ជប៉ុនបានផ្តើមបង្ហូរទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាចូលសមុទ្រក្នុងដំណាក់កាលទី២
នៅក្នុងប្រទេសជប៉ុន ក្រុមហ៊ុន Tepco បានប្រកាសក្នុងថ្ងៃព្រហស្បតិ៍ ទី៥ តុលាពីការផ្តើមបង្ហូរទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាចូលមហាសមុទ្រប៉ាស៊ីហ្វិកក្នុងដំណាក់កាលទី២។ បរិមាណទឹកដែលត្រូវបង្ហូរនៅក្នុងដំណាក់កាលទី២ នេះមានចំនួនស្មើនឹងការបង្ហូរនៅក្នុងដំណាក់កាលទី១ កាលពីដើមខែសីហា។ គួរបញ្ជាក់ថា ទឹកដែលស្តុកនៅមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាត្រូវបានច្រោះយកសារធាតុវិទ្យុសកម្មចេញមុននឹងបង្ហូរចូលសមុទ្រ។ តែយុទ្ធនាការមួយនេះបានបង្កឲ្យមានកំហឹងពីប្រទេសជិតខាង ពិសេសចិន និងកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:៤៥
អ្នកនាំពាក្យក្រុមហ៊ុន Tepco បានបញ្ជាក់ប្រាប់ AFP ថា ការរំដោះទឹកពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ាចូលមហាសមុទ្រប៉ាស៊ីហ្វិកក្នុងដំណាក់ការទី២ បានចាប់ផ្តើមនៅម៉ោង ១០ និង ១៨នាទីព្រឹកម៉ោងក្នុងប្រទេសជប៉ុន។ ក៏ដូចជានៅក្នុងដំណាក់កាលទី១ កាលពីថ្ងៃទី២៤ សីហាដែរ ការបង្ហូរទឹកចេញពីមជ្ឈមណ្ឌលនុយក្លេអ៊ែរហ៊្វូគូស្ហ៊ីម៉ានឹងត្រូវប្រើពេលចំនួន ១៧ថ្ងៃ និងមានបរិមាណទឹកប្រមាណជា ៧ ៨០០ម៉ែត្រគូប។ គួរបញ្ជាក់ថា ទឹកនៅមជ្ឈមណ្ឌលហ៊្វូគូស្ហ៊ីម៉ាជាទឹកដែលបានប្រើសម្រាប់ធ្វើឲ្យត្រជាក់ម៉ាស៊ីប្រតិកម្ម ទឹកនៅក្រោមដី និងទឹកភ្លៀងនៅក្នុងទីតាំងមជ្ឈមណ្ឌល។
ក្រុមហ៊ុន Tepco ដែលជាប្រតិបត្តិករនៅហ៊្វូគូស៊ីម៉ាបានប្រមូលទឹកទាំងនោះស្តុកទុកនៅក្រោយមជ្ឈមណ្ឌលមួយនេះបានរងគ្រោះដោយរលកយក្សស៊ូណាមីក្នុងថ្ងៃទី១១ មីនា ឆ្នាំ ២០១១។ ជាសរុប មានបរិមាណទឹកជាង ១លាន ៣សែនម៉ែត្រគូបត្រូវបានក្រុមហ៊ុន Tepco ធ្វើការច្រោះយកសារធាតុវិទ្យុសកម្មចេញ និងស្តុកទុកនៅក្នុងស៊ីទែនជាង ១ពាន់ស៊ីទែនស្ថិតក្នុងបរិវេណមជ្ឈមណ្ឌល។ តាមគម្រោង ប្រតិបត្តិការបង្ហូរទឹកទាំងជាង ១លាន ៣សែនម៉ែត្រគូបចូលសមុទ្រនឹងត្រូវប្រើពេលប្រមាណជា ៤០ឆ្នាំ។ រយៈពេល ៤០ឆ្នាំនេះក៏ជាពេលវេលាចាំបាច់ដើម្បីរុះរើមជ្ឈមមណ្ឌលហ៊្វូគូស៊ីម៉ាដែរ។
គួរបញ្ជាក់ថា គឺទើបនៅថ្ងៃទី៤ កក្កដាដែលជប៉ុនបានទទួលភ្លើងខៀវពីទីភ្នាក់ងារថាមពលបរមាណូអន្តរជាតិហៅកាត់ AIEA ឲ្យបង្ហូរទឹកច្រោះរួចនៅហ៊្វូគូស្ហ៊ីម៉ាចូលសមុទ្រ។ AIEA បានសន្និដ្ឋាននៅក្នុងរបាយការណ៍របស់ខ្លួនថា ការបង្ហូរបន្តិចម្តងៗ និងដោយមានការគ្រប់គ្រងត្រឹមត្រូវនូវទឹកដែលច្រោះរួចនឹងមានផលប៉ះពាល់តិចតួចដល់បរិស្ថាន និងប្រជាជន។ ចំណែកជប៉ុនក៏បានអះអាងពីការគោរពត្រឹមត្រូវតាមនិយាមសុវត្ថិភាពអន្តរជាតិ។ តែការធានារបស់ជប៉ុនមិនអាចទប់កំហឹងរបស់ប្រទេសជិតខានបានទេ ពិសេសកូរ៉េខាងត្បូង និងចិន។ តាំងពីដំណាច់ខែសីហា ក្រុងប៉េកាំងបានផ្អាកការនាំចូលគ្រឿងសមុទ្រពីជប៉ុន។
ចំណែករុស្ស៊ីដែលកំពុងមានទំនាក់ទំនងតានតឹងស្រាប់ជាមួយជប៉ុនដោយសារតែជប៉ុនបានដាក់ទណ្ឌកម្មប្រឆាំងរុស្ស៊ីក្នុងរឿងសង្រ្គាមអ៊ុយក្រែនក៏កំពុងពិចារណាចាត់វិធានការប្រឆាំងជប៉ុនដូចចិនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ