទេសប៉ាគីស្ថាន រដ្ឋាភិបាលបានបង្ហាញក្នុងថ្ងៃសុក្រ ទី៩ មិថុនានូវកញ្ចប់ថវិកាជាង ៥០ ០០០លានដុល្លារសម្រាប់ការចំណាយឆ្នាំ ២០២៣ និង២០២៤។ ក្នុងចំនួនទឹកប្រាក់ទាំងជាង ៥០ ០០០លានដុល្លារនេះមានជាងពាក់កណ្តាលសម្រាប់បម្រើផ្នែកសេវាបំណុល។ គួរបញ្ជាក់ថា ក្នុងនាមជាប្រទេសដែលមានចំនួនប្រជាជនច្រើនជាងគេលំដាប់ទី៥ ក្នុងលោក ប៉ាគីស្ថានកំពុងមានកំណើនអតិផរណាខ្ពស់ និងកំពុងជំពាក់បំណុលបរទេសវ័ន ក។
ចុះផ្សាយនៅថ្ងៃ៖
ស្តាប់ - ០២:៤១
នៅក្នុងកញ្ចប់ថវិកាដែលមានទឹកប្រាក់ជាង ៥០ ០០០លានដុល្លារ មានជាងពាក់កណ្តាលសម្រាប់សងបំណុលបរទេស។ ចំណែកទឹកប្រាក់ដែលនៅសេសសល់ត្រូវបានរដ្ឋាភិបាលគ្រោងចាយវាយដើម្បីស្តារវិបត្តិសេដ្ឋកិច្ចឡើងវិញ ក្នុងនោះ មានប្រមាណជាង ៣ ៣០០លានដុល្លារសម្រាប់ចំណាយលើគម្រោងអភិវឌ្ឍន៍ណាដែលអាចជួយលើកស្ទួយជីវភាពរស់នៅរបស់ប្រជាជន ក្នុងនោះ មានការដំឡើងប្រាក់ខែឲ្យមន្រ្តីរដ្ឋការដល់ ៣៥% និង ១៧,៥% សម្រាប់មន្រ្តីរដ្ឋការដែលចូលនិវត្តន៍។ តើរូបភាពនេះមិនមែនជាយុទ្ធនាការទាក់ទាញអ្នកបោះឆ្នោតដែលប៉ាគីស្ថានគ្រោងរៀបចំបោះឆ្នោតជាតិក្នុងឆ្នាំ ២០២៣ នេះទេ ឬយ៉ាងណា?។
រដ្ឋមន្រ្តីហិរញ្ញវត្ថុបានថ្លែងធានានៅក្នុងសភាថា ថវិកាដែលទើបអនុម័តនេះជាថវិកាដែលមានការទទួលខុសត្រូវ ពោលមិនមែនជាថវិកាដើម្បីសន្លឹកបោះឆ្នោតទេ ទោះបីជាការបោះឆ្នោតជិតចូលដល់ក៏ដោយ។ ចំណែកនាយករដ្ឋមន្រ្តីលោកស្ហេបា ស្ហារីស្វបានថ្លែងដោយសុទិដ្ឋិនិយមថា មូលនិធិរូបិយវត្ថុអន្តរជាតិ IMF នឹងពន្យារពេលផ្តល់ប្រាក់កម្ចីឲ្យប៉ាគីស្ថានក្នុងខែមិថុនានេះ។ តាមលោកស្ហេបា ស្ហារីស្វ វាគ្មានឧបសគ្គអ្វីទាំងអស់នៅក្នុងរឿងនេះ ព្រោះ IMF បានឲ្យភ្លើងខៀវជាពាក្យសម្តីរួចហើយ។ គួរបញ្ជាក់ថា ប៉ាគីស្ថានត្រូវការប្រាក់កម្ចីរបស់ IMF ដើម្បីអាចងើបចេញពីវិបត្តិសេដ្ឋកិច្ច។
តែប្រាក់កម្ចីនេះមិនមែនគ្មានលក្ខខណ្ឌនោះទេ។ ដើម្បីអាចផ្តល់លុយដំណាក់ការថ្មីនៅក្នុងកញ្ចប់ប្រាក់កម្ចីចំនួន ៦ ៥០០លានដុល្លារដែលបានអនុម័តកាលពីឆ្នាំ ២០១៩ IMF បានស្នើឱ្យប៉ាគីស្ថានស្វែងរកហិរញ្ញប្បទានបន្ថែមពីក្រៅ ដកចេញមួយផ្នែកនូវឧបត្ថម្ភធនសម្រាប់ការបោះឆ្នោត និងអនុញ្ញាតឱ្យតម្លៃប្រាក់រូពីឡើង ចុះដោយសេរីជាមួយនឹងតម្លៃប្រាក់ដុល្លារ។ រហូតមកដល់ពេលនេះ រដ្ឋាភិបាលនៅមិនទាន់អាចសម្រេចកម្មវត្ថុនៃកំណើនសេដ្ឋកិច្ចបានទេ ព្រោះកំណើនសេដ្ឋកិច្ចសម្រាប់ឆ្នាំ ២០២២ ២០២៣ មានត្រឹម ០,៣% ប៉ុណ្ណោះ។
ចំណែកកញ្ចប់ថវិកាសម្រាប់ ២០២៣-២០២៤ ត្រូវបានរដ្ឋាភិបាលសន្មត់លើកំណើនសេដ្ឋកិច្ច ៣,៥% និងអត្រាអតិផរណាចំនួន ២១% ខណៈដែលធនាគារពិភពលោកសន្មត់មានកំណើនសេដ្ឋកិច្ចត្រឹម ២% និងមានអត្រាអតិផរណាដល់ទៅ ៣៧,៩៧%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ