ការនាំចេញទំនិញរបស់ចិន បន្តធ្លាក់ចុះ នៅក្នុងខែមិថុនា
ការនាំចេញទំនិញរបស់ចិន គឺជាវិស័យចម្បងសម្រាប់សេដ្ឋកិច្ចជាតិចិន បានបន្តធ្លាក់ចុះ នៅក្នុងខែមិថុនា ហើយវិស័យនាំចូលទំនិញវិញ ក៏បន្តរក្សានៅចំណុចក្រហម ជាចំណុចមិនសូវល្អដដែល។ ទាំងនេះ គឺនឹងនាំឲ្យសុខភាពកំណើនសេដ្ឋកិច្ចចិន សម្រាប់ទិន្នន័យត្រីមាសទី២ ច្បាស់ជាមិនសូវជាល្អប៉ុន្មានឡើយ។
ចុះផ្សាយនៅថ្ងៃ៖
ការចេញទំនិញចិន បានធ្លាក់ចុះជាខ្លាំង នារយៈ ៣ ឆ្នាំចុងក្រោយនេះ។ បញ្ហាចម្បង គឺផលប៉ះពាល់មកពីវិបត្តិជំងឺរាតត្បាតសកល កូវីដ១៩ ហើយការអនុវត្តគោលនយោបាយ«កូវីដសូន្យ»របស់រដ្ឋអំណាចចិន ដែលបិទខ្ទប់ប្រទេសដ៏តឹងរឹង កាលពីឆ្នាំទៅមិញ ក៏បានជះឥទ្ធិពលមិនល្អទាល់តែសោះ ដល់សុខភាពសេដ្ឋកិច្ច និងវិស័យនាំចេញទំនិញរបស់ចិន។ ក្រោយពីរងគ្រោះខាងនាំចេញច្រើនហើយ និងត្រូវប្រជាជនតវ៉ាបាតុកម្មប្រឆាំងផង ទើប ថ្នាក់ដឹកនាំចិន សម្រេចបង់ចោល នយោបាយ«កូវីដសូន្យ» នៅខែធ្នូ ឆ្នាំ២០២២។
ផលប៉ះពាល់ ចម្បងមួយទៀត ដែលធ្វើឲ្យការនាំចេញទំនិញរបស់ចិន ជួបញ្ហាធ្ងន់ គឺ រងគ្រោះពីការគំរាមកំហែងរបស់ សហរដ្ឋអាមេរិក និងសហភាពអឺរ៉ុប ដែលកាត់បន្ថយការនាំចូលទំនិញពីស្រុកចិន។ ទាំងនេះ បានធ្វើឲ្យការនាំចេញទំនិញរបស់ចិន ថយចុះជាបន្តបន្ទាប់ គឺទើបតែងើបក្បាលឡើងបន្តិច គួរឲ្យកត់សម្គាល់ នៅក្នុងអំលុងចន្លោះខែ មីនា និងមេសា។ ក៏ប៉ុន្តែ ការនាំចេញទំនិញបានដាំក្បាលចុះទៅវិញនៅខែឧសភា គឺធ្លាក់ចុះ ជាង ៧,៥% ហើយខែមិថុនា ធ្លាក់ជាង១០%ទៅទៀត។ នេះបើតាមអ្នកជំនាញ ហើយនិងតាមការប្រកាសរបស់ ក្រុមគយចិន ប្រាប់ទៅកាសែត Bloomberg។
អ្នកជំនាញសេដ្ឋកិច្ច និងអ្នកនាំពាក្យ ក្រុមគយចិន បានយល់ឃើញដូចគ្នា ថាការលំបាកក្នុងការនាំចេញទំនិញចិន និងផលប៉ះពាល់ផ្ទាល៉ ចំពោះទំនិញចិន គឺមកតែពីនយោបាយគាំពារនិយមរបស់អាមេរិកនិងអឺរ៉ុប ហើយពោលគឺរងផលប៉ះទង្គិចដោយផ្ទាល់ពីសង្គ្រាមពាណិជ្ជកម្ម។
បើតាមធម្មតា នៅដើមសប្តាហ៍ថ្មីខាងមុខនេះ រដ្ឋាភិបាលចិនប៉េកាំង នឹងត្រូវប្រកាសពីការព្យាករសន្ទុះសេដ្ឋកិច្ច និងការនាំចេញទំនិញ សម្រាប់ ត្រីមាស ទី២។
ទោះយ៉ាងណាក្តី អ្នកជំនាញសេដ្ឋកិច្ច Zichun Huang នៃការិយាល័យ Capital Economics បានអះអាងថា ការចេញទំនិញចិន មិនសុទ្ធធ្លាក់ចុះគ្រប់តែមុខទំនិញនោះទេ។ ទំនិញចិនដែលនៅតែបន្តមានសក្កានុពលខ្លាំងសម្រាប់នាំចេញ នោះគឺ ថ្មសាកអគ្គិសនី អាគុយអគ្គិសនី ផ្ទាំងសូឡាស្រូបផ្ទុកថាមពលពន្លឺព្រះអាទិត្យ។ ទំនិញទាំងនេះហើយដែលបានជួយទ្រទ្រង់ការនាំចេញរបស់ចិន គួរឲ្យកត់សម្គាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ