ការសិក្សា៖ តម្រូវការរ៉ែលីចូមកំពុងគំរាមកំហែងបរិស្ថាននិងសិទ្ធិមនុស្សនៅទីបេ
ការរីកចម្រើនផ្នែកទីផ្សាររថយន្តអគ្គីសនី បានជំរុញឱ្យចិនសម្រុកទៅជីករករ៉ែលីចូមនៅតំបន់ខ្ពស់រាបទីបេ។ ប៉ុន្តែការជីកយករ៉ែលីចូមនេះអាចបង្កឱ្យការខូចខាតយ៉ាងធ្ងន់ធ្ងរដល់បរិស្ថានផង និងបង្កឱ្យមានការរំលោភសិទ្ធិមនុស្សកាន់តែខ្លាំងផង។ នេះបើតាមការសិក្សាមួយចេញផ្សាយនៅថ្ងៃពុធទី ១វិច្ឆកា២ឥ២៣។
ចុះផ្សាយនៅថ្ងៃ៖
ស្តាប់ - ០២:៣៦
ចិនជាទីផ្សាររថយន្តអគ្គិសនីដ៏ធំជាងគេបំផុតនៅលើពិភពលោក។ រហូតមកទល់ពេលនេះចិនតែងរំពឹងលើការនាំចូលរ៉ែលីចូមដែលជាលោហៈដ៏ចាំបាច់បំផុតសម្រាប់ផលិតថ្ម (អាគុយ) មកពីបណ្តាប្រទេសផ្សេងៗ។ ហើយដើម្បីកាត់បន្ថយការនាំចូល ប៉េកាំងទើបបានចាប់ផ្តើមធ្វើផលិតកម្មរ៉ែនៅក្នុងស្រុក ត្រង់តំបន់ខ្ពង់រាបទីបេ ដែលមានកប់រ៉ែលីចូមក្រោមដីប្រមាណ៨៥%នៃធនធានលីចូមសរុបរបស់ប្រទេស។ ការសិក្សាភូគព្ភសាស្ត្រចិនប៉ាន់ស្មានថាតំបន់ខ្ពង់រាបទីបេ ខេត្តស៊ីឈន់និងខេត្តជីនហៃ មានកំណប់រ៉ែលីចូមប្រមាណ៣,៦លានតោន។
ប៉ុន្តែការសម្រុកទៅរុករករ៉ែលីចូមបានប៉ះពាល់ដល់បរិស្ថានយ៉ាងខ្លាំង ព្រោះតែចិនបានប្រើបច្ចេកវិទ្យាជីកនិងចម្រាញ់រ៉ែ ដែលលឿនរហ័ស ថោក និងពុលខ្លាំង។ នេះបើតាមរបាយការណ៍របស់បណ្តាញអ្នកស្រាវជ្រាវទីបេTurquois Roof ដែលប្រើទិន្នន័យផ្កាយរណប និងប្រភពសាធារណៈ បង្ហាញគំនូសតាងស្តីពីផលប៉ះពាល់នៃការធ្វើផលិតកម្មរ៉ែលីចូមនៅតំបន់ដាំដុះទីបេ។
ផលិតកម្មរ៉ែលីចូម បង្កឱ្យមានការបំពុលបរិស្ថាននៃតំបន់ទីបេដ៏ធំទូលាយដែលមានជីវចម្រុះច្រើន តែងាយរងគ្រោះដោយការប្រែប្រួលអាកាសធាតុ។ សម្រាប់របាយការណ៍ដដែលនេះ អណ្តូងរ៉ែលីចូមនៅស៊ីឈន់បានសម្លាប់ត្រីក្នុងស្ទឹង និងបង្ខូចវាលស្មៅសម្រាប់ចិញ្ចឹមសត្វអស់យ៉ាងច្រើនណាស់។ ក្រុមហ៊ុនផលិតអាគុយCATL បានទទួលសិទ្ធិធ្វើផលិតកម្មទាញយករ៉ែ លើគ្រប់ផ្ទៃដីមានលីចូម។ ឯពលរដ្ឋមិនបានដឹងថាដីចិញ្ចឹមសត្វរបស់ខ្លួនត្រូវបានរដ្ឋលក់ឱ្យអាជីវកម្មរ៉ែទេ។ ពលរដ្ឋទីបេគ្មានសិទ្ធិសម្រេចអ្វីទាំងអស់ទាក់ទងនឹងទាញយកធនធានដ៏សម្បូរបែបរបស់ទីបេ។ នេះបើតាមរបាយការណ៍ដដែល។
ក្រុមអ្នកការពារសិទ្ធិមនុស្ស និងរដ្ឋាភិបាលលោកខាងលិច ធ្លាប់ចោទប្រកាន់គណបក្សកុម្មុយនិស្តចិនតាំងពីយូរមកហើយថាបានរំលោភបំពានលើសិទ្ធិពលរដ្ឋទីបេ តែប៉េកាំងបដិសេធ។
អ្នកស្រាវជ្រាវទីបេចេញរបាយការណ៍នេះក្នុងបរិបទដែលចិនកំពុងស្វះស្វែងពង្រឹងការផ្គត់ផ្គង់ធនធានរ៉ែយុទ្ធសាស្ត្រ ដើម្បីទប់ទល់នឹងការលំបាកពាណិជ្ជកម្មជាមួយបណ្តាប្រទេសនាំចេញរ៉ែលោកខាងលិច។ កាលពីថ្មីៗកន្លងទៅនេះ ប៉េកាំងបានរឹតបន្តឹងវិធានការនាំចេញរ៉ែក្រាហ្វីត ដ៏ចាំបាច់ដែរសម្រាប់ផលិតថ្មរថយន្តអគ្គិសនី ក្រោយពីសហរដ្ឋអាមេរិកបានបន្តឹងការលក់បន្ទះសឺមីកុងឌុចទ័រទៅឱ្យចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ