តៃវ៉ាន់ផ្តើមកាត់ទោសជនជាប់សង្ស័យករណីជ្រៀតជ្រែកក្នុងការបោះឆ្នោត
ដើមសប្តាហ៍នេះ តុលាការក្រុងតៃប៉ិ បានប្រកាសកាត់ក្តីបុរសម្នាក់ ដែលជាប់បទចោទប្រកាន់ករណីលួងលោមទិញទឹកចិត្តនិងសូកលុយម្ចាស់ឆ្នោត ដើម្បីឲ្យបោះឆ្នោតគាំទ្រ បេក្ខជន ដែលមានជំហរនិន្នាការផ្អៀងទៅរដ្ឋអំណាចចិនប៉េកាំង។ បុរសជនសង្ស័យម្នាក់នេះ មានសញ្ជាតិតៃវ៉ាន់ និងដែលតុលាការឲ្យស្គាល់ត្រឹមឈ្មោះថា ចេង។ ចេង ត្រូវជាប់ចោទប្រកាន់ជាច្រើនករណី ជារួម បទល្មើសរារាំងរំខាន និងជ្រៀតជ្រែកក្នុងការបោះឆ្នោត។ រូបគេនេះបានផលចំណេញកម្រៃជើងសាផ្ទាល់ខ្លួន តាមរយៈការទិញទឹកចិត្តម្ចាស់ឆ្នោតតៃវ៉ាន់។ នេះបើតាមសេចក្តីប្រកាសដំណឹងរបស់ក្រុមអយ្យការ
ចុះផ្សាយនៅថ្ងៃ៖
ស្តាប់ - ០២:៥២
រដ្ឋអាជ្ញាតៃវ៉ាន់ បានបញ្ជាក់ដែរថា ជនជាប់ឈ្មោះ ចេង គឺអាចទទួលបានប្រាក់ចំណេញចំនួន ប្រមាណ ៦០ អឺរ៉ូ ប្រសិនបើរូបគេអូសទាញបញ្ចុះបញ្ចូលម្ចាស់ឆ្នោតម្នាក់។ ហើយក្នុងពេលដំណើរនិងការស្នាក់នៅសម្រាប់បំពេញសកម្មភាពនេះ រូបគេក៏បានទទួលការឧបត្ថម្ភផ្គត់ផ្គង់អំពីសំណាក់ រដ្ឋបាលថ្នាក់តំបន់របស់ចិនដីគោក។ បើតាមរដ្ឋអាជ្ញាតៃវ៉ាន់ បុគ្គល ចេង នេះ ជាមនុស្សនៅក្រុមអ្នកគាំទ្រកាន់ជើងចិនប៉េកាំង ដែលជាក្រុមអ្នកអំពាវនាវឲ្យបង្គ្រួបបង្គ្រួមកោះតៃវ៉ាន់និងចិនដីគោក។
ជាការកត់សម្គាល់ តុលាការតៃវ៉ាន់ប្រកាសផ្តើមដំណើរការជនុំជម្រះក្តីសំណុំរឿងនេះ និងនៅក្នុងវេលានេះ គឺត្រូវធ្វើឡើងក្នុងកាលៈទេសៈមួយ ដែលការបោះឆ្នោតជាតិតៃវ៉ាន់ កាន់តែកៀកខិតជិតចូលមកដល់។ ពោលគឺនៅថ្ងៃទី១៣មករាខាងមុខ។ នេះជាការបោះឆ្នោះដ៏សំខាន់ ព្រោះដើម្បីជ្រើសរើស ប្រធានាធិបតីតៃវ៉ាន់ ផង និងប្រធានសភា ផង។ សំខាន់មួយបែបទៀត គឺ អនាគតបេក្ខជន ដែលជាប់ឈ្មោះឈ្នះសំឡេងឆ្នោត បានដឹកនាំតៃវ៉ាន់ ក៏ជាកត្តាកំណត់អំពីទំនាក់ទំនង ល្អឬមិនល្អ រវាងមហាយក្សចិន សហរដ្ឋអាមេរិក និង កោះតៃវ៉ាន់។ ហេតុនេះ ក្នុងដំណើរការបោះឆ្នោត ដែលកាន់តែជិតចូលមកដល់ ក្នុងពីរបីសប្តាហ៍ទៀត គឺវាឋិតក្រោមក្រសែភ្នែកឃ្លាំមើលយ៉ាងដិតដល់ជាទីបំផុត របស់រដ្ឋបាលក្រុងប៉េកាំង និងក្រុងវ៉ាស៊ីនតោន។ ក្នុងដំណាក់កាលនេះដែរ ក្តីបារម្ភធំបំផុតរបស់ក្រុងតៃប៉ិ គឺព្រួយខ្លាចក្រែងមានការលូកដៃជ្រៀតជ្រែតពីសំណាក់រដ្ឋអំណាចចិន នាំឲ្យជះឥទ្ធិពលលើលទ្ធផលបោះឆ្នោត។
ជាការរំឭក ករណី១ទៀត ដើមខែធ្នូ រដ្ឋអាជ្ញាក្រុងតៃប៉ិ បានប្រកាសឲ្យដឹងថា កំពុងតែស៊ើបអង្កេតលើបុរស ៥ នាក់ ជាប់សង្ស័យថាត្រូវរដ្ឋអំណាចចិនជួយឧបត្ថម្ភគាំទ្រចំពោះការធ្វើដំណើររបស់ពួកគេ ដើម្បីទៅបញ្ចុះបញ្ជូលម្ចាស់ឆ្នោត ចំនួន ៦០នាក់។ មេខ្លោងនៃជនសង្ស័យទាំង៥ ឈ្មោះ ជូ ក៏បានរៀបចំឃុបឃិត ធ្វើស្ទង់មតិមុនបោះឆ្នោត ដើម្បីឲ្យរំលេចឥទ្ធិពលទៅលើស្មារតីម្ចាស់ឆ្នោតតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ