ភូមាសារភាពថាគ្មានសមត្ថភាពប្រយុទ្ធប្រឆាំងនឹងកំណើននៃការជួញដូរគ្រឿងញៀន
នៅថ្ងៃចន្ទ ទី ២៦មិថុនានេះ ក្នុងឱកាសទិវាអន្តរជាតិប្រឆាំងនឹងការប្រើប្រាស់និងជួញដូរគ្រឿងញៀន របបសឹកភូមា បានបើកប្រតិបត្តិការដុតបំផ្លាញ គ្រឿងញៀន ចាប់បានក្នុងតម្លៃជិតកន្លះពាន់លានដុល្លារ។ ប៉ុន្តែទន្ទឹមគ្នានេះ អាជ្ញាធរបានទទួលស្គាល់អំពីអសមត្ថភាពរបស់ខ្លួន ក្នុងការប្រយុទ្ធប្រឆាំងនឹងការផលិតនិងជួញដូរគ្រឿងញៀននៅក្នុងប្រទេស។
ចុះផ្សាយនៅថ្ងៃ៖
ស្តាប់ - ០២:០៤
គំនរថ្នាំញៀន ហេរ៉ូអ៊ីន កញ្ឆា មេតំហ្វេតាមីន អាភៀន ដែលសរុបជាទឹកប្រាក់មានតម្លៃប្រមាណ៤៤៥លានដុល្លារ ត្រូវបានអាជ្ញាធរយកគដុតឱ្យឆេះក្នុងអណ្តាតភ្លើង ក្លាយជាផ្សែងអស់ ក្នុងក្របខ័ណ្ឌនៃប្រតិបត្តិការប្រយុទ្ធប្រឆាំងនឹងគ្រឿងញៀនប្រចាំឆ្នាំ។ នេះបើតាមរូបភាពផ្សព្វផ្សាយតាមបណ្តាញទូរទស្សន៍ជាតិ នាឱកាសទិវាអន្តរជាតិប្រឆាំងនឹងគ្រឿងញៀនថ្ងៃទី ២៦មិថុនា។
ប៉ុន្តែថ្វីបើ អាជ្ញាធរ អាចចាប់ខ្លួន អ្នកញៀន អ្នកផលិត អ្នកជំនួញ និងបណ្តាញជួញដូរគ្រឿងញៀន ដ៏ច្រើនលើសលុប ហើយបញ្ជូនទៅតុលាការដើម្បីកាត់ទោសតាមផ្លូវច្បាប់ក្តី ក៏ផលិតកម្ម និងការជួញដូរគ្រឿងញៀនមិនបានចុះថយទេ នៅភូមា។ នេះជាពាក្យសារភាពដ៏កម្រមួយរបស់ប្រមុខស្ថាប័នប្រយុទ្ធប្រឆាំងនឹងគ្រឿង Soe Htut ទៅកាន់សារព័ត៌មានផ្លូវការ Global New Light of Myanmar។
តំបន់ព្រំដែនភូមាដែលជាចំណុចប្រសព្វបីប្រទេស ភូមា ឡាវ ថៃ ឬហៅថាតំបន់ត្រីកោណមាស ជាជង្រុកផលិតនិងជួញដូរគ្រឿងញៀនខុសច្បាប់ ពិសេសមេតំហ្វេតាមីន និងអាភៀន តាំងពីយូរយារមកហើយ។ បើតាមអង្គការសហប្រជាជាតិ តំបន់ត្រីកោណមាសដែលស្ថិតក្នុងរដ្ឋShanភូមា ជាប្រភពគ្រឿងញៀនមេតំហ្វេតាមីនលេខមួយប្រចាំតំបន់អាស៊ីអាគ្នេយ៍ និងជាជម្រករបស់ពួកឧទ្ទាមជនជាតិភាគតិចប្រដាប់អាវុធនិងក្រុមប្រដាប់អាវុធស្និទ្ធនឹងយោធា។ យោធាដែលបានធ្វើរដ្ឋប្រហារទម្លាក់រដ្ឋាភិបាលស៊ីវិលភូមានៅឆ្នាំ២០២១ គ្មានចេតនាបិទបញ្ចប់សកម្មភាពពាណិជ្ជកម្មដ៏ងាយចំណេញនេះទេ តែសម្រាប់អ្នកជំនាញឯករាជ្យ គឺពួកយោធាជាអ្នកការពារពាណិជ្ជកម្មនេះ (បណ្តាញអ្នកជួញដូរគ្រឿងញៀន) តាំងពីជាច្រើនឆ្នាំមកហើយ។
កាលពីឆ្នាំទៅអង្គការសហប្រជាជាតិ ចាប់បានគ្រឿងញៀនមេតំហ្វេតាមីន ទម្រង់Crystal Meth ក្នុងចំនួនដ៏ច្រើនបំផុតមិនធ្លាប់មាន (២៣តោន) នៅភូមា ដែលការដាំដុះអាភៀនរីក ខ្លាំងមែនទែន តាំងពីប្រទេសធ្លាក់ក្នុងភាពវឹកវដោយរដ្ឋប្រហារមក។ ជំនួញកាន់តែដុះដាល តម្លៃលក់ដុំនិងលក់រាយបានធ្លាក់ចុះយ៉ាងខ្លាំងនៅទូទាំងតំបន់អាស៊ីអាគ្នេយ៍ហើយ បណ្តាញជួញដូរគ្រឿងញៀនកាន់តែមានឥទ្ធិពល គ្មានខ្លាចរអានឹងការចាប់ខ្លួនទេ។ នេះបើតាមភ្នាក់ងាប្រយុទ្ធប្រឆាំងគ្រឿងញៀនរបស់អង្គការសហប្រជាជាតិ ដោយបន្ថែមទៀតថា ចំការអាភៀនភូមាបច្ចុប្បន្នមានទំហំប្រមាណជាង ៤ម៉ឺនហិចតារ ពោលគឺជិតពាក់កណ្តាលនៃផ្ទៃក្រឡាក្រុងញូវយ៉ក។
ក្នុងកំរិតពិភពលោកវិញ អង្គការសហប្រជាជាតិបានទាញអាសន្ននៃរីករាលដាលគ្រឿងញៀនសំយោគ ដោយមានកំណើនអ្នកជក់ដល់ទៅ ២៣%ក្នុងរយៈពេលតែ១០ឆ្នាំ ឬត្រូវជា២៩៦លាននាក់។ កាន់តែគួរឱ្យព្រួយបារម្ភទៀត ចំនួនអ្នកប្រព្រឹត្តគ្រឿងញៀន មានបញ្ហាសុខភាពបានកើនឡើង៤៥% ព្រោះថ្នាំញៀនសំយោគញៀនខ្លាំងជាងអាភៀន៥០ដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ