ចិន៖លោកស៊ី ជីនពីងថែមលុយជាង ១០០ ០០០លានដុល្លារទៅក្នុងគម្រោងផ្លូវ និងខ្សែក្រវ៉ាត់
នៅក្នុងប្រទេសចិន ពិធីប្រារព្ធខួប ១០ឆ្នាំនៃមហាគម្រោងផ្លូវសូត្រថ្មីរយៈពេល ២ថ្ងៃក្នុងក្រុងប៉េកាំងបានបិទបញ្ចប់នាថ្ងៃពុធ ទី១៨ តុលា។ ថ្លែងនៅចំពោះវត្តមានថ្នាក់ដឹកនាំចូលរួមចំនួន ១៣០ប្រទេស ប្រធានាធិបតីចិនលោកស៊ី ជីនពីងបានប្រកាសបន្ថែមប្រាក់កម្ចីជាង ១០០ ០០០លានដុល្លារទៅក្នុងមហាគម្រោងមួយនេះ។
ចុះផ្សាយនៅថ្ងៃ៖
ស្តាប់ - ០២:៤៥
លោកស៊ី ជីនពីងបានលំអិតថា ប្រាក់កម្ចីទាំងជាង ១០០ ០០០លានដុល្លារនឹងត្រូវផ្តល់ដោយធនាគារចិនចំនួនពីរ គឺធនាគារអភិវឌ្ឃន៍ និងធនាគារនាំចេញ នាំចូល។ តាមប្រធានាធិបតីចិនរូបនេះដដែល ប្រាក់កម្ចីទាំងជាង ១០០ ០០០លានដុល្លារនឹងត្រូវបែងចែកទៅតាមគម្រោងផ្សេងៗគ្នា ក្នុងនោះ មានជិត ៤៨ ០០០លានដុល្លារសម្រាប់គម្រោងហេដ្ឋារចនាសម្ព័ន្ធ និងដាក់បន្ថែមចំនួន ១១ ០០០លានដុល្លារទៅក្នុងមូលនិធិផ្លូវ និងខ្សែក្រវ៉ាត់។ គួរបញ្ជាក់ថា មហាគម្រោងផ្លូវសូត្រថ្មី ឬហៅផ្លូវ និងខ្សែក្រវ៉ាត់ជាគំនិតផ្តួចផ្តើមរបស់លោកស៊ី ជីនពីងកាលពីឆ្នាំ ២០១៣។
កម្មវត្ថុនៃការបង្កើតឲ្យមានមហាគម្រោងមួយនេះឡើង គឺដើម្បីតភ្ជាប់ ក្នុងគោលដៅបង្កើនទំនាក់ទំនងពាណិជ្ជកម្មជាមួយអាស៊ី អឺរ៉ុប ឬអាហ្រ្វិកតាមរយៈការសាងសង់ហេដ្ឋារចនាដូចជាកំពង់ផែ ផ្លូវរថភ្លើង ផ្លូវថ្នល់ អាកាសយានដ្ឋាន ឬឧទ្យានឧស្សាហកម្ម។ សម្រាប់ចិន និងក្រុមអ្នកគាំទ្រគំនិតផ្តួចផ្តើមរបស់លោកស៊ី មហាគម្រោងផ្លូវ និងខ្សែក្រវ៉ាត់ជាមហាគម្រោងឈ្នះៗដែលនាំការវិនិយោគដល់ក្រុមប្រទេសពាក់ព័ន្ធ ពិសេសក្រុមប្រទេសនៅប៉ែកខាងត្បូង។ តែទន្ទឹមគ្នានេះ មហាគម្រោងរបស់ចិនក៏ទទួលបានការរិះគន់ចាស់ដៃដោយសារវាបានធ្វើឲ្យក្រុមប្រទេសក្រីក្រជំពាក់បំណុលចិនកាន់តែធ្ងន់ ក។
ចូរកុំភ្លេចថា ចិនបានផ្តល់ប្រាក់កម្ចីឲ្យក្រុមប្រទេសសមាជិកក្នុងគម្រោងផ្លូវ និងខ្សែក្រវ៉ាត់ដើម្បីឲ្យពួកគេយកទៅសាងសង់ហេដ្ឋារចនាសម្ព័ន្ធផ្សេងៗ។ តាមក្រុងប៉េកាំង ប្រាក់កម្ចីសរុបដែលចិនបានផ្តល់ឲ្យមកទល់ពេលនេះមានជាង ២ទ្រីលានដុល្លារ ឬ ២០០០ ០០០លានដុល្លារ។ ក្រៅពីរឿងប្រាក់កម្ចីដែលបានធ្វើឲ្យប្រទេសខ្លះ ពិសេសប្រទេសក្រីក្រជាប់បំណុលកាន់តែវ័ន ចិនក៏បានទទួលរងការរិះគន់នៅក្នុងតម្លៃនៃគម្រោងខ្លះដែលក្រុមហ៊ុនចិនជាអ្នកចាត់ចែង។ ជាក់ស្តែង ប្រទេសម៉ាឡេស៊ីក៏ដូចឥណ្ឌូណេស៊ីបានបង្ខំចិត្តសុំចរចាឡើងវិញលើកិច្ចព្រមព្រៀងសាងសង់មួយចំនួនដើម្បីបញ្ចុះតម្លៃ។ តែសម្រាប់ចិន គ្រប់ការរិះគន់ទោះក្នុងរូបភាពណាក៏ដោយមិនអាចរារាំងមហាគម្រោងផ្លូវ និងខ្សែក្រវ៉ាត់របស់ខ្លួនបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ