តុលាការវៀតណាមផ្តន្ទាទោសសកម្មជនបរិស្ថានម្នាក់ឲ្យជាប់ពន្ធនាគារ៣ឆ្នាំ
ស្រ្តីសកម្មជនបរិស្ថានរបស់វៀតណាម្នាក់ ត្រូវតុលាការក្រុងហាណូយកាត់ទោសឲ្យជាប់ពន្ធនាគារ ៣ឆ្នាំ ក្នុងបទចោទប្រកាន់គេចវេសមិនបង់ពន្ធរដ្ឋ។ តាមការចុះផ្សាយរបស់ទីភ្នាក់ងារព័ត៌មានផ្លូវរដ្ឋវៀតណាម ហ័ង ធិមិញហ៊ុង ឆ្លើយសារភាព ទទួលកំហុស និងយល់ព្រមបង់ប្រាក់ ជាង ១សែនដុល្លារដើម្បីបានទទួលការសម្រួលទោស។ ប៉ុន្តែ សម្រាប់អង្គការការពារសិទ្ធិមនុស្សឈ្មោះ The 88 project លោកស្រីហ័ង ធិមិញហ៊ុងជាសកម្មជនការពារបរិស្ថានវៀតណាមម្នាក់ទៀត ដែលត្រូវរបបកុម្មុយនិស្តវៀតណាមតាមកម្ចាត់ ដោយការប្រើប្រព័ន្ធតុលាការជាអាវុធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
តុលាការក្រុងហាណូយ នៅថ្ងៃព្រហស្បតិ៍បានកាត់ទោសលោកស្រី ហ័ង ធិមិញហ៊ុងឲ្យជាប់ពន្ធនាគារ៣ឆ្នាំក្នុងបទចោទប្រកាន់លួចគេចពន្ធរដ្ឋ។ តាមការចុះផ្សាយរបស់ទីភ្នាក់ងារព័ត៌មានផ្លូវរដ្ឋវៀតណាម លោកស្រី ហ័ង ធិមិញហ៊ុងដែលគេស្គាល់ថា ជាប្រធានអង្គការការពារបរិស្ថានChange បានលួចគេចវេស មិនបង់ពន្ធរដ្ឋប្រមាណ ២៧៥ ០០០ដុល្លារ ដែលមានជាប់ទាក់ទងនឹងសកម្មភាពរបស់អង្គការរបស់លោកស្រី។
លោកស្រីហ័ង ធិមិញហ៊ុងត្រូវប៉ូលិសវៀតណាមចាប់ឃុំខ្លួនតាំងពីខែឧសភា ដើម្បីរង់ចាំការជំនុំជម្រះរបស់តុលាការ។ ប្តីរបស់លោកស្រីហ័ង ធិមិញហ៊ុងបាននិយាយប្រាប់ទីភ្នាក់ងារបារាំង AFP ថា លោកខកចិត្តខ្លាំង ដែលលោកស្រីហ័ង ធិមិញហ៊ុងត្រូវតុលាការកាត់ទោស ដោយអយុត្តិធម៌។
លោកស្រី ហ័ង ធិមិញហ៊ុងជាស្ថាបនិក បង្កើតអង្គការបរិស្ថានChange ដែលធ្វើការទៅលើការជំរុញយុវជនឲ្យចូលរួមក្នុងយុទ្ធនាការប្រយុទ្ធប្រឆាំងនឹងការប្រែប្រួលអាកាសធាតុ ការបំពុលបរិស្ថាន និងការជួញដូរសត្វព្រៃ។ នៅឆ្នាំ ២០១៨ លោកស្រីហ័ង ធិមិញហ៊ុងធ្លាប់បានទទួលការកោតសរសើរ ពីលោកប្រធានាធិបតីអូបាម៉ា ដែលបានផ្តល់រង្វាន់ជាអាហារូបករណ៍ឲ្យលោកស្រីទៅសិក្សានៅសកលវិទ្យាល័យកូឡុំបៀរនៅឆ្នាំដដែល។
អង្គការ Change របស់លោកស្រី ហ័ង ធិមិញហ៊ុងបានបិទទ្វារទៅវិញ នៅឆ្នាំ ២០២២ បន្ទាប់ពីអាជ្ញាធរវៀតណាម ចាប់ខ្លួនសកម្មជនបរិស្ថានសំខាន់ៗ៤រូប ក្នុងបទចោទប្រកាន់គេចមិនបង់ពន្ធរដ្ឋ។
សម្រាប់លោក Ben Swanton មកពីអង្គការការពារសិទ្ធិមនុស្ស The 88 project ជាថ្មីម្តងទៀត របបកុម្មុយនិស្តវៀតណាមបានប្រើប្រព័ន្ធតុលាការជាអាវុធសម្រាប់បំបិទមាត់អ្នកប្រឆាំង ដូចជាសកម្មជនការពារបរិស្ថាន ដែលអាជ្ញាធរវៀតណាមចាត់ទុកជាឆ្អឹងទទឹងក សម្រាប់ការអភិវឌ្ឍសេដ្ឋកិច្ច។
ជាក់ស្តែង លោកស្រី ងុយ ធិខាញ់ ស្ថាបនិករបស់អង្គការGreen ID ដែលល្បីឈ្មោះនៅវៀតណាមខាងជំរុញឲ្យរដ្ឋាភិបាលបោះបង់ចោលការប្រើថាមពលធ្យូងថ្ម ត្រូវជាប់ពន្ធនាគារ មួយឆ្នាំ ពីបទគេចមិនបង់ពន្ធរដ្ឋ មុននឹងត្រូវដោះលែងឲ្យមានសេរីវិញ នៅខែឧសភាកន្លងទៅ។ សម្រាប់អង្គការការពារសិទ្ធិមនុស្ស ការបង្ក្រាបសកម្មជនការពារបរិស្ថាន នឹងទៅបន្ទុចបង្អាក់ការប្រឹងប្រែងរបស់រដ្ឋាភិបាលវៀតណាមក្នុងការប្រយុទ្ធប្រឆាំងការប្រែប្រួលអាកាសធាតុ។ ត្រូវប្រឈមរងគ្រោះដោយសារការឡើងកំពស់ទឹកសមុទ្រដែលគំរាមពន្លិចតំបន់ឆ្នេរភាគខាងត្បូងវៀតណាម រដ្ឋាភិបាលវៀតណាមធ្លាប់សន្យាអនុវត្តឲ្យបានអព្យាក្រឹតកាបូននៅឆ្នាំ ២០៥០។ ប៉ុន្តែ នយោបាយជំរុញសេដ្ឋកិច្ចរបស់រដ្ឋាភិបាលជាញឹកញយបានទៅប៉ះជល់ទង្គិចជាមួយ មហិច្ឆតាអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ