ប៉ាគីស្ថានតែងតាំងនាយករដ្ឋមន្ត្រីស្តីទីថ្មីដើម្បីដើរចេញពីវិបត្តិនយោបាយ?
ក្នុងពេលកំពុងមានវិបត្តិនយោបាយនិងក្នុងពេលរង់ចាំការបោះឆ្នោតថ្មី ប៉ាគីស្ថានបានតែងតាំងសមាជិកព្រឹទ្ធសភាដែលពុំសូវមានអ្នកស្គាល់ជានាយករដ្ឋមន្ត្រីស្តីទី។ គ្មានបទពិសោធន៍និងទម្ងន់នយោបាយ តែនាយករដ្ឋមន្ត្រីថ្មីនេះទំនងជាមាននិន្នាការសិទ្ធនឹងក្រុមយោធា។ លោកអាន់វារ អុល ហាក កាការា (Anwaar-ul-Haq Kakar)ត្រូវស្បថចូលកាន់តំណែងនៅថ្ងៃចន្ទទី ១៤ សីហា ២០២៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ក្នុងវ័យ៥២ឆ្នាំ ជាសមាជិកព្រឹទ្ធសភានៃខេត្តដ៏តូចមួយរបស់ប៉ាគីស្ថាន លោក អាន់វារ អុល ហាក កាការា (Anwaar-ul-Haq Kakar)ត្រូវបានជ្រើសតាំងដោយរដ្ឋាភិបាលចម្រុះផុតអាណត្តិដែលជាបន្សំបក្សនយោបាយប្រឆាំងគ្នាជាប្រពៃណី គឺបក្សសម្ព័ន្ធអារ៉ាប់ប៉ាគីស្ថាន និងបក្សប្រជាជនប៉ាគីស្ថាន សម្រាប់មកគ្រប់គ្រងប្រទេសដែលកំពុងជួបវិបត្តិនយោបាយក្រោយពីមានការបណ្តេញលោកអ៊ីរ៉ាន់ ខាន់ ពីតំណែងនាយករដ្ឋមន្ត្រី កាលពីខែមេសាឆ្នាំ២០២២មក។
លោក កាការា មានតួនាទីជានាយករដ្ឋមន្ត្រីថ្មីស្តីទី រហូតដល់មានការបោះឆ្នោតទូទៅ និងការបោះឆ្នោតជ្រើសរើសក្រុមប្រឹក្សាខេត្ត ដែលគ្រោងធ្វើនៅខែវិច្ឆិកាខាងមុខ ឬយូរជាងនេះ។ ប៉ាគីស្ថានទើបបានប្រកាសរំលាយសភាកាលពីថ្ងៃពុធ ដូច្នេះតាមច្បាប់រដ្ឋធម្មនុញ្ញប្រទេស ការបោះឆ្នោតទូទៅនឹងប្រព្រឹត្តទៅនៅយ៉ាងយូរ៩០ថ្ងៃក្រោយ។ ប៉ុន្តែបើយោលទៅលើទិដ្ឋភាពនយោបាយដ៏តានតឹង អ្នកទទួលខុសត្រូវបានព្រលយរួចជាស្រេចហើយអំពីលទ្ធភាពលើកពេលបោះឆ្នោតទៅឆ្នាំក្រោយ។ ជាការបោះឆ្នោតដែលគ្មានបក្សប្រឆាំងដ៏ល្បីល្បាញរបស់លោក អ៊ីនរ៉ាន់ខាន់ទេ ព្រោះកាលពីចុងសប្តាហ៍មុន តុលាការបានកាត់ទោសលោកអ៊ីរ៉ាន់ខាន់ ឱ្យជាប់ពន្ធនាគារបីឆ្នាំ ពីបទពុករលួយ និងគ្មានសិទ្ធិធ្វើនយោបាយ៥ឆ្នាំ។ ចំណែកមេដឹកនាំផ្សេងទៀតរបស់គណបក្សត្រូវចាប់ខ្លួនឬបង្ខំចិត្តលាក់ខ្លួនស្ទើរទាំងអស់។
សម្រាប់អ្នកវិភាគ ការជ្រើសរើសយកលោក កាការា ដែលមានបទពិសោធន៍នយោបាយតិចតួច និងគ្មានទម្ងន់នយោបាយសោះ អាចជាប្រការល្អ ព្រោះលោកគ្មានជាប់ពាក់ព័ន្ធនឹងកម្លាំងនយោបាយបក្សធំៗ តែអាចជាប្រការមិនល្អ ក្នុងការដឹកនាំប្រទេសប្រឈមនឹងវិបត្តិដ៏ធ្ងន់ធ្ងរ ដោយមិនពឹងពាក់លើក្រុមយោធាបាន។ តាំងពីបណ្តេញលោក អ៊ីរ៉ាន់ខាន់ចេញពីតំណែងមក ស្ថាប័នយោធាប៉ាគីស្ថានឡើងអំណាចគ្មានប្រៀប និងជាងពេលណាៗទាំងអស់។ ធ្លាប់សិក្សានៅសកលវិទ្យាល័យការពារជាតិ (អតីតសាលាយោធាប៉ាគីស្ថាន) លោក កាការា ទំនងជាស្និទ្ធនឹងស្ថាប័នយោធាទើបត្រូវបានគេជ្រើសរើសឱ្យធ្វើនាយករដ្ឋមន្ត្រីស្តីទីសម្រាប់ការពារប្រយោជន៍ពួកគេ ជាជាងជ្រើសរើសអ្នកនយោបាយសុទ្ធសាធនោះ។
នៅប៉ាគីស្ថាន ក្រុមយោធាតែងលាក់ខ្លួននៅពីក្រោយការបោះឆ្នោតជានិច្ច និងធ្លាប់ធ្វើរដ្ឋប្រហារបានសម្រេចយ៉ាងហោចបីដង គិតចាប់តាំងពីប្រទេសមានឯករាជ្យបែកចេញពីឥណ្ឌានៅឆ្នាំ១៩៤៧មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ