គ្រោះថ្នាក់យន្តហោះប៉ះគ្នានៅតូក្យូ៖ អាជ្ញាធរជប៉ុនសន្យាបើកការស៊ើបអង្កេតស៊ីជម្រៅ រកមូលហេតុ
មិនទាន់មានការបញ្ជាក់ពីមូលហេតុច្បាស់លាស់ណាមួយ ដែលបណ្តាលឲ្យមានគ្រោះថ្នាក់ យន្តហោះ២ប៉ះគ្នា ផ្ទុះឆេះនៅឯព្រលានយន្តហោះHaneda ក្រុងតូក្យូទេ។ ថ្ងៃពុធទី៣មករា អាជ្ញាធរជប៉ុន សន្យាបើកការស៊ើបអង្កេតឲ្យបានស៊ីជម្រៅបំផុត ដើម្បីរកមូលហេតុ មិនថាវាមានលក្ខណៈជាកំហុសបច្ចេកទេស ឬជាការធ្វេសប្រហែស។ សូមបញ្ជាក់ថា គ្រោះថ្នាក់យន្តហោះដែលបានកើតឡើង កាលពីក្បាលព្រលប់ថ្ងៃអង្គារនេះ បានបណ្តាលឲ្យស្លាប់មនុស្ស៥នាក់ ស្របពេលដែលជប៉ុន ទើបតែបានជួបគ្រោះរញ្ជួយដីដ៏ធ្ងន់ធ្ងរ ស្លាប់មនុស្សជាង៦០នាក់ កាលពីថ្ងៃចន្ទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤៦
អាជ្ញាធរជប៉ុនបានឲ្យដឹង នៅថ្ងៃពុធទី៣មករា ថាមូលហេតុដែលបណ្តាលឲ្យមានគ្រោះថ្នាក់យន្តហោះប៉ះគ្នា ផ្ទុះឆេះ កើតឡើងកាលពីថ្ងៃអង្គារទី២មករា គឺគេមិនទាន់ដឹងច្បាស់នោះទេ។ ការស៊ើបអង្កេតចំនួន២ផ្សេងគ្នា ត្រូវបានគេចាប់ផ្តើមបើក ទីមួយធ្វើឡើងដោយនគរបាលជប៉ុន និងមួយទៀត ធ្វើឡើងដោយការិយាល័យសន្តិសុខដឹកជញ្ជូនជប៉ុន (JTSB)។ បន្ថែមពីនេះ ការិយាល័យស្រាវជ្រាវនិងវិភាគដើម្បីសន្តិសុខផ្លូវអាកាសបារាំង បានបញ្ជូនអ្នកស៊ើបអង្កេត៤នាក់ ព្រមទាំងអ្នកជំនាញបច្ចេកទេស របស់ក្រុមហ៊ុនAirbus ៥នាក់ទៀត ដើម្បីជួយដល់ក្រុមការងារស៊ើបអង្កេតជប៉ុន ព្រោះថាយន្តហោះដែលបានផ្ទុះឆេះ គឺជាយន្តហោះ Airbus A350។
សូមបញ្ជាក់ថា ហេតុការណ៍យន្តហោះប៉ះគ្នាផ្ទុះឆេះនេះ បានកើតឡើង កាលពីក្បាលព្រលប់ថ្ងៃអង្គារទី២មករា នៅព្រលានយន្តហោះ Haneda ក្រុងតូក្យូ។ យន្តហោះ Airbus A350 របស់ក្រុមហ៊ុន Japan Airlines ផ្ទុកមនុស្សសរុប៣៧៩នាក់មកពីក្រុងសាប៉ូរ៉ូ កោះហុកកៃដូ កំពុងតែចុះចតដល់ដី ស្រាប់តែបានផ្ទុះឆេះ បន្ទាប់ពីបានប៉ះទង្គិចជាមួយយន្តហោះមួយទៀត ប្រភេទ Dush 8 របស់កងឆ្មាំសមុទ្រជប៉ុន។
មនុស្សទាំង៣៧៩នាក់ក្នុងយន្តហោះ Japan Airlines ត្រូវបានជម្លៀសចេញដោយសុវត្ថិភាព មុននឹងយន្តហោះ ត្រូងអណ្តាតភ្លើងឆាបឆេះអស់សល់តែគ្រោងឆ្អឹង។ មានមនុស្សរបួសស្រាល ចំនួន១៤នាក់។ លោក Doug Drury អ្នកជំនាញសន្តិសុខអាកាសចរណ៍ នៅសកលវិទ្យាល័យ Queensland អូស្ត្រាលី បានកោតសរសើរដល់ក្រុមការងារបម្រើការលើយន្តហោះ របស់ក្រុមហ៊ុនJapan Airlines ដែលបានអនុវត្តនីតិវិធីជម្លៀសអ្នកដំណើរយ៉ាងល្អឥតខ្ចោះ ក្នុងពេលមិនឲ្យលើសពី៩០វិនាទី ដោយគោរពទៅតាមក្រិត្យក្រមសន្តិសុខ។
ដោយឡែក ជាអកុសល យន្តហោះរបស់កងឆ្មាំសមុទ្រជប៉ុន ដែលមានផ្ទុកមនុស្ស៦នាក់ គឺត្រូវបានផ្ទុះឆេះអស់ បណ្តាលឲ្យស្លាប់មនុស្ស៥នាក់។ មានតែអ្នកបើកបរយន្តហោះ១នាក់ប៉ុណ្ណោះ ដែលនៅរស់ តែរងរបួសធ្ងន់។ ក្នុងពេលមានគ្រោះថ្នាក់ យន្តហោះនេះ ហៀបនឹងចេញដំណើរឆ្ពោះទៅកាន់តំបន់រងគ្រោះរញ្ជួយដី នៅភាគខាងលិចជប៉ុន ដើម្បីដឹកជញ្ជូនស្បៀងនិងសម្ភារៈទៅជួយប្រជាជនរងគ្រោះ។
នៅក្នុងសន្និសីទកាសែត កាលពីល្ងាចថ្ងៃអង្គារ តំណាងក្រុមហ៊ុនJapan Airlines បានអះអាងថា មុនពេលកើតហេតុ យន្តហោះ JAL516 របស់ខ្លួនបានទទួលការអនុញ្ញាតឲ្យចុះចត ពីសំណាក់បុគ្គលិកគ្រប់គ្រងការចុះចតនិងហោះឡើងនៃព្រលានយន្តហោះ។ យ៉ាងណាមិញ ការផ្ទៀងផ្ទាត់ស្តាប់សំឡេងឆ្លងឆ្លើយគ្នាតាមរលកសញ្ញាវិទ្យុ ដែលមាននៅលើគេហទំព័រ LiveATC.net គឺពិតជាបញ្ជាក់ដូចអ្វីដែលដែលក្រុមហ៊ុន Japan Airlines អះអាងមែន។ សំឡេងអនុញ្ញាតឲ្យចុះចតចុងក្រោយបង្អស់ នៅម៉ោង៥និង៤៣នាទីល្ងាច ពោលគឺប្រមាណ៤នាទីមុនគ្រោះថ្នាក់កើតឡើង។
ដោយឡែក ផ្អែកតាមការផ្សាយរបស់ទូរទស្សន៍NHK ដែលស្រង់ប្រភពពីមន្ត្រីក្រសួងដឹកជញ្ជូនជប៉ុន គឺមុនពេលកើតហេតុ មានបុគ្គលិកបញ្ជាការហោះឡើងម្នាក់ បានប្រាប់ទៅយន្តហោះឆ្មាំសមុទ្រ ឲ្យរងចាំនៅឆ្ងាយពីផ្លូវហោះចុះឡើងបន្តិចសិន។ ក៏ប៉ុន្តែយោងតាមទូរទស្សន៍NHKដដែល អ្នកបើកយន្តហោះឆ្មាំសមុទ្រដែលនៅរស់មានជីវិត បានអះអាងប្រាប់ ថាខ្លួនបានទទួលការអនុញ្ញាតឲ្យហោះឡើង។
យ៉ាងណាក៏ដោយ គិតត្រឹមពេលនេះ ទាំងក្រុមហ៊ុន Japan Airlines ទាំងអាជ្ញាធរឆ្មាំសមុទ្រ និងទាំងក្រសួងដឹកជញ្ជូនជប៉ុន បានបដិសេធមិនឆ្លើយលំអិតវែងឆ្ងាយទេ ទាក់ទិននឹងមូលហេតុនៃគ្រោះថ្នាក់នេះ ដោយគ្រាន់តែលើកឡើងថា ការស៊ើបអង្កេតស៊ីជំរៅកំពុងតែដំណើរការ។ ផ្អែកតាមទីភ្នាក់ងារព័ត៌មាន Kyodo អ្នកជំនាញជប៉ុនបានយកប្រអប់ថតសំឡេងរបស់យន្តហោះឆ្មាំសមុទ្រទៅពិនិត្យហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ