ប្រមុខការទូតអាមេរិកព្យាយាមប្រមូលផ្តុំប្រទេសអាស៊ានឲ្យប្រឆាំងនឹងឥទ្ធិពលរបស់ចិននៅអាស៊ីប៉ាស៊ីហ្វិក
នៅក្នុងប្រទេសឥណ្ឌូណេស៊ី ប្រមុខការទូតអាមេរិកលោកអង់តូនី ប៊្លីនកិនបានអំពាវនាវឲ្យក្រុមប្រទេសអាស៊ានរួមគ្នាប្រឆាំងនឹងឥទ្ធិពលរបស់ចិននៅអាស៊ីប៉ាស៊ីហ្វិក។ ការអំពាវនាវរបស់លោកប៊្លីនកិនបានធ្វើឡើងនៅក្នុងកិច្ចប្រជុំថ្នាក់រដ្ឋមន្រ្តីការបរទេសអាស៊ានបូក ៣ប្រទេសគឺអាមេរិក ចិន និងរុស្សីដែលរៀបចំក្នុងទីក្រុងហ្សាការតា ប្រទេសឥណ្ឌូណេស៊ី។ ចំណែកប្រធានាធិបតីឥណ្ឌូណេស៊ីលោកចូកូ វីដូដូក្នុងនាមជាប្រធានប្តូរវេនអាស៊ានបានថ្លែងថា អាស៊ានមិនត្រូវ និងមិនអាចធ្វើជាអន្តរការីសម្រាប់ប្រទេសណាមួយទេ។
ចុះផ្សាយនៅថ្ងៃ៖
ស្តាប់ - ០២:១៤
« យើងត្រូវធ្វើឲ្យមានការគោរពសេរីភាពនៃការធ្វើនាវាចរណ៍សមុទ្រនៅសមុទ្រចិនខាងត្បូង និងនៅសមុទ្រចិនខាងកើត រួមទាំងរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ »នេះជាការថ្លែងរបស់ប្រមុខការទូតអាមេរិកលោកអង់តូនី ប៊្លីនកិននៅចំពោះមុខរដ្ឋមន្រ្តីការបរទេសអាស៊ាន។ លោកប៊្លីនកិនបានបន្ថែមថាជាមួយអាស៊ាន អាមេរិកចែករំលែកទស្សនៈវិស័យនៃឥណ្ឌូប៉ាស៊ីហ្វិកសេរី បើកចំហ វិបុលភាព ការតភ្ជាប់ និងភាពធន។ អ្វីដែលប្រមុខការទូតអាមេរិកចង់មានន័យគឺថា ប្រទេសក្នុងតំបន់មានសេរីភាពក្នុងការជ្រើសរើសផ្លូវសម្រាប់ដើរនិងជ្រើសរើសដៃគូដោយខ្លួនឯង ពោលមិនត្រូវគូសវាស និងមិនត្រូវទទួលរងឥទ្ធិពលពីប្រទេសណាមួយទេ។
ទោះបីជាលោកប៊្លីនកិនមិនបាននិយាយចំឈ្មោះប្រទេសណាមួយក៏ដោយក៏គេដឹងថាលោកចង់សំដៅលើចិន។ គួរបញ្ជាក់ថានៅក្នុងចំណោមប្រទេសអាស៊ាន មានប្រទេសខ្លះ ពិសេសវៀតណាម និងហ្វីលីពីនកំពុងមានជម្លោះជាមួយចិននៅក្នុងសមុទ្រចិនខាងត្បូងដែលចិនបានទាមទារជាកម្មសិទ្ធិផ្តាច់មុខរបស់ខ្លួន។ ដោយឡែក ប្រធានាធិបតីឥណ្ឌូណេស៊ីលោកចូកូ វីដូដូក្នុងនាមជាប្រធានប្តូរវេនអាស៊ានបានថ្លែងថា អាស៊ានមិនត្រូវ និងមិនអាចធ្វើជាអន្តរការីសម្រាប់ប្រទេសណាមួយទេ។ ចំណែករដ្ឋមន្រ្តីការបរទេសឥណ្ឌូណេស៊ីលោក Retno Marsudi បានបញ្ជាក់ថា ឥណ្ឌូប៉ាស៊ីហ្វិកមិនត្រូវជាសមរភូមិប្រយុទ្ធថ្មីឡើយ។
ក្រៅពីមានជំនួបជាមួយប្រមុខការទូតអាស៊ាន ប្រមុខការទូតអាមេរិកលោកប៊្លីនកិនក៏មានជំនួបដាច់ដោយឡែកជាមួយនាយកការិយាល័យមជ្ឈិមបក្សកុម្មុយនិស្តចិនទទួលបន្ទុកកិច្ចការបរទេសលោកវ៉ាង យីក្នុងថ្ងៃព្រហស្បតិ៍ ទី១២ កក្កដា។ នៅក្នុងជំនួប លោកប៊្លីនកិនបានព្រមានលោកវ៉ាង យីថា អាមេរិកនឹងស្នើឲ្យមានការទទួលខុសត្រូវចំពោះការវាយប្រហារតាមអ៊ីនធ័រនែតប្រឆាំងនឹងរដ្ឋបាលអាមេរិកនាពេលថ្មីៗនេះ។ ចំណែកលោកវ៉ាង យីបានឆ្លើយបកវិញដោយជំរុញឲ្យអាមេរិកធ្វើការជាមួយចិន និងបញ្ឈប់ការលូកដៃចូលក្នុងកិច្ចការផ្ទៃក្នុងរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ