អង់គ្លេសចុះហត្ថលេខាចូលជាសមាជិកនៅក្នុងកិច្ចព្រមព្រៀងនៃភាពជាដៃគូដោះដូរសេរីអន្តរប៉ាស៊ីហ្វិក
នៅថ្ងៃអាទិត្យ ទី១៦ កក្កដា ប្រទេសអង់គ្លេសបានចុះហត្ថលេខាចូលជាសមាជិកនៅក្នុងកិច្ចព្រមព្រៀងនៃភាពជាដៃគូដោះដូរសេរីអន្តរប៉ាស៊ីហ្វិកហៅកាត់ជាភាសាអង់គ្លេស CPTPP។ ពិធីចុះហត្ថលេខាបានធ្វើឡើងនៅក្នុងប្រទេសនូវែលសេឡង់ដោយមានវត្តមានរបស់រដ្ឋមន្រ្តីពាណិជ្ជកម្មអង់គ្លេសលោកស្រីឃេមី បាដឺណុក។ គួរបញ្ជាក់ថា អង់គ្លេសជាប្រទេសអឺរ៉ុបទី១ ដែលបានចូលជាសមាជិករបស់ CPTPP ហើយតាំងពីអង់គ្លេសបានចាកចេញពីគ្រួសារសហភាពអឺរ៉ុប និងទីផ្សាររួមសហភាពអឺរ៉ុបមក នេះជាកិច្ចព្រមព្រៀងពាណិជ្ជកម្មសំខាន់ជាងគេដែលអង់គ្លេសទទួលបាន។
ចុះផ្សាយនៅថ្ងៃ៖
ស្តាប់ - ០២:៣៨
ចាប់ពីពេលនេះទៅ កិច្ចព្រមព្រៀងនៃភាពជាដៃគូដោះដូរសេរីអន្តរប៉ាស៊ីហ្វិក CPTPPនឹងមានសមាជិកចំនួន ១២ប្រទេស គឺអូស្ត្រាលី ព្រុយណេ កាណាដា ឈីលី ជប៉ុន ម៉ាឡេស៊ី ម៉ិចស៊ិក នូវែលសេឡង់ ប៉េរូ សិង្ហបុរី វៀតណាម និងអង់គ្លេសដែលជាសមាជិកថ្មីថ្មោងចុងក្រោយ។ តាមពិត អាមេរិកក៏ជាប្រទេសសមាជិកម្នាក់ដែរ តែត្រូវបានអតីតប្រធានាធិបតីលោកដូណាល់ ត្រាំដកអាមេរិកចេញវិញកាលពីដើមឆ្នាំ ២០១៧។ បូកបន្ថែមប្រទេសអង់គ្លេសមួយទៀត ប្លុក CPTPPនឹងមានចំនួនប្រជាជនសរុបប្រមាណ ៥០០លាននាក់ និងមានផលិតផលសរុប ១៥% នៃផលិតផលសរុបក្នុងលោក។
រដ្ឋមន្រ្តីពាណិជ្ជកម្មអង់គ្លេសលោកស្រីឃេមី បាដឺណុកដែលជាអ្នកចុះហត្ថលេខាលើកិច្ចព្រមព្រៀងចូលជាសមាជិក CPTPP បានថ្លែងថា ការចូលរបស់អង់គ្លេសទៅក្នុង CPTPP នឹងធ្វើឲ្យមានការដោះដូរក្នុងទឹកប្រាក់រាប់ពាន់លានដុល្លារបន្ថែមទៀតសម្រាប់រោងចក្រ សហគ្រាសអង់គ្លេស។ លោកស្រីឃេមី បាដឺណុកបានយល់ឃើញថា សមាជិកភាពរបស់អង់គ្លេសនៅក្នុង CPTPP ជាសក្ខីកម្មដែលបញ្ជាក់ថា អង់គ្លេសមិនឯកោ អង់គ្លេសក្រឡេកមើលទៅក្រៅ ហើយអង់គ្លេសមានកៅអីមួយនៅក្នុងតំបន់នៃពិភពលោកដែលកំពុងស្គាល់កំណើនសេដ្ឋកិច្ចឆាប់រហ័ស។
តាមពិតទៅ អង់គ្លេសបានប្រកាសឲ្យដឹងពីការសម្រេចបានកិច្ចព្រមព្រៀងចូលរួមជាមួយ CPTPP តាំងពីដំណាច់ខែមីនា និងបញ្ជាក់ពីផលសេដ្ឋកិច្ចដែលអង់គ្លេសនឹងទទួលបានគិតជាប្រាក់ជាង ២ ៤០០លានអឺរ៉ូ។ ជម្រើសចូលរួមជាមួយ CPTPP របស់អង់គ្លេសមិនមែនជាជម្រើសចៃដន្យទេ ព្រោះតាំងពីអង់គ្លេសបានចាកចេញពីគ្រួសារ និងទីផ្សាររួមសហភាពអឺរ៉ុបក្នុងថ្ងៃទី១ មករា ឆ្នាំ ២០២១ មក ប្រទេសអឺរ៉ុបមួយនេះបានស្វែងរកកិច្ចព្រមព្រៀងពាណិជ្ជកម្មជាមួយអ្នកផ្សេង។ កន្លងមក អង់គ្លេសបានចុះហត្ថលេខាលើសន្ធិសញ្ញាពាណិជ្ជកម្មជាមួយសហភាពអឺរ៉ុប និងប្រទេសសមាជិកអឺរ៉ុបផ្សេងទៀត។
ក្រៅពីនេះ និងឆ្ងាយពីទឹកដីអឺរ៉ុប អង់គ្លេសក៏បានចុះកិច្ចព្រមព្រៀងពាណិជ្ជកម្មទ្វេភាគីជាមួយប្រទេសអូស្រា្តលី នូវែលសេឡង់ ឬសិង្ហបុរី ហើយសព្វថ្ងៃ អង់គ្លេសកំពុងបន្តចរចាជាមួយឥណ្ឌា ឬប្រទេសកាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ