ជប៉ុន-អាស៊ាន ពង្រឹងកិច្ចសហការសន្តិសុខនិងបរិស្ថានអាកាសធាតុ
ក្នុងឱកាសអបអររំឭកខួបទំនាក់ទំនងការទូត ៥០ឆ្នាំ រដ្ឋាភិបាលក្រុងតូក្យូ បានអញ្ជើញថ្នាក់ដឹកនាំអាស៊ាន ចូលរួមកិច្ចប្រជុំកំពូលជប៉ុន-អាស៊ាន ដែលចាប់ផ្តើមបើក នៅថ្ងៃសៅរ៍ ទី១៦ ខែធ្នូ។ កិច្ចប្រជុំកំពូលនេះ ផ្តោតជាសំខាន់ទៅលើការពង្រឹងកិច្ចសហប្រតិបត្តិការ«សន្តិសុខផ្លូវសមុទ្រ» ខណៈពេលដែលបណ្តាប្រទេសក្នុងតំបន់ កំពុងជួបភាពតានតឹងជាមួយរដ្ឋអំណាចក្រុងប៉េកាំង ជុំវិញសំណុំរឿងសមុទ្រចិនខាងត្បូង។ ក្រៅពីបញ្ហាសន្តិសុខផ្លូវសមុទ្រ ក៏មានប្រធានបទបរិស្ថានអាកាសធាតុដែរ។
ចុះផ្សាយនៅថ្ងៃ៖
ស្តាប់ - ០២:៤៦
កិច្ចប្រជុំកំពូលជប៉ុន- អាស៊ាន នេះបានយកចិត្តទុកដាក់អំពីការពង្រឹងកិច្ចសហប្រតិបត្តិការផ្នែកសន្តិសុខ រាប់ទាំងបញ្ហាសន្តិសុខផ្លូវសមុទ្រ ដែលជប៉ុន ចាត់ទុកថានេះជា«បញ្ហារួម»។ បើតាមរដ្ឋបាលរាជធានីតូក្យូ ក្នុងសេចក្តីប្រកាស១ ដែលទីភ្នាក់ងារព័ត៌មានបារាំងAFP ទទួលបាន គឺ ក្នុងតំបន់អាស៊ីប៉ាស៊ីហ្វិក សំណុំរឿង«សន្តិសុខផ្លូវសមុទ្រ» ជាក្តីកង្វល់រួមរបស់ក្រុងតូក្យូ ពីព្រោះ ជប៉ុន ក៏មានបញ្ហាផ្លូវសមុទ្រជាមួយចិន។ ក្នុងសំណុំរឿងជម្លោះសមុទ្រចិនខាងត្បូង គឺ មហាយក្សចិនទាមទារដែនសមុទ្រ ដែលធ្វើឲ្យបង្កជម្លោះជាមួយសមាជិកអាស៊ាន ជាច្រើន ដូចជា ព្រុយណេ ឥណ្ឌូនេស៊ី ម៉ាឡេស៊ី ហ្វីលីពីន និង វៀតណាម ហើយនៅមាន តៃវ៉ាន់ ដែរ ក៏ប៉ះពាល់ក្នុងសំណុំបញ្ហានេះ។
ជប៉ុន ជាសម្ព័ន្ធមិត្តរបស់សហរដ្ឋអាមេរិក ហើយបានចូលរួមក្នុង«សម្ព័ន្ធចតុភាគី Quad» ដែលមាន សហរដ្ឋអាមេរិក អូស្ត្រាលី ឥណ្ឌា និងជប៉ុន។ពេលនេះ ជប៉ុន ចង់ពង្រឹងវិស័យសន្តិសុខជាមួយអាស៊ានទៀត។ នេះក៏ដើម្បីទប់ទល់ឥទ្ធិពលរបស់មហាយក្សចិន។
នៅថ្ងៃសៅរ៍ នាយករដ្ឋមន្ត្រីជប៉ុន លោក ហ្វូមីអូ គីស៊ីដា និង នាយករដ្ឋមន្ត្រី ម៉ាឡេស៊ី លោក អានវ៉ា អ៊ីប្រាហ៊ីម បានពិភាក្សាគ្នា ហើយយល់ព្រមព្រៀងសហការការគ្នា ក្នុងកម្រិតជាដៃគូសហការជាយុទ្ធសាស្ត្រ។ ហើយចំណែកហ្វីលីពីន ប្រធានាធិបតី ហ្វ៊ែរឌីណង់ ម៉ាកូស ជូញ៉រ ក៏អញ្ជើញទៅតូក្យូដោយផ្ទាល់ ហើយបើតាមកាសែតក្នុងស្រុក គឺ ជប៉ុន និង ហ្វីលីពីន ក៏ត្រៀមនឹងជជែកគ្នាបន្ថែមទៀត ជុំវិញកិច្ចព្រមព្រៀងវិស័យសន្តិសុខ ដែលអនុញ្ញាតអាចឲ្យ រដ្ឋបាលតូក្យូ និងម៉ានីល បោះទីតាំងមូលដ្ឋានយោធា នៅក្នុងប្រទេសទាំងពីរទៅវិញទៅមក។
កិច្ចប្រជុំកំពូលជប៉ុន-អាស៊ាន មិនរំលងពីក្រសែភ្នែកចិនឡើយ។ រដ្ឋអំណាចចិនប៉េកាំង ជឿថា រាល់កិច្ចសហការគ្នា គឺត្រូវឈរលើទំនុកទុកចិត្តគ្នា និងដើម្បីផលប្រយោជន៍រួម ដែលមិនប៉ះពាល់ដល់ សន្តិភាព និង ស្ថិរភាព ក្នុងតំបន់។ នេះបើតាមអ្នកនាំពាក្យក្រសួងការបរទេសចិន អ្នកស្រី ម៉ៅ នីង ដែលថ្លែងនៅថ្ងៃសុក្រ ក្នុងពេលសន្និសីទសារព័ត៌មានប្រចាំថ្ងៃ។
ចំពោះភាគីអាស៊ាន គ្មានអ្វីភ្ញាក់ផ្អើលទេ! ថ្នាក់ដឹកនាំប្រទេសអាស៊ាន ជំរុញអំពាវនាវឲ្យតំបន់សមុទ្រអាស៊ីប៉ាស៊ីហ្វិក មានភាព«សេរី និងបើកចំហ» និង គោរពបទដ្ឋានច្បាប់សមុទ្រអន្តរជាតិ ហើយនិងដោះស្រាយជម្លោះដោយប្រកាន់ស្មារតីសន្តិភាពនិយម។
សូមជ្រាបថា សមាជិកអាស៊ាន ១ គឺ ភូមា គ្មានការអញ្ជើញផ្លូវការទេ។ ដ្បិតថា ថ្នាក់ដឹកនាំកំពូលរបបសឹកភូមា មិនគោរពតាមកិច្ចព្រមព្រៀងគ្នាជាឯកច្ឆន្ទៈ ទាំង ៥ ចំណុច ដែលបានសន្យាជាមួយ អង្គការសហប្រជាជាតិ។
តាមគម្រោង ថ្ងៃច័ន្ទ ទី១៨ធ្នូ នាយករដ្ឋមន្ត្រីអូស្ត្រាលី អង់តូនី អាល់បានីស៊ី (Anthony Albanese) នឹងចូលរួមប្រជុំដែរ ដើម្បីពិភាក្សាអំពីកិច្ចការបរិស្ថានអាកាសធាតុ ពិសេសមធ្យោបាយកាត់បន្ថយធ្យូងថ្ម ដែលជាប្រភពផ្សែងពុល និងកម្តៅផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ