ជប៉ុនរងអង្រួនដោយគ្រោះរញ្ជួយដីជាង២០ នៅថ្ងៃទី១ឆ្នាំ២០២៤
នៅថ្ងៃទី១មករា ឆ្នាំ ២០២៤ ឆ្នេរភាគខាងកើត និងកណ្តាលនៃប្រទេសជប៉ុនរងគ្រោះដោយការរញ្ជួយដីប្រមាណ ២១ ដែលនៅក្នុងនោះ ខ្លាំងបំផុត មានកម្រិត ៧,៤រ៉ិចទ័រ។ ដោយសារកម្លាំងរញ្ជួយដីដ៏ខ្លាំង អាជ្ញាធរជប៉ុនបានព្រមានពីគ្រោះរលកយក្សស៊ូណាមី និងអំពាវនាវឲ្យប្រជាជនភៀសខ្លួនជាបន្ទាន់ ទៅនៅទីទួលខ្ពស់ៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៦
នៅថ្ងៃចន្ទ ថ្ងៃទី១ដើមឆ្នាំ២០២៤ ឆ្នេរខាងលិចដែលស្ថិតតំបន់ភាគកណ្តាលប្រទេសជប៉ុនបានរងអង្រួនដោយគ្រោះរញ្ជួយដីដែលមានកម្រិតខ្លាំងជាងគេ ៧,៥រ៉ិចទ័រ នៅវេលាម៉ោង ៤រសៀល ម៉ោងនៅប្រទេសជប៉ុន។ យោងតាមទីភ្នាក់ងារឧតុនិយមជប៉ុន បន្ទាប់ពីការរញ្ជួយដីដ៏ធំដែលមានចំណុចរញ្ជួយ នៅតំបន់Noto ភាគកណ្តាល និងខាងលិចប្រទេសជប៉ុន ការរញ្ជួយដីតូចៗជាង២០ បានកើតឡើងនៅជុំវិញ ចំណុចរញ្ជួយក្នុងរយៈពេល១ម៉ោងកន្លះ។
ទីភ្នាក់ងារឧតុនិយមជប៉ុនបានព្រមានពីគ្រោះរលកយក្សស៊ូណាមី ដែលអាចមានកំពស់ដល់៥ម៉ែត្រ បន្ទាប់ពីកំពង់ផែ Wajima នៃឧបទ្វីបNotoចាប់រងបោកបក់ដោយរលកកំពស់ជាង១ម៉ែត្រ នៅក្រោយការញ្ជួយដី។ មជ្ឈមណ្ឌលប្រកាសអាសន្នស្តីពីស៊ូណាមីនៅ មហាសមុទ្រប៉ាស៊ីហ្វិក ក៏បានព្រមានពីរលកយក្សស៊ូណាមីដ៏គ្រោះថ្នាក់ដែលអាចកើតឡើងនៅក្នុងរង្វង់៣០០គីឡូម៉ែត្រពីចំណុចរញ្ជួយ។ កូរ៉េខាងត្បូង និងរុស្ស៊ី ដែលស្ថិតនៅសមុទ្រជប៉ុន បានប្រកាសអាសន្ន នៅតាមបណ្តាកោះ និងក្រុងជាប់មាត់សមុទ្រ ដែលស្ថិតនៅមិនឆ្ងាយប៉ុន្មានពីកន្លែងរញ្ជួយ។
រូបភាពរបស់ទូរទស្សន៍ជប៉ុនបានបង្ហាញវីដេអូ អគ្គិភ័យ ឬដីហ៊ុយទ្រលោម ដោយសារការរញ្ជួយដីលើកនេះ។ ចំណែកវីដេអូបង្ហោះតាមបណ្តាញសង្គម បង្ហាញហាងទំនិញរញ្ជួយ មនុស្សភ័យស្លន់ស្លោនៅផ្លូវរថភ្លើងក្រោមដី។ ទូរទស្សន៍ជាតិជប៉ុន NHK ដែលផ្សាយព័ត៌មានផ្ទាល់ពិសេស នៅថ្ងៃចន្ទនេះ បានប្រកាសប្រាប់ប្រជាជនឲ្យរត់ភៀសខ្លួនជាបន្ទាន់ ទៅនៅទីទួលខ្ពស់ៗ។ "ផ្ទះ និងទ្រព្យសម្បត្តិសំខាន់ណាស់សម្រាប់អ្នក ប៉ុន្តែ អាយុជីវិតរបស់អ្នកសំខាន់ជាងអ្វីៗទាំងអស់។ សូមរត់ទៅកាន់តំបន់ដែលមានទីទួលខ្ពស់បំផុត"។ នេះជាសារដាស់តឿនរបស់ពិធីករម្នាក់របស់ទូរទស្សន៍ជប៉ុនNHK។
ផ្ទះជាង ៣ម៉ឺនខ្នងនៅក្នុងខេត្តបី នៅតាមមាត់សមុទ្រ ដែលស្ថិតនៅជិតចំណុចរញ្ជួយ ត្រូវដាច់ចរន្តអគ្គិសនី ចំណែក ផ្លូវ និងរថភ្លើងល្បឿនលឿន ត្រូវផ្អាក បិទមិនដំណើរការ។ នៅក្នុងសន្និសីទកាសែត នៅថ្ងៃចន្ទ អ្នកនាំពាក្យរបស់រដ្ឋាភិបាល លោក Yoshimasa Hayashi អះអាងថា មជ្ឈមណ្ឌលនុយក្លេអ៊ែរ នៅក្នុងតំបន់ជួបគ្រោះរញ្ជួយដី នៅដំណើរការធម្មតា គ្មានបញ្ហាគួរឲ្យកត់សំគាល់ ប៉ុន្តែ លោកអំពាវនាវឲ្យប្រជាជនរត់ភៀសខ្លួនទៅកាន់កន្លែងសុវត្ថិភាព។
ស្ថិតនៅលើខ្សែក្រវាត់ភ្នំភ្លើងក្នុងមហាសមុទ្រប៉ាស៊ីហ្វិក ជប៉ុនជាប្រទេសដែលជួបគ្រោះរញ្ជួយដី ញឹកញាប់ជាងគេ នៅក្នុងពិភពលោក។ ជប៉ុនរឹតបន្តឹងខ្លាំងក្រឹតក្រមនៅក្នុងវិស័យ សំណង់ ដូចជាអគារផ្ទះសម្បែងត្រូវសង់យ៉ាងណាដើម្បីអាចធន់នឹងការរង្គើរញ្ជួយដី ចំណែកប្រជាជនគ្រប់វ័យត្រូវហាត់សម ជាអចិន្ត្រៃយ៍ដើម្បីត្រៀមលក្ខណៈ នៅពេលមានគ្រោះរញ្ជួយដីកើតឡើង។ ប៉ុន្តែ យ៉ាងណាក៏ដោយ ជប៉ុននៅតែដិតដាម តក់ស្លុត ជានិច្ចនឹងគ្រោះរញ្ជួយក្នុងកម្រិតខ្ពស់បំផុតមិនធ្លាប់មាន កាលពីឆ្នាំ ២០១១ដែលបានបណ្តាលឲ្យគ្រោះមហន្តរាយរលកយក្សស៊ូណាមី នៅហ្វូគូស៊្ហីម៉ា ដែលបានសម្លាប់ និងធ្វើឲ្យមនុស្សបាត់ខ្លួន ជាង ២ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ