អតីតនាយករដ្ឋមន្រ្តីប៉ាគីស្ថាន ត្រូវតុលាការផ្តន្ទាទោសដាក់ពន្ធនាគារ នៅមុនការបោះឆ្នោតជាតិ
លោកអ៊ីមរ៉ាន ខាន់ នាយករដ្ឋមន្រ្តីប៉ាគីស្ថាន ត្រូវតុលាការក្រុងអ៊ីស្លាម៉ាបាដផ្តន្ទាទោសឲ្យជាប់ពន្ធនាគារ ៣ឆ្នាំ និងពិន័យប្រាក់ ៣៥០ដុល្លារ ក្នុងបទចោទប្រកាន់ប្រព្រឹត្តអំពើពុករលួយ ក្នុងពេលលោកកាន់តំណែងជាប្រមុខរដ្ឋាភិបាល។ នៅក្នុងសារវីដេអូដែលលោកថតទុក នៅមុនការចាប់ខ្លួន កាលពីថ្ងៃ សៅរ៍ទី ៥សីហា អតីតនាយករដ្ឋមន្រ្តីប៉ាគីស្ថានបានរិះគន់ការសម្រេចរបស់តុលាការដែលមានលក្ខណៈនយោបាយ ប៉ុន្តែ អំពាវនាវឲ្យអ្នកគាំទ្ររបស់លោក រក្សាភាពស្ងប់ស្ងាត់ រឹងមាំមិនប្រែប្រួល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
នៅក្រោយការសម្រេចរបស់តុលាការក្រុងអ៊ីស្លាម៉ាបាដ អតីតនាយករដ្ឋមន្ត្រីប៉ាគីស្ថាន អ៊ីមរ៉ាន ខាន់ ដែលគ្មានវត្តមាននៅក្នុងអង្គសវនាការ ត្រូវក្រុមប៉ូលិស និងទាហានប៉ារ៉ា ចូលចាប់ខ្លួន ដល់ក្នុងផ្ទះរបស់លោក នៅLahore ទីក្រុងធំទី២របស់ប៉ាគីស្ថាន។ នៅក្នុងសេចក្តីប្រកាសកាលពីថ្ងៃសៅរ៍ ចៅក្រមតុលាការអ៊ីស្លាម៉ាបាតសម្រេចផ្តន្ទាទោស លោកអ៊ីមរ៉ាន ខាន់ ឲ្យជាប់ពន្ធនាគារ៣ឆ្នាំ និងបង់ប្រាក់ពិន័យ ៣៥០ដុល្លារ នៅក្នុងបទចោទប្រកាន់ប្រព្រឹត្តអំពើពុករលួយ នៅក្នុងពេលលោកកាន់តំណែងជានាយករដ្ឋមន្រ្តីប៉ាគីស្ថាន។
ឈ្នះឆ្នោតចូលកាន់អំណាចនៅឆ្នាំ ២០១៨នៅប៉ាគីស្ថាន អតីតកីឡាករជើងឯកពិភពលោកCriket លោកអ៊ីមរ៉ាន ខាន់ ត្រូវសភាបោះឆ្នោត ដកទំនុកចិត្ត ដែលធ្វើឲ្យលោកបាត់បង់តំណែងនាយករដ្ឋមន្រ្តី កាលពីខែ មេសា ឆ្នាំ ២០២២។ នៅក្រោយបណ្តេញចេញពីតំណែងនាយករដ្ឋមន្រ្តី លោកអ៊ីមរ៉ាន ខាន់ ត្រូវប្រឈមនឹងការស៊ើបអង្កេតជាង ១៥០ របស់តុលាការប៉ាគីស្ថាន ជាពិសេសសំណុំរឿងប្រព្រឹត្តអំពើពុករលួយ។ តាមក្រុមអ្នកប្រឆាំង លោកអ៊ីមរ៉ាន ខាន់ និងភរិយាបានទទួលសំណូក អំណោយជាវត្ថុមានតម្លៃជាច្រើនលានដុល្លារ ដែលមានតាំងពីនាឡិកាដៃ កាបូបប្រណិតៗ ទឹកអប់ នៅក្នុងពេលធ្វើទស្សនកិច្ចនៅបរទេស។
លោកអ៊ីមរ៉ាន ខាន់តែងបដិសេធការចោទប្រកាន់។ នៅក្នុងសាវីដេអូដែលលោកបានថតនៅមុនការចាប់ខ្លួន កាលពីថ្ងៃ សុក្រ និងដែលបង្ហោះផ្សាយតាមបណ្តាញសង្គម X ដែលអតីតបណ្តាញធ្វីតធ័រ លោកអ៊ីមរ៉ាន់ ខាន់បានបរិហារការសម្រេចរបស់តុលាការថា ធ្វើឡើងក្នុងហេតុផលនយោបាយ។ តាមលោកអ៊ីមរ៉ាន ខាន់ លោកដឹងច្បាស់ថា លោកនឹងត្រូវគេចាប់ខ្លួន។ ដូច្នេះ ការចាប់ខ្លួនលោក នៅពេលនេះ ធ្វើឡើងដើម្បីរារាំងកុំឲ្យលោកអាចចូលរួមនៅក្នុងការបោះឆ្នោត សភា ប៉ាគីស្ថាន ដែលអាចរៀបចំឡើង នៅអំឡុងខែវិច្ឆិកាចុងឆ្នាំនេះ។
នៅក្នុងសារវីដេអូ អតីតនាយករដ្ឋមន្ត្រីប៉ាគីស្ថាន ដែលជាប្រធានគណបក្សTehreek-e-Insaf (PTI)បានអំពាវនាវឲ្យអ្នកគាំទ្ររបស់លោកនៅស្ងប់ស្ងាត់។ ប៉ុន្តែ នៅថ្ងៃសៅរ៍ ក្រុមអ្នកគាំទ្ររបស់លោកអ៊ីមរ៉ាន ខាន់ នៅតែលើកគ្នាទៅប្រមូលផ្តុំ នៅមុខគេហដ្ឋានរបស់លោក នៅមុនពេលដែលត្រូវប៉ូលិសវាយបំបែក និងចាប់ខ្លួន។
នេះមិនមែនជាលើកទី១ទេ ដែលលោកអ៊ីមរ៉ាន់ ខាន់ត្រូវទាហានប៉ារ៉ាប៉ាគីស្ថានចូលចាប់ខ្លួនដោយកម្រោល។ នៅខែ ឧសភាកន្លងទៅ ការចាប់ខ្លួនរបស់លោកអ៊ីមរ៉ាន ខាន់ នៅក្នុងបរិវេណរបស់តុលាការ ពីសំណាក់ទាហានប៉ារ៉ា ប៉ាគីស្ថានបានបណ្តាលឲ្យមានការព្រមានពីតុលាការកំពូល និងបាតុកម្មហិង្សារបស់អ្នកគាំទ្ររបស់លោកអ៊ីមរ៉ាន ខាន់ ដែលដៅវាយប្រហារ ដុតបំផ្លាញទីតាំងរបស់រដ្ឋ និងកងទ័ពប៉ាគីស្ថាន។ នៅក្រោយការដោះលែងបណ្តោះអាសន្ន របស់លោកអ៊ីមរ៉ាន ខាន់ គណបក្សរបស់លោក គឺPTIបានក្លាយជាផ្ទាំងស៊ីបនៃការបង្រ្កាប ចំណែកអ្នកគាំទ្រ និងសមាជិកបក្សជាច្រើនពាន់នាក់ត្រូវចាប់ខ្លួន។
គេវាយតម្លៃថា លោកអ៊ីមរ៉ាន ខាន់ ដែលចូលកាន់អំណាច ដោយសារមានការគាំទ្រពីយោធា ចាប់ធ្លាក់បុណ្យសក្តិ នៅក្រោយលោកដំឡើងសំឡេងរិះគន់អំណាច ស្ថាប័នកងទ័ពប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ