ប្រេសិតតៃវ៉ាន់៖ ជំនួបចូបៃដិន-ស៊ីជីនពីងនឹងពង្រឹងស្ថិរភាពច្រកសមុទ្រតៃវ៉ាន់
សម្រាប់តំណាងតៃវ៉ាន់ដែលអញ្ជើញមកចូលរួមជំនួបកំពូលAPEC ដែរ ជំនួបរវាងលោកប្រធានាធិបតីអាមេរិកនិងសមភាគីចិន នៅក្រុងសាន់ហ្វ្រាន់ស៊ីស្កូក្នុងសប្តាហ៍នេះ នឹងសម្រួលឱ្យមានស្ថិរភាពនៅតំបន់ច្រកសមុទ្ទតៃវ៉ាន់ មិនមែនត្រឹមតែអាចកាត់បន្ថយភាពតានតឹងរវាងចិននិងសហរដ្ឋអាមេរិកទេ។
ចុះផ្សាយនៅថ្ងៃ៖
ស្តាប់ - ០២:១៥
នៅសប្តាហ៍នេះ ប្រធានាធិបតីអាមេរិកលោកចូ បៃដិន និងសមភាគីចិនលោក ស៊ីជីនពីងបានជួបពិភាក្សាគ្នា និងបានព្រមព្រៀងផ្សារភ្ជាប់ទំនាក់ទំនងយោធានឹងគ្នាឡើងវិញ។ សម្រាប់លោក Morris Chang ប្រេសិតតៃវ៉ាន់ក្នុងជំនួបកំពូលAPEC ចិននិងអាមេរិកព្រមមានទំនាក់ទំនងយោធាឡើងវិញជាដំណឹងដ៏ល្អបំផុត និងជាជំនួបដ៏ប្រពៃមែនទែន។ នៅចំពោះមុខអ្នកសារព័ត៌មាន លោក ម៉ូរីសចាន់ យល់ថាលទ្ធផលនៃជំនួបនេះជាការចូលរួមចំណែកកាត់បន្ថយភាពតានតឹងរវាងអាមេរិកនិងចិនផង និងមានចំណែកជួយពង្រឹងស្ថិរភាពតំបន់ច្រកសមុទ្រតៃវ៉ាន់ផង។
ក្នុងវ័យ៩២ឆ្នាំ ជាស្ថាបនិកក្រុមហ៊ុនសឺមីកុងឌុចទ័រTSMCដ៏ធំជាងគេរបស់តៃវ៉ាន់ លោក ចាន់ បានគូសបញ្ជាក់ថាលោកមិនបានជួបសន្ទនាជាមួយលោកប្រធានាធិបតីចិនស៊ីជីនពីង នៅក្នុងសប្តាហ៍នេះទេ ប៉ុន្តែលោកបានប្រាស្រ័យចរចាជាមួយអ្នកទទួលខុសត្រូវអាមេរិកជាច្រើនរូបមានជាអាទិ៍លោកប្រមុខការទូតអាមេរិកអង់តូនី ប្លីងកិន និងលោកស្រីអនុប្រធានាធិបតី ខាម៉ាឡា ហារីស ព្រមទាំងបានផ្តោះប្តូរសម្តីក្រៅផ្លូវការជាមួយលោកចូបៃដិនដែរ។
លោកចាន់ក៏បានប្រកាសគាំទ្រវិធានការអាមេរិកដែលជាប្រភពនៃភាពតានតឹងមួយទៀតរវាងមហាអំណាចទាំងពីរ គឺចង់កំរិតការលក់និងផលិតបន្ទះឈីប ដ៏ចាំបាច់ក្នុងបច្ចេកវិទ្យាបញ្ញាសិប្បនិម្មិតនិងផលិតអាវុធដ៏ទំនើប ដោយយល់ថាស្ទើរតែលែងមានសោះទៅហើយការផ្តោះប្តូរសេរីក្នុងផ្នែកសឺមីកុងឌុទ័រនេះ។ ប៉ុន្តែឆន្ទៈចង់បំប៉នឧស្សាហកម្មសឺមីកុងឌុទ័រ TSMC នៅសហរដ្ឋអាមេរិកទំនងមិនអាចទៅរួចក្នុងពេលដ៏ខ្លីបានទេ។
សូមរំលឹកថា តៃវ៉ាន់ជាប្រភពនៃភាពតានតឹងរវាងចិននិងអាមេរិក។ ប៉េកាំងតែងចាត់ទុកតៃវ៉ាន់ជាខេត្តមួយដែលមិនទាន់បង្រួបបង្រួមជាចិនតែមួយបាន។ ចិនបង្កើនសម្ពាធនយោបាយនិងយោធាកាន់តែខ្លាំងឡើងៗនារយៈពេលប៉ុន្មានឆ្នាំចុងក្រោយនេះ តាំងពីតៃវ៉ាន់មានរដ្ឋាភិបាលជាអ្នកជាតិនិយមប្រឆាំងនឹងចិនខ្លាំងមក និងគំរាមប្រើកម្លាំងក្រសោបយកកោះតែម្តងផងបើចាំបាច់។ ចំណែកវ៉ាស៊ីនតោនទោះទទួលស្គាល់គោលការណ៍ចិនតែមួយមែន តែបន្តផ្តល់ការគាំទ្រ និងការការពារដល់រដ្ឋាភិបាលតៃវ៉ាន់ជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ