តុលាការធម្មនុញ្ញថៃច្រានចោលបណ្តឹងឧទ្ធរណ៍របស់បក្សឈ្នះឆ្នោត
នៅថ្ងៃពុធនេះ តុលាការធម្មនុញ្ញថៃបានច្រានចោលបណ្តឹងឧទ្ធរណ៍ចង់ក្លាយជានាយករដ្ឋមន្ត្រីរបស់លោក ភិថា លឹមចៈរើនរ៉ាត់ ប្រធានគណបក្សកាវក្លៃអ្នកឈ្នះឆ្នោត។ ការបដិសេធនេះបានបើកផ្លូវឱ្យសភាអាចបន្តសកម្មភាពជាថ្មី ក្នុងការជ្រើសរើសប្រមុខរដ្ឋាភិបាល។ សភាអាចនឹងផ្តើមបោះឆ្នោតអនុម័តបេក្ខភាពនាយករដ្ឋមន្ត្រីចាប់ពីថ្ងៃសុក្រទី ១៨សីហាទៅ។
ចុះផ្សាយនៅថ្ងៃ៖
ស្តាប់ - ០១:៥៩
ភាពទ័លច្រកនយោបាយក្រោយការបោះឆ្នោតសភាថ្ងៃទី ១៤ឧសភា ទំនងជាត្រូវធ្លាយនិងឈានដល់ទីបញ្ចប់។ នៅក្នុងសេចក្តីថ្លែងការណ៍ តុលាការធម្មនុញ្ញថៃបានប្រកាសសម្រេចជាឯកច្ឆន្ទបដិសេធមិនទទួលត្រួតពិនិត្យបណ្តឹងឧទ្ធរណ៍របស់លោកភិថា លឹមចៈរើនរ៉ាត់ ប្រធានគណបក្សកំណែទម្រង់និយមកាវក្លៃទេ។
គណបក្សកាវក្លៃបានឈ្នះឆ្នោតនាំមុខគេនៅក្នុងថ្ងៃសម័យបោះឆ្នោតសភា ដោយសារសំឡេងគាំទ្ររបស់ក្រុមយុវជនដែលស្រែកឃ្លានការប្តូរផ្លាស់។ ប៉ុន្តែដោយហេតុឆន្ទៈនយោបាយចង់ធ្វើកំណែទម្រង់ច្បាប់រាជានិយមថៃដ៏តឹងតែងបំផុតមួយនៅលើពិភពលោក សភានិងព្រឹទ្ធសភា មិនផ្តល់ការគាំទ្រដល់ប្រមុខបក្សវ័យ៤២ឆ្នាំដែលជាអតីតនិស្សិតនៃសកលវិទ្យាល័យHarvardអាមេរិកដ៏ល្បីល្បាញ ឱ្យឡើងធ្វើជានាយករដ្ឋមន្ត្រីឡើយ។ លោកភិថា បានដកខ្លួនពីបេក្ខភាពនាយករដ្ឋមន្ត្រី បន្ទាប់ពីបរាជ័យនៅក្នុងសភាជាលើកទីពីរ។ តែតាមច្បាប់រដ្ឋធម្មនុញ្ញថៃ ក្រោយបរាជ័យពីរលើកនៅក្នុងសភា ទើបបេក្ខជនមានសិទ្ធិធ្វើប្តឹងទៅតុលាការធម្មនុញ្ញ។
ប៉ុន្តែថ្ងៃនេះ តុលាការធម្មនុញ្ញបានមកបិទបញ្ចប់ក្តីសង្ឃឹមចុងក្រោយរបស់លោកភិថា និងបើកលទ្ធភាពឱ្យសភាអាចរៀបចំការជ្រើសរើសប្រមុខរដ្ឋាភិបាលជាថ្មី។ ការបោះឆ្នោតជ្រើសរើសនាយករដ្ឋមន្ត្រីអាចនឹងប្រព្រឹត្តទៅនៅថ្ងៃសុក្រសប្តាហ៍នេះតែម្តង។
គណបក្សភឿថៃ ឈ្នះឆ្នោតលំដាប់ទីពីរ មានភារៈបង្កើតរដ្ឋាភិបាលថ្មី ដោយមានលោកសេដ្ឋាថាវីស៊ីនជាបេក្ខជននាយករដ្ឋមន្ត្រី។ មានទម្ងន់នយោបាយខ្លាំង ដឹកនាំដោយគ្រួសារត្រកូលថាក់ស៊ីន គណបក្សភឿថៃបានទាក់ទងចរចាជាមួយគ្រប់គណបក្សនយោបាយថៃ រាប់ទាំងគណបក្សមានពាក់ព័ន្ធនឹងរដ្ឋប្រហារឆ្នាំ២០១៤ផង ក្នុងដំណើរឈានទៅបង្កើតរដ្ឋាភិបាលចម្រុះ។ គណបក្សជឿជាក់ថាសភានឹងផ្តល់ទំនុកឱ្យនិងត្រៀមលក្ខណៈដឹកនាំប្រទេសដោយគ្មានគណបក្សកាវក្លៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ